Mi Chɛhowa dimul Chekɔpu maa o cho ndu manda, mɛɛ o manda Ebilaham a Aase yɛ. Mi Chekɔpu kɔ chal o fondaŋ pilɛ diolaŋ aa Haluaŋ. Loŋ o lo ni mbo chua lanɔɔ, mi yuŋgu ndɔɔ kui, nduyɛ mbo sɔla nyɔɔŋ tau.

O mɛɛlulaŋ, mi Chɛhowa dimul Chekɔpu aa: ‘Miiŋgu o lɛŋnde numndeŋ niŋ.’ Okoŋ, mi Chekɔpu a yuŋgu ndɔɔ kandu kɔlaŋ o tiŋ vilɛi koŋ niŋ. Mɛɛ nda wa kɔlaŋ, mi waŋnda apum komal Chekɔpu o nɛi tɛɛŋ ma dimul ndu aa: ‘Iisɔ bɛ num cho num hunɔɔ lachi a puaa 400.’ Mi siooŋnde bii Chekɔpu tau. Mbo yiyaŋ maa Iisɔ yeema mbo tusi ndu nyɛpalaa choo, a yuŋgu ndɔɔ. Mbo piɛi o Chɛhowa lo aa: ‘Yandii mala ya bɛ nuu yɔŋ ya nyɛ o nyɛ le.’ Diimandɔɔ, mi Chekɔpu yɔŋ Iisɔ bɛ ndɔ saa, chuiŋnda, nauwa, nyɔɔmiaa, a sofɛliaa. Nduyɛ a wa tau.

Ichɔl koŋ, Chekɔpu wa ndupilɛ kpe, mbo cha maalikɛinɔɔ. Mi maalikɛinɔɔ saa ndu a sɔŋgɔɔ. A lo sɔŋgɔɔ haaa mi paaleŋ le sia. Mi che bɛɛ mi Chekɔpu yɔŋuluŋ o sɔŋgaa hoo niŋ, kɛ o vi ŋdial te. Mi maalikɛinɔɔ dimul ndu aa: ‘Mal la I kuaŋnuŋ.’ Kɛ mi Chekɔpu dimi aa: ‘I mel num te. Mɛɛ ma dɔu ya fɛŋ sala.’

O mɛɛlulaŋ kpɔŋ, mi maalikɛinɔɔ duau Chekɔpu sala. Mi Chekɔpu sina niko maa, Chɛhowa cho chɛlɔɔ mi Iisɔ tusi ndu nyɛpalaa choo le.

Idii koŋ, mɛɛ Chekɔpu tofaŋ lachi, Iisɔ wa landaŋ mbo cha ndu hunɔɔ a puaa 400. Mi Chekɔpu hiau yuŋgu ndɔɔ lachi, mbo kɔ del bɛ  ndɔ o labɛŋguniŋ haaa le ŋɔmmɛu. Mi Iisɔ huŋ Chekɔpu lachi a kiltaŋ, mbo kɔmaŋ ndu. Mi nda ŋiɔɔŋ kpou kandu chaŋndo, okoŋ ma miiŋgu o kɔl nyulu niŋ. O yiyaŋ numndo niŋ, vɛɛ kɔllo wa yɛ Chɛhowa a mɛɛ Chekɔpu ndoo bii suɛi hei yɛ?

Okoŋ kɔɔli, mi Iisɔ miiŋguŋ o ndu lo chiee, nduyɛ mi Chekɔpu bɛɛ kuaŋnuŋ o ndu lo. Chekɔpu ndoo nɔ puaa 12. Diola ndalaŋ aa: Lubɛŋ, Simiɔŋ, Livai, Chuda, Daŋ, Nafitali, Kaadi, Asiɛɛ, Isaaka, Sɛbulɔŋ, Choosɛ a Bɛŋchamiŋ. Mi Chɛhowa soliŋ puaa Chekɔpu wa opilɛ kpeku diolaŋ aa Choosɛ, le wanaa nduaa chiindiaa. A sina pa mɛɛ o tosa hei yɛ? Ŋ yaasiaŋndɔ.