Chiisu ndoo nɔ wanaa nda wa o chaŋyɛi kpɛɛluŋnde niŋnda a yaa, nduyɛ Bɛtani nda wa ichali ni. Nda wa ni, Lasalɔɔ a yeemaa nduaa ŋiɔɔŋ nda, Meele nda Mata. Paale pilɛ, Chiisu wa Chɔɔdaŋ leeloo mi Meele nda Mata yɔŋ ndu yooŋgu choŋ choŋndo aa: ‘Lasalɔɔ cho a naa lakalu tei. Yandii, huŋ chɔ chɔ!’ Kɛ Chiisu yala lakɔ le. Palɛi ŋiiŋ okoŋ kɔɔli, mi Chiisu dimul buɛiyaa nduaa aa: ‘La ŋ kɔŋnuŋ Bɛtani. Lasalɔɔ cho o luaŋ, nduyɛ I cho kɔlaŋ le mi kɔ tindi ndu.’ Mi kiilaa nduaa dimul ndu aa: ‘Te o luaŋ Lasalɔɔ cho ni, mɛɛ keŋ cho ndu mala mbo seŋgu.’ Mi Chiisu dimul nda kpendekele aa: “Lasalɔɔ vi pɛ.”

Mɛɛ Chiisu fuuluu Bɛtani, Lasalɔɔ ndoo chii niŋ le palɛi i hiɔɔlu o sɛiyo niŋ. Mi waŋnda faŋga bɛndoo huŋ le Mata nda Meele kɔllo dɛɛniaa. Mɛɛ Mata tuei maa Chiisu hiŋ, mbo kua naa ndu chua a kiltaŋ. Mbo dimul ndu aa: “Masanɔɔ, te num oo wa naŋ pɛ, yema nuu ve wu le.” Mi Chiisu dimul ndu aa: ‘Yema num cho vɛlɛ miiŋgu yoomu. A laalaŋ pa a hei Mata?’ Mi Mata dimi aa: ‘I laalaŋ maa o cho miiŋgu yoomu o paale waŋnda cho miiŋgu yoomu leŋ choo.’ Mi Chiisu dimul ndu aa: “Ya miŋgi waŋnda yoomu ni. Nduyɛ ya cho yoomoo ni.”

Okoŋ, mi Mata kua naa Meele chua mbo dimul ndu aa: ‘Chiisu hiŋ.’ Mi Meele nyaanuŋ naa Chiisu chua, nduyɛ mi faŋgaa tual ndu kɔɔli. Mi Meele kɔ beŋ Chiisu wulaŋ, okoŋ mbo wa chaŋndo. Mbo dimi aa: ‘Masanɔɔ, te num oo wa naŋ pɛ, maa yema naa cho wɔ yoomu!’ Mɛɛ Chiisu che mɛɛ kpɛ Meele wa mɔnɛi biyɔɔ yɛ, mi ndu bɛɛ kandu chaŋndo. Mɛɛ faŋgaa che ndu mɛmiaŋ tolɔɔ, ma dimi aa: ‘Nuawɔ se mɛɛ Chiisu ndoo kaala Lasalɔɔ yɛ.’ Mi kɔndɔfillo bii waŋnda apum ma nyuna aa: ‘Mɛɛ le yɛɛnɛ o chiindiaa chaaŋ ndɔ le?’ Yɛɛ Chiisu ndoo nɔ yɛ mbo tosa okoŋ kɔɔli?

Mi Chiisu kua o sɛi buulu nda kumbu Lasalɔɔ wo, nduyɛ pou bɛndu bɛndoo wa o sondoo. Mbo dimul waŋnda aa: “La faŋa pouwo.” Mi Mata dimul ndu aa: ‘Ŋ kumbu ndu o cho niŋ palɛi ndii hiɔɔlu. Dialuŋ ndɔŋ cho niŋ chuŋndo.’ Kɛ a koŋ kpou, ma faŋa pouwo. Mi Chiisu piɛi aa: ‘Kɛkɛ, I mel num balika le mɛɛ ŋ muli piɛile nileŋ yɛ. I sina maa ma muli piɛile nileŋ teleŋ o teleŋ. Kɛ I cho hei dimioo choo choo le mi faŋga sim hoo wo  laalaŋ kɛsɛ maa num vem ya ni.’ Okoŋ, mi Chiisu deŋi choo choo aa: “Lasalɔɔ, fula!” Mi suɛi kɔndɔfili pum yɔŋnuŋ. Mi Lasalɔɔ fula o sɛiyo niŋ, nduyɛ kolalaŋ la wa ndu la yiuwa yiuwaa lekɔɔ. Mi Chiisu dimul nda aa: “La tiimbuu ndu mbo kuɛŋnuŋ.”

Mi wanaa bɔɔbɔɔ che kaama hoo wa duau laalaŋndo o Chiisu niŋ. Kɛ mi apum kua ma kɔ dimul Falisiiya. Chɔŋ niŋ a teleŋ koŋ, Falisiiya wa kindiŋndo le ma dii Lasalɔɔ nda Chiisu. O kiilaa 12 Chiisu wa tɛɛŋ, opilɛ ndoo nɔ diolaŋ ni aa Chuda Isikaliɔɔ. Mbo kua sɔɔ sɔɔ naa Falisiiya chua, mbo kɔ nyuna nda aa: ‘Vɛɛnɛ nya cho yɛ ya paawa te I mala nya pɛ mi la bii Chiisu?’ Ma chɛlaŋ maa a cho ndu paawaa kaniŋ humboŋ 30. Okoŋ, mi Chuda kandu nɛilaŋ nuuviaa mɛɛ o looku mbo mal Chiisu Falisiiya o ba yɛ.