Chuaambɔ laandu buɛi pilɛ wa o Filipai niŋ, nyina wɔɔŋndo wa ndu kɔɔli. Chuaambɔɔ hoo nyina wɔɔŋndo ndoo soliŋ kpeku ni le sɔɔŋ waa lachioŋ dimioo. Nduyɛ o chuaambɔɔ hoo niŋ wanaa nduaa banaa ndaa sɔla kanioŋ tau ni. Mɛɛ Pɔɔl nda Sailaa hiŋ Filipai, le palɛi bɔɔbɔɔ, chuaambɔɔ hoo wa nda balɔɔ kɔɔli. Mi nyina wɔɔŋndo tosa mi chuaambɔɔ deŋi aa: “Buɛiyaa Mɛlɛka Bɛndoo puaa haa cho ni.” O mɛɛlulaŋ kpɔŋ, mi Pɔɔl dimul nyina wɔɔŋ koŋ aa: ‘O diola Chiisu laŋ niŋ, fula ndu niŋ!’ Mi nyina wɔɔŋ koŋ fula chuaambɔɔ niŋ po.

Mɛɛ chuaambɔɔ hoo wanaa nduaa banaa sina maa a cho lɛ kaniŋ bɔɔ sɔla o ndu niŋ te, ma tuulu kɔl tau tau. Ma bii Pɔɔl nda Sailaa, ma lo nda sasɔɔ haaa ma fuuluu a nda o toŋgo nda kɔɔsa waŋnda wo niŋ. Ma dimi aa: ‘Puaa haa cho sawaa tɛɛmbuuwo, nduyɛ ma tosa mi chioo yɔŋnuŋ wooluŋ wooluŋ!’ Mi wanaa kɔɔsa waŋnda wa dimi maa a lɔɔ Pɔɔl nda Sailaa, okoŋ ma wou nda o chiɛi manyumndo niŋ. Mi wana manda waŋnda o chiɛi manyumndo niŋndo kua a nda, mbo kɔ wou nda o fondaŋ nyumma kpiŋgbi bɛndoo o chiɛi manyumndo niŋ. Nduyɛ mbo wou nda o kpiɔɔ.

Mɛɛ Pɔɔl nda Sailaa wa chondoŋ solioo le Chɛhowa saŋgalaa, mi wanaa nda wa o chiɛi manyumndo niŋnda wa nda nilaŋ yaŋɔɔ. A ditɛɛŋndo kinɛi, o lepilɛ niŋ kpe, mi lɛŋndeŋ le nyiiya tau tau, mi chiɛi manyumndo kpou hiiluŋ. Mi diola chiɛi manyumndo la kumbiŋ, nduyɛ mi yɔlɔŋ nda yii wanaa wa o biyɔɔ niŋnda woŋ tiimbuŋ. Mi wana wa chiɛi manyumndo mandaa wo kua a kiltaŋ o chiɛi manyumndo niŋ, mbo cha maa diolaŋ kpou la cho la kumbiaa. Ndoo yiyaŋ ko maa wanaa wa o biyɔɔ niŋnda kpou nyaanuŋ. Le hei, mbo chua muɛi le diinɔŋndo.

A teleŋ koŋ kinɛi, mi Pɔɔl dimul ndu choo choo aa: ‘Diinuŋ te! Naa kpou cho nanuŋ!’ Mi wana wa chiɛi manyumndo mandaa wo luɛi naa nda wa wa a kiltaŋ, mbo beŋ Pɔɔl nda Sailaa wulaŋ. Mbo nyuna nda aa: “Yɛɛnɛ ya nɔ yɛ mi tosa le mi sɔla pioŋɔɔ?” Ma dimul ndu aa: ‘Num nya yuŋgu numndo, la nɔ mi la dɔu laalaŋndo o Chiisu niŋ.’ Okoŋ, mi Pɔɔl nda Sailaa pɛɛku nda a Chɛhowa okɔɔ. Nduyɛ, mi wana wa chiɛi manyumndo mandaa wo a yuŋgu ndɔɔ kpou sɔla yiŋɔɔ.