Mɛɛ Chiisu miiŋguŋ choo choo, palɛi tɔ okoŋ kɔɔli, mi buɛiyaa nduaa sɔla nyina diandaa. O paale Pɛŋtikɔɔsileŋ choo wɔsi 33 o faŋaŋ Chiisu wo kɔɔli, mi waŋnda fula o fondaŋnda yɛ yɛlaŋ ma huŋ Chulusalɛm le bɔŋaŋndo biyɔɔ. Buɛiyaa Chiisu wa a wa le 120, ma chuuŋgiaŋ o chiɛi choo choo wo niŋ. O lepilɛ niŋ kpe, mi suɛi kɔndɔfili pum yɔŋnuŋ. Ma cha nyɔɔ maa leyiŋ, mbo huŋ chal wana o wana fee o lebol. Okoŋ, ma kandu suɛi o sɔɔŋ maŋgalaŋ yɛ yiɔɔŋ niŋ. Mi bɔɔluu bɛndoo pia chiɛiniŋ naŋ chaa hueiyii fuku fukuei wa hɔŋndo ni.

Mi wanaa fula o lɛŋii cheleŋnde niŋ ma huŋ Chulusalɛm nda tuɛi bɔɔluu koŋ, okoŋ ma nyaanuŋ o chiɛi koŋ le chɔɔ nyɛ wa yɔŋnɔŋndo wo. Mi kɔndɔfillo bii nda mɛɛ nda tuei buɛiyaa Chiisu wa sɔɔŋ maŋgalaŋ muŋ dimioo. Ma dimi aa: ‘Kalili waŋnda haa fula ni. Kɛ o cho sɔɔŋ naŋ maŋgalaŋ te nda cho muŋ dimioo le?’

Mi Pitɛ a kiilaa tuaa sim faŋgaa lachi. Mi Pitɛ dimul waŋnda mɛɛ nda looku Chiisu diyɔɔ yɛ, nduyɛ a mɛɛ Chɛhowa miŋgi ndu yoomu yɛ. Mi Pitɛ dimi aa: ‘Chiisu cho niŋ suŋ suŋ o choo choo niŋ o ba kɛndɛ  Mɛlɛkaa choo. Nduyɛ, ndu ke naa nyina diandaa o chuel naa buŋgɛiyo ni. Lelaŋ nya cho kaamaalaŋ ndaŋ chɔɔ, nduyɛ mi la wa naa tueiyɔɔ sɔɔŋ maŋgalaŋ muŋ dimioo ni.’

Mi nyɛ Pitɛ dimi hoo wo pilaŋ waŋnda kɔltaŋ, okoŋ ma nyuna aa: “Yɛɛnɛ naŋ nɔ yɛ miŋ tosa?” Mi Pitɛ dimul nda aa: ‘La mal yɔŋnda nyala wɔɔŋndaŋ, nduyɛ mi la sɔla yiŋɔɔ o diola Chiisu laŋ niŋ. Okoŋ, nya bɛɛ la cho nyina diandaa sɔla.’ O paale leŋ choo, waŋnda le 3,000 sɔla yiŋɔɔ ni. Chɔŋ niŋ a paale leŋ, mi buɛiyaa Chiisu wa kandu kuiyo tau o Chulusalɛm niŋ. A mala nyina diandaa, mi kiilaa Chiisu wa kila kundala bɔɔbɔɔ, le halikpeŋ ma pɛɛku buɛiya nyɛ o nyɛ Chiisu ndoo dimul nda le tosaa.