Chɔŋ wa waŋnda yooŋgoo dimullo aa: ‘Wana hiou ya wo cho hunɔɔ.’ Mɛɛ Chiisu fuuluu wɔsilaŋ 30, mbo kua Kalili o Pioo Chɔɔdaŋ naa Chɔŋ wa waŋnda yiŋɔɔ wa. Chiisu ndoo yeema mi Chɔŋ yiŋ ndu. Kɛ mi Chɔŋ dimul ndu aa: ‘O cho ya le nɔ mi yiŋ num te. Num nɔ ni ma yiŋ ya.’ Mi Chiisu dimul Chɔŋ aa: ‘Chɛhowa yeema num ma yiŋ ya.’ Okoŋ, ma tual o Pioo Chɔɔdaŋ niŋ, mi Chɔŋ mɔɔwa Chiisu o mɛŋndaŋ bɛŋgu.

Mɛɛ Chiisu fula o mɛŋndaŋ bɛŋgu, mbo piɛi. A teleŋ koŋ, mi choo choo kumbiŋ, mi nyina Mɛlɛkaa tual ndu choo o ikaŋgbo. Okoŋ mi Chɛhowa suaa o choo choo niŋ aa: “Po nuu cho hoo ni, I kaala ndu, nduyɛ I hini kɔl a ndu.”

Mɛɛ nyina Chɛhowaa tol Chiisu choo, mbo simnuŋ Kiliti ɔɔ Mɛsayanɔɔ. Nduyɛ, ndoo nɔ niko mbo kandu wali Chɛhowa ndoo vem ndu o lɛŋndeŋ choo wo tosaa.

Dimioo nuaa Chiisu yiŋ, mbo kua o yondo pollo niŋ, mbo kɔ chii loŋ palɛi 40. Mɛɛ o miiŋgu, mbo kua naa Chɔŋ chua. Mɛɛ Chɔŋ che Chiisu hunɔɔ, mbo dimi aa: ‘Saa Fɔŋndɔ Mɛlɛkaa o cho hunɔɔ hakioo faŋa o chieeŋndo choo wo cho hoo ni.’ Mi diomnda Chɔŋ dimi laŋ ndaŋ la chɔm waŋnda kpendekele maa Chiisu cho Mɛsayanɔɔ ni. A sina pa nyɛ ndoo yɔŋnuŋ Chiisu wo teleŋ o wa o yondo pollo niŋndo? Ŋ yaasiaŋndɔ.