Mɛɛ kiilanɔɔ Chɔŋ wa o biyɔɔ niŋ o lɛŋnde ibuŋgaleŋ niŋ Patimɔɔ, mi Chiisu chɔm ndu yilaŋuŋ yɛ yiɔɔŋ 16 a chilaŋ okɔɔ. Yilaŋndoŋ muŋ chɔm mɛɛ diola Chɛhowa laŋ la cho wa la diandaa yɛ, mɛɛ Masale ndɔleŋ le cho looku hunɔɔ yɛ, nduyɛ a mɛɛ hɛnaŋ ndɔɔ cho hunɔɔ tosaŋ o choo choo niŋ vɛlɛ a o chieeŋndo choo yɛ.

O yilaŋndoŋ muŋ niŋ ipilɛ, mi Chɔŋ cha Chɛhowa ichali o kpeŋgbei ndɔ leMasaa choo o choo choo niŋ, a bɛnduaa 24 ndu a balaa silɔ. Nduyɛ bɛnduaa haa wa a doviaŋ o nyɛla humbulaŋ niŋ vɛlɛ a mɔsilta lemasala ŋkooliilaŋ nda o lebol. Mi Chɔŋ cha nyɛ ŋualalɛiyo a taŋndaŋ fulaa o kpeŋgbei leMasaa hoo. Mi bɛnduaa 24 kaŋ baŋ wulaŋ Chɛhowa lachi, ma wa ndu piɛiyo. O yilaŋii cheleŋ niŋ, mi Chɔŋ cha faŋga bɛndoo fulaa o lekaa o lekaa niŋ, a isɔɔ o isɔɔ maŋgalaa ma wa Chɛhowa piɛiyo. Mi Saa Fɔŋndɔɔ, ndu cho yɛ Chiisu ni, sim nda lachi mbo yaa nda o pee mɛŋma yɔŋgu yoomoo waŋ. Okoŋ kɔɔli, mbo cha o yilaŋii cheleŋ niŋ mi Chiisu simnuŋ Masaa o choo choo niŋ, nduyɛ bɛnduaa 24 haa wa a ndu latulu o Masaleŋ choo. O yilaŋii cheleŋ niŋ, mi Chɔŋ cha Chiisu mbo wa sɔŋgɔɔ a tambalakaa, ndu cho yɛ Setana ni, a nyinaa nduaa wɔɔŋnda. Mi Chiisu soli nda o choo choo niŋ po, mbo viɔl nda o chieeŋndo choo.

 Okoŋ kɔɔli, mi Chɔŋ cha fotuei kɛndɛ kɛndɛ Saa Fɔŋndɔɔ a ŋwaŋ 144,000 isisi o Pembii Saayɔŋnde choo. Mbo cha vɛlɛ maalikɛinɔɔ balɔɔ o chieeŋndo choo, mbo wa waŋnda dimullo aa, la nɔ siooŋii Mɛlɛkɛi nduyɛ mi la piɛi ndu.

O yilaŋii cheleŋ niŋ, mi Chɔŋ cha chɔu Amakɛdɔŋndo. O chɔu koŋ niŋ, mi Chiisu nda puaa nduaa chɔuwa yam Setana nda chieeŋ ndɔɔ. O yilaŋii mɛɛlɛi niŋ, mi Chɔŋ cha mi diompilɔɔ luɛi o choo choo niŋ a o chieeŋndo choo. Mi Setana a chieeŋ ndɔɔ kpou sɔla tambei kpata kpata. Mi wana o wana o choo choo niŋ a o chieeŋndo choo chua diola Mɛlɛkalaŋ maa la cho la diandaa, nduyɛ ma wa ndu piɛiyo ndupilɛ kpe.