Mi masaa wanaa soliaa lasalaa kua a Chiisu o Paile lo. Okoŋ, mi Paile nyuna nda aa: ‘Suɛi wɔɔŋ kuɛɛ poo hoo tosa yɛ?’ Ma muli aa: ‘O dimi maa masaa o cho ni!’ Mi Paile nyuna Chiisu aa: “Num cho Masa Chuuwa ni?” Mi Chiisu muli aa: “Masale nileŋ le cho Masale waa chieeŋ naŋ te.”

Okoŋ, mi Paile yɔŋ Chiisu o Hɛlɔɔ lo, le mbo kɔɔsa ndu te o saaluŋ niŋ pɛ suɛi wɔɔŋ o tosa ve. Nduyɛ Hɛlɔɔ wa masaa le Kalili ni. Kɛ ndu bɛɛ seeluŋ nyɛ o nyɛ wɔɔŋ Chiisu tosa le. Le hei, mbo miŋgi ndu naa Paile chua. Mi Paile dimul waŋnda aa: ‘Ya naa Hɛlɔɔ, ŋ seeluŋ nyɛ o nyɛ wɔɔŋ poo hoo tosa le. Lelaŋ, I cho ndu malɔɔ.’ Mi waŋnda kpou deŋi choo choo aa: ‘Dii ndu! Dii ndu!’ Mi puaa chɔuwa luaa Chiisu, ma tufu ndu lɔluaŋ choo, nduyɛ ma kuindi kuindi ndu. Ma toosiaa mɔsil ŋyɔɔ, ma wou ndu o lebol. Ma wa ndu mamɔɔ aa: “Isɛ yoo, Masa Chuuwa!” Mi Paile dimul vɛlɛ waŋnda aa: ‘I seeluŋ nyɛ o nyɛ wɔɔŋ poo hoo tosa le.’ Kɛ mi waŋnda deŋi choo choo aa: “Dii ndu o yɔmndo choo!” Le hei, mi Paile mal nda Chiisu o ba le ma kɔ dii ndu.

Mi puaa chɔuwa kua a Chiisu o fondaa diolaŋ aa Kɔlkɔta. Ma kɔ baŋ ndu o yɔmndo choo. Mɛɛ nda chii ndu baŋɔɔ, ma simi yɔm koŋ. Mi Chiisu piɛi aa: ‘Kɛkɛ, mal nda haki, kanifuule a sina nyɛ nda cho tosaa wo le.’ Waŋnda wa Chiisu mamɔɔ, ma dimi aa: ‘Te Po Mɛlɛkaa ŋ cho ni, mɛɛ tollɔ o yɔm koŋ choo. Piŋi wɔ numpila.’

Mi viyaa wa ndu a baŋaa ikɛi ya opilɛ dimul ndu aa: “Loonuŋ a ya teleŋ ŋ cho hunɔɔ wa Masa wo.” Mi Chiisu chuel ndu buŋgɛi aa: “A cho hunɔɔ wa a ya latulu o Kpele Hɛnɛkiɔɔ niŋ.” A paale kalaleŋ, mi nyumndaŋ ma tual o lɛŋnde leŋ niŋ kpiŋgbi le hawɛilaŋ la yaa. Buɛiyaa Chiisu wa apum wa isisi o yɔm koŋ ikɛi loŋ. Nduyɛ Meele kala ndɔ bɛɛ wa loŋ. Mi Chiisu dimul Chɔŋ maa o koma bii Meele maa kala ndɔ.

O mɛɛlulaŋ kpɔŋ, mi Chiisu dimi aa: “Nyɛ o nyɛ chuu yɔŋnɔŋ.” Okoŋ, mbo mal bolleŋ, mbo malnuŋ kɔl. Mi kola bɛndu piɔu Fondaŋ Diandaa a Fondaŋ Hiou Diondɔɔ o chiɛi Mɛlɛkaa niŋndo tɛnda tɛɛŋ  kpala. Mi wana bɛndu puaa chɔuwa dimi aa: ‘Po Mɛlɛkaa kpeekpei poo hoo wa ni.’