Mi Chɛhowa chua buŋgɛi aa: ‘Chaŋ cho lɛ wa le, nyɛ nɛiyaa cho lɛ wa le, naala cho lɛ wa le, nduyɛ piɔm cho lɛ wa le. I cho waŋnda mamɛmɛ o mamɛmɛ wɔɔsuu o hɔl fo. Sɔɔŋ wɔɔŋ yɔŋnuŋ paandu woŋ kpou, wana o wana cho lɛ muŋ loonɔŋ te.’

Mɛɛ Chɛhowa toosiaa Adam nda Ifi, mbo wou nda o kpeloo niŋ Idɛŋ le mi ndaa wa loŋ o kɔl nyulu niŋ. Finya nda cho o choo choo niŋndo kinɛi ndaa nɔ ni ma piɛi, nduyɛ mi ndaa pei chieeŋndo cha a chuauwaa ndaa. Mi Adam nda Ifi kɛɛ Chɛhowa diomndo tueiyɔɔ. Kɛ sabu Chɛhowaa siŋgaŋ te. O yauwo hoo niŋ, miŋ cha maa nyɛ o nyɛ Mɛlɛka ndoo chuel wanaa nduaa buŋgɛi, mbo tosa ndu. Masale ndɔleŋ le cho hunɔɔ a salalaŋ tau o chieeŋndo choo, a mɛɛ o chuel Ebilaham buŋgɛi yɛ.

O lo niŋ chobe mi Setana, nyinaa wɔɔŋnda a wanaa wɔɔŋnda kpou faŋaŋ o chieeŋndo choo. Wanaa cho wa yoomu wa kpou cho wa Chɛhowa piɛiyo. Naala cho lɛ wa le, piɔm cho lɛ wa le. Nduyɛ idii o idii te ŋ chɛŋ pɛ, ŋ cho nɔ yoomuaŋ tau, nduyɛ miŋ wa a kɔl kɛndɛ. Chieeŋndo  kpou cho simnɔŋ kpele hɛnɛkiɔɔ. Wana o wana cho nɔ nyɛdiaa kɛndɔɔ vɛlɛ a chiɛila kɛndɛlaŋ le luaŋ. Waŋnda cho nɔ kɛndɛi, nduyɛ dɛnɛ wɔɔŋndo ɔɔ sɔŋgɔla ve lɛ niŋ te. Visiaa nɔ lɛ niŋ isiooŋ le naa le, nduyɛ naa bɛɛ nɔ lɛ niŋ isiooŋ le nda le.

I wa niŋ bɔɔ suɛi nyaale bɛndu te Chɛhowa huŋ kandu pɛ wanaa vi wa miŋgioo yoomu. Ŋ cho wanaa vi o sindɔɔ niŋnda hunɔɔ demul, mɛɛ Ebɛl, Nuuwa, Ebilaham, Sela, Muuse, Lutu, Ɛsita, a Deeve cho nuaa yɛ. Ŋ cho hunɔɔ wallo tosa latulu naa ndaa le chieeŋndo kpou siiŋguuwo kpele hɛnɛkiɔɔ. Walta kɛndɛ kɛndɛlaŋ la cho hunɔɔ wa tau le tosaa teleŋ o teleŋ fee.

Chɛhowa yeema num ma wa loŋ. A cho hunɔɔ sina a ndu okɔɔ tau, mbo hiou bɛɛ pɛŋ a mɛɛ ŋ yiyaŋ yɛ. Ŋ hiounuŋ lachi a Chɛhowa sɔɔŋguuwo ikɛi lepaa o lepaa, suŋ suŋ, a le fɛɛŋ a fɛɛŋ!