Mɛɛ Chiisu vi, mi laŋunɔ sulaa pilɛ diolaŋ aa Choosɛ kɔ nyuna Paile le mbo kɔ tusi dialuŋ ndɔŋ o yɔmndo choo. Mɛɛ o tusi muŋ, mbo suu muŋ nyɛm chuŋ kɛndɔŋ, mbo simbul muŋ o feŋgbɛla kɛndɛ kɛndɛlaŋ niŋ. Okoŋ, mbo kɔ yambu muŋ o sɛi sɛnɛiyo niŋ. Mbo pimbul pou bɛndoo, mbo kɔ handu ndu o sɛi koŋ sondoo. Mi masaa wanaa soliaa lasalaa dimul Paile aa: ‘Siooŋnde cho naa yɔŋii buɛiyaa Chiisu wa huŋ chua dialuŋ ndɔŋ, ma dimi maa o miiŋgu yoomu.’ Le hei, mi Paile dimul nda aa: ‘La kɔ kinda sɛiyo nyɛkɛndɛ kɛndɛi, nduyɛ mi la wa ndu hɔlteŋ.’

Palɛi yaa okoŋ kɔɔli, mi waŋ laanduaa apum kua o sɛiyo idiiyo puŋ. Kɛ ma saaluŋ maa pouwo ve o sɛiyo sondoo le. Mɛɛ nda nua leniŋ, mi maalikɛinɔɔ dimul waŋ laanduaa haa aa: ‘La kɔ dimul buɛiyaa nduaa ma bɔŋaŋ nda ndaa Kalili.’

Mi Meele Madaliŋ kua chɔ chɔ naa Pitɛ nda Chɔŋ chua, mbo kɔ dimul nda aa: ‘Waŋndo chua dialuŋ Chiisu woŋ!’ Mi Pitɛ nda Chɔŋ kua o sɛiyo. Mɛɛ nda komal sɛiyo fondo, ma miiŋguŋ o la nda lo bɛɛ.

Mɛɛ Meele miiŋgu o sɛiyo, mbo cha maalikɛiya leniŋ nda ŋiɔɔŋ. Mbo dimul nda aa: ‘I sina naa nda kuɛ a Masanɔ nuu wa le.’ Okoŋ, mbo cha poo, nduyɛ ndoo yiyaŋ ko maa wana wa kpeloo mandaa wo ni. Mbo dimul ndu aa: ‘Fallo, yandii chɔm ya naa ŋ kuɛ a ndu wa.’ Kɛ mi poo veelu ndu aa “Meele!” Mbo sina sakpo maa Chiisu ni. Mbo deŋi choo choo aa: “Wana Pɛɛkaa!” Okoŋ, mbo baambaŋ ndu. Mi Chiisu dimul ndu aa: ‘Kɔ dimul puaapiliaa niaa maa a che Masanɔɔ.’ O lepilɛ niŋ kpe, mi Meele nyaanuŋ naa buɛiyaa Chiisu wa chua, mbo kɔ dimul nda maa o che Chiisu.

A paale yɔŋgaŋndeŋ, buɛiyaa nduaa a ŋiɔɔŋ ndaa chɛŋ Chulusalɛm, ma wa kɔlaŋ Ɛmayɔɔ. Mi poo pum tual nda kɔɔli, mbo nyuna nda le nyɛ nda wa suɛi a ndu okɔɔ wo. Ma dimul ndu aa: ‘Baa a tui nyɛ yɔŋnuŋndo le? O cho niŋ hau palɛi i yaa, mi masaa wanaa soliaa lasalaa dii Chiisu. Nduyɛ suŋ suŋ, waŋ laanduaa apum cho dimioo maa o miiŋgu yoomu!’ Mi poo nyuna nda aa: ‘Baa la laalaŋ nyɛ wanaa suaa le Mɛlɛka wa dimi  wo le? Wanaa suaa le Mɛlɛka wa ndaa dimi maa Kiliti nɔ mbo sɔla piɔmndo, nduyɛ mbo miiŋgu yoomu.’ Mbo hiau lachi a nda yau Mɛlɛkaa tɛɛsiallo. Mɛɛ nda fuuluu Ɛmayɔɔ, mi buɛiyaa kaŋ dimul ndu le mbo kuɛ o yiya. Mɛɛ o wa piɛileŋ o nyɛdiaa nda wa dioo ichɔl koŋ ndo choo, ma sina maa Chiisu ni. Okoŋ, mbo lo nda o hɔl pɛ.

Mi buɛiyaa ŋiɔɔŋaa kaŋ miiŋgu Chulusalɛm chɔ chɔ, ma kua o chiɛi kiilaa nduaa wa wo, ma kɔ dimul nda nyɛ yɔŋnuŋndo. Mɛɛ nda wa chiɛiniŋ loŋ, mi Chiisu fula nda kpou o hɔl. O tasela ndɔ, kiilaa nduaa ndaa laalaŋ maa Chiisu le wa koŋ te. Okoŋ mbo dimul nda aa: ‘La tofa ya balaŋ. La pilaŋ ya. I wa i poonyiaŋ maa Kiliti nɔ mbo sɔla piɔmndo, nduyɛ mbo miiŋgu yoomu.’