Mɛɛ Chiisu wa nda kiilaa nduaa o chiɛi choo choo wo niŋ, mbo dimul nda aa: “Chuɛllɛŋ nya kpou la cho ya malɔɔ.” Mi Pitɛ dimi aa: ‘Ɛ ɛ! Ya I mel num te! O yɔŋ bɛɛ mi haa kpou mal num, fɛɛŋ bɛɛ I mel num te.’ Kɛ mi Chiisu dimul Pitɛ aa: ‘Tuupa mi sɔɔ koowa, a cho dimi le yaa maa a sina ya le.’

Mɛɛ nda wa kɔlaŋ a Chiisu o Kayafaa lo, mi kiilaa Chiisu wa a bɔɔbɔɔ nyaanuŋ. Kɛ mi a ŋiɔɔŋ tual nda kɔɔli. A ŋiɔɔŋaa kaŋ, opilɛ wa Pitɛ ni. Mbo kua nda kɔɔli di o chiɛi Kayafaa wo, nduyɛ mbo kɔ chal haŋgɔɔ o yiŋndeŋ ikɛi. Ichɔl koŋ, mi buɛi laandu pilɛ cha Pitɛ hɔlla, mbo dimi aa: ‘I sina num! Num bɛɛ a wa Chiisu kɔɔli!’

Mi Pitɛ dimi aa: ‘Ɛ ɛ. I ve ndu kɔɔli le! I sina pɛŋ nyɛ ŋ cho suɛi a ndu okɔɔ wo le!’ Mi Pitɛ mal mbo kua o dioo le luɛiyɔɔ chiɛiniŋ. Nyɔɔ viu bɛɛ le, mi buɛi laandu cheleŋ cha ndu, mbo dimul waŋnda aa: ‘Poo hoo wa Chiisu kɔɔli!’ Mi Pitɛ dimi aa: ‘I sina pɛŋ Chiisu le!’ Mi po cheleŋ bɛɛ dimi aa: ‘Num bɛɛ a wa ndu kɔɔli! Nduyɛ, mɛɛ ŋ suaa yɛ chɔm kɛsɛ maa num bɛɛ Kalili ŋ fula ni maa Chiisu.’ Kɛ mi Pitɛ mɛnaŋ, mbo dimi aa: ‘I sina ndu le!’

A teleŋ koŋ kinɛi, mi sɔɔ koowa. Mi Chiisu muliŋ, ma baŋa hɔlla nda Pitɛ. Mi Pitɛ loonuŋ nyɛ Chiisu dimul ndu wo, okoŋ mbo fula o bɛɛ mbo kɔ chaŋ chaŋndo pila.

A boondii keŋ, mi Laŋgbaa Kalaa Kialu Yamaŋ Nda chuuŋgiaŋ o chiɛi Kayafaa wo le Chiisu sɔɔŋ handɔɔ choo. Ndaa chii niŋ kɛɛsiaa le Chiisu diyɔɔ. Nduyɛ a wa nɛilaŋ nuuviaa mɛɛ nda tosa hei yɛ. Kɛ a seeluŋ nyɛ o nyɛ wɔɔŋ o tosa le. O mɛɛlulaŋ, mi Kayafaa nyuna Chiisu aa: “Num cho Po Mɛlɛkaa ni?” Mi Chiisu muli aa: ‘Ei.’ Mi Kayafaa dimi aa: ‘Seiyaa maavɛɛ naŋ yeema yɛ vɛlɛ? O tɛɛmbuu diola Mɛlɛkalaŋ!’ Okoŋ, mi nda kpou dimi aa: ‘Poo hoo nɔ mbo sɔla piɔmndo.’ Ma luaa Chiisu kpaŋnde, ma tufu ndu lɔluaŋ choo, ma kumbu ndu hɔlla, nduyɛ ma kuindi kuindi ndu, okoŋ ma dimul ndu aa: ‘Te wana suaa le Mɛlɛka wo ŋ cho ni, chɔmndɔ naa wana kundu numndo!’

 Mɛɛ paaleŋ le sɛ, ma kua a Chiisu o Laŋgbaa Kalaa Kilu Yamaŋ Nda lo, ma nyuna ndu vɛlɛ aa: “Num cho Po Mɛlɛkaa ni?” Mi Chiisu muli aa: ‘Nyapila chii dimi maa Po Mɛlɛkaa ya cho ni.’ Okoŋ, ma dimi maa o tɛɛmbuu diola Mɛlɛkalaŋ. Ma kua a ndu o Pɔŋtiɔɔ Paile lo, nduyɛ ndu wa masa bɛndu Luomaŋnda ni. Yɛɛ yɔŋnuŋ yɛ okoŋ kɔɔli? Ŋ yaasiaŋndɔ miŋ che.