Mi kiilaa tosa nyɛ Chiisu dimul nda wo. Ndu cho ni, le yooŋgu kɛndɔɔ dimioo ba o ba fee o chieeŋndo choo. A wɔsii 47 o faŋaŋ Chiisu wo kɔɔli, mi puaapiliaa viam Pɔɔl nda Banabaa le balɔɔ yooŋgu kɛndɛ teŋgeŋndo dimioo. Sɛmbɔɔ pila puaapiliaa ŋiɔɔŋnda haa ndaa nɔ ni le yooŋgu kɛndɔɔ dimioo. Nduyɛ ma balu yooŋgu kɛndɔɔ dimioo o tanda Eesiaa wo niŋ kpou, a o fondaŋnda cheleŋ, mɛɛ Dɛbi, Lista, a Akooniɔm cho nuaa yɛ.

Mi Pɔɔl nda Banabaa dimul wana o wana yooŋgu kɛndɔɔ. Wana sulaa ni, wana bala fondo ni, chuaambɔ ni, bɛndu ni. Mi wanaa bɔɔbɔɔ chɛl tonya cho a Kiliti okɔɔ wo. Sakiɔɔ Pɔlɔɔ wa masa ibuŋgaa o lɛŋnde Saipulɔɔ leŋ niŋ ni. Mɛɛ Pɔɔl nda Banabaa dimul ndu yooŋgu kɛndɔɔ, mi mandenɔ pilɛ kindiŋ le nda kuunaa. Kɛ mi Pɔɔl dimul mandenɔɔ hoo aa: ‘Chɛhowa cho num nyɛpalaa tuisi choo.’ O lepilɛ kpe mi mandenɔɔ hoo suma. Mɛɛ masa iBuŋgaa hoo che nyɛ yɔŋnɔŋndo, mbo simnuŋ wana laalaŋndo.

Mi Pɔɔl nda Banabaa dimi yooŋgu kɛndɔɔ ba o ba fee. A wa ndu dimioo o chiɛila waŋnda, o lɔɔlaŋ niŋ, o nɛi, a o chiɛila Chuuwa piɛi Mɛlɛka laŋ niŋ. Mɛɛ nda siŋgi po bɛvɛiyo o Lista niŋ, mi wanaa che kaamaa hoo wa yiyaŋ maa mɛlɛkaa nda cho ni, nduyɛ ma kindiŋ pɛŋ le nda piɛiyo. Kɛ mi Pɔɔl nda Banabaa kuuna nda. Ma dimul nda aa: ‘Mɛlɛka kinɛi nya nɔ ni mi la piɛi! Waŋnda chieeya naŋ cho ni maa nya.’ Kɛ mi Chuuwa apum huŋ ma dimul waŋnda le ma simul Pɔɔl. Mi waŋnda vii vii ndu a poutaŋ, ma lo ndu sasɔɔ haaa ma soli ndu chiee, ma mɛi ndu tendu piɔm. Kɛ Pɔɔl ndoo vi le! Nyɔɔ viu bɛɛ le, mi puaapiliaa huŋ mala ndu. Ma chua ndu, ma miiŋgu a ndu chiee. Okoŋ kɔɔli, mi Pɔɔl miiŋgu Aŋtiɔɔ.

O wɔsi 49 o faŋaŋ Chiisu wo kɔɔli, mi Pɔɔl kua vɛlɛ o fondaŋ cheleŋ le yooŋgu kɛndɔɔ dimioo. Mɛɛ Pɔɔl miiŋgu Eesiaa Mainɔ le puaapiliaa nduaa tofaa, mbo kɔ dimi vɛlɛ yooŋgu kɛndɔɔ o Yulopi niŋ. Mbo kua Atɛŋ, Ɛfisɔɔ, Filipai, Tɛsalonaika, a o fondaŋnda cheleŋ. Wanaa Pɔɔl ndoo kua yooŋgu  kɛndɔɔ dimioo latulu wa cho ni, Sailaa, Luku, a po feleŋgɔnɔ pilɛ diolaŋ aa Timoti. Mi ndaa tosa wallo diompilɛ le kundalaŋ kilaa, nduyɛ ma mala waŋnda le ma wa a kala poŋ o Mɛlɛka piɛiyo niŋ. Mi Pɔɔl chii wɔsioo opilɛ a tɛndaa tɛɛŋ o Kɔliŋ niŋ, nduyɛ o wa puaapiliaa yoomuaŋ lueiyo. O wa yooŋgu kɛndɔɔ dimioo, waŋnda pɛɛkoo, nduyɛ mbo wa yaulaŋ poonyiaa o kundala bɔɔbɔɔ lo. Wali Pɔɔl ndoo tosa le ndupila malaa wo wa tɛndiilaŋ toosiaa ni. Okoŋ kɔɔli, mi Pɔɔl miiŋgu vɛlɛ Aŋtiɔɔ.

A wɔsi 52 o faŋaŋ Chiisu wo kɔɔli, mi Pɔɔl kua vɛlɛ kɔla yaa ndɔlaŋ o Eesiaa Mainɔ niŋ le yooŋgu kɛndɔɔ dimioo. Mbo kua haaa Filipai ba luaŋndo, nduyɛ mbo kua vɛlɛ Kɔliŋ di. Mi Pɔɔl tosa wɔsila bɔɔbɔɔ o Ɛfisɔɔ niŋ. O wa waŋnda pɛɛkoo, wanaa wa a naalaŋ nda siŋgioo, vɛlɛ a kunda leKilisiɔŋndo malaa. Mi ndoo yɔŋgu sɔɔŋ lepaa o lepaa o chiɛi sukuu bɛndu wa loŋ ndo niŋ. Mi wanaa bɔɔbɔɔ yaŋ ndu nilaŋ, nduyɛ ma tosa siŋgaŋndaŋ o yoomula ndalaŋ niŋ. O mɛɛlulaŋ kpɔŋ, mɛɛ Pɔɔl dimi yooŋgu kɛndɔɔ o lɛŋii bɔɔbɔɔ niŋ, mbo miiŋguŋ Chulusalɛm.