Puaapilɛnɔ feleŋgɔnɔɔ Timoti wa o kundaa niŋ Lista ni. Kilikiinɔɔ finya ndɔ wa ni, nduyɛ Chuunɔɔ kala ndɔ wa ni. Kala ndɔ ndoo nɔ diolaŋ ni aa Yunisi, mama ndɔ aa Lɔɔsi. Nduyɛ wanaa ŋiɔɔŋnda haa pɛɛku Timoti a Chɛhowa okɔɔ ni, chɔŋ a teleŋ o wa o pɔmbɔ wo.

Mɛɛ Pɔɔl kuɛ kɔla diiŋ ndɔlaŋ yooŋgu kɛndɔɔ dimioo Lista, mbo cha maa Timoti kaala puaapiliaa tau, nduyɛ o wa a yeemɛi le nda malaa. Mi Pɔɔl dimul Timoti le ma wa balɔɔ yuŋgu kɛndɔɔ dimioo nda ndu. O hei niŋ, mi Pɔɔl pɛɛku Timoti le mbo chaa yooŋgu kɛndɔɔ dimioo vɛlɛ a waŋnda pɛɛkoo.

Nyina diandaa wa Pɔɔl nda Timoti malaa ba o ba ndaa kuɛ pɛ. Ichɔl pilɛ, mi poo dimul Pɔɔl o yilaŋndo niŋ le mbo kuɛ Masidooniaa mbo kɔ mala nda. Le hei, mi Pɔɔl, Timoti, Sailaa, a Luku kua Masidooniaa le yooŋgu kɛndɔɔ dimioo, nduyɛ ma kɔ kila kundalaŋ.

Chiee bɛndu Masidooniaŋnda wa Tɛsalonaika ni. Nduyɛ mi puaa a waŋ laanduaa bɔɔbɔɔ simnuŋ Kilisiɔŋnda. Kɛ Chuuwa apum wa Pɔɔl nda chaaŋaa nduaa paŋalaa. Le hei, ma chuuŋgiaŋ kunda, ma kɔ del puaapiliaa choo ma lo nda sasɔɔ haaa ma kua a nda o masaa waa lo. Ma wa deŋioo aa: ‘Yaamɔɔwa puaa haa cho le masale Luomaŋnda ni.’ Mɛɛ Pɔɔl nda Timoti sina maa yoomula ndalaŋ la cho o kpundɔɔ niŋ, ma nyaanuŋ Bɛluiya ichɔl koŋ.

Waŋnda Bɛluiya wa a yeemɛi tau le yooŋgu kɛndɔɔ tueiyɔɔ. Nduyɛ Kilikiiya ni, Chuuwa ni, ma simnuŋ wanaa laalaŋnda. Kɛ mɛɛ Chuuwa apum fula Tɛsalonaika ma huŋ mal sɔŋgɔɔ, mi Pɔɔl faŋaŋ loŋ, mbo kuaŋnuŋ Atɛŋ. Mi Timoti nda Sailaa lo Bɛluiya le puaapiliaa wa loŋ nda yoomuaŋ lueiyo. Nyɔɔ viu bɛɛ le, mi Pɔɔl miŋgi Timoti Tɛsalonaika pila, le mbo kɔ mala puaapiliaa ma biunuŋ nyɛpalaa kala kala nda wa nda tusioo choo wo. Okoŋ kɔɔli, mi Pɔɔl viam Timoti le mbo kɔ yil kundala bɔɔbɔɔ, nduyɛ mbo ke puaapiliaa kɔl dɛɛniaa.

 Mi Pɔɔl dimul Timoti aa: ‘Wanaa yeema Chɛhowa piɛiyo wa kinɛi, a cho nda nyɛpalaa tusi choo.’ Ma tusi Timoti nyɛpalaa choo, nduyɛ ma duau ndu o chiɛi manyumndo niŋ le laalaŋ ndɔɔ. Kɛ o wa a kɔl kɛndɛ le mɛɛ o sɔla dioo le loo Chɛhowa piɛiyo o laalaŋndo choo yɛ.

Mi Pɔɔl dimul Filipiaŋnda aa: ‘I cho Timoti viomɔɔ naa nya chua. O cho nya pɛɛku mɛɛ nya nɔ le kɔlaŋ o nɛi tonyaa choo yɛ, nduyɛ mbo pɛɛku nya mɛɛ nya nɔ le yooŋgu kɛndɔɔ dimioo yɛ.’ Pɔɔl ndoo nɔ tiindaŋndo o Timoti niŋ. Le wɔsila bɔɔbɔɔ, mi Pɔɔl nda Timoti tosa wallo diompilɛ o chaŋyɛi niŋ le Mɛlɛka.