Finya pilɛ wa o lɛŋnde Usileŋ niŋ, Chɛhowa ndoo piɛi ni. Diola ndɔlaŋ la wa ni aa Choobu. Ndoo nɔ nyɔɔŋ tau, nduyɛ waŋnda pila wa o yuŋgu ndɔɔ niŋ ni. Kɛndɛi pila ndoo nɔ ni. Mi ndoo mala wanaa bala fonduaa, waŋ laanduaa piaandaa ndaa vi wa, vɛlɛ a chuaambuaa viiya. Le mɛɛ Choobu ndoo tosa sɔɔŋ kɛndɔŋ yɛ, baa bahawɛi kɛ kɛ komal ndu le?

Setana wa Choobu mɛɛndaŋndo, kɛ Choobu ve o sina choo le. Mi Chɛhowa nyuna Setana aa: ‘A cho pa buɛi nuu Choobu chɔɔ? Wana o wana cho o chieeŋndo choo maa ndu le. Mbo yaŋ ya nilaŋ, nduyɛ mbo tosa nyɛ cho o kɛndɔɔ wo.’ Mi Setana muli aa: ‘Tonya, mi Choobu yaŋ num nilaŋ. Kanifuule, a cho ndu mandaa, nduyɛ ma duau ndu sala. A ke ndu yondolaŋ a visiaa. Kɛ te a poondiaa pɛ nyɔɔŋ muŋ ndu o ba kpou, o cho num malɔɔ piɛiyo.’ Mi Chɛhowa dimul Setana aa: ‘I mal num Choobu o ba. Kɛ I cho num chɛlɔɔ ma dii ndu le.’ Le yɛɛnɛ Chɛhowa mallɛ Choobu Setana o ba? Chɛhowa ndoo nɔ tiindaŋndo maa Choobu feŋaŋ niŋ o laalaŋ ndɔɔ choo le.

Mi Setana kandu Choobu nyɛpalaa tusioo choo o nɛila yɛ yɛlaŋ niŋ. O tasoo, mbo soliŋ Saabiaŋnda kpeku, ma kɔ chiimbuu nauwaa Choobu wa a sofɛliaa. Mi yiŋndeŋ le luam saa Choobu wa kpou. Mi kunda cheleŋ ma veelu nda aa Chaadiaŋnda, huŋ chiimbuu nyɔɔmiaa nduaa. Buɛiyaa nduaa wa chɔluaa haa mandaa wa, ma diu nda kpou. Okoŋ kɔɔli, mi nyɛpalaa wɔɔŋ wɔɔŋ cheleŋ komal ndu vɛlɛ. Chuauwaa Choobu wa lo kɔl kɛndɔɔ chiɛiniŋ, mi chiɛiyo komba nda choo, mi nda kpou wu. Mi hei tɛɛmbuu Choobu kɔllo tau. Kɛ o mel Chɛhowa piɛiyo le.

Setana ndoo yeema mbo chɔɔlu Choobu saaŋgiaa.  Le hei, mbo tosa mi pauve fula Choobu kɔɔleŋ kpou. Choobu wa bɔɔ o nyɛ nɛiyaa niŋ. Choobu ndoo sina le sabu sɔɔŋ muŋ kpou wa ndu yɔŋnɔŋndo wo le. Kɛ a koŋ kpou, mi Choobu hiau lachi a Chɛhowa piɛiyo. Mi Mɛlɛka cha sɔɔŋ muŋ kpou, nduyɛ mbo naŋ kɔl tau a Choobu.

Mi Setana soliŋ puaa a yaa kpeku le Choobu tɔɔndaŋndo. Ma dimul ndu aa: ‘A tosa hakioo a Mɛlɛka, nduyɛ ma wa ndu vioŋɔɔ. Lelaŋ Mɛlɛka cho num nyɛpalaa tusioo choo ni.’ Mi Choobu muli aa: ‘I tosa nyɛ o nyɛ wɔɔŋ te.’ Mi Choobu kandu pɛŋ yiyaŋndo maa Chɛhowa wa ndu nyɛpalaa tusioo choo ni. Le hei, mbo dimi maa Mɛlɛka ve ndu suɛi kɛndɛ tosal te.

Po feleŋgɔnɔɔ wa nda tɛɛŋ diolaŋ aa Ɛlihu. Nduyɛ o wa nda nilaŋ yaŋɔɔ nyɛkɛndɛi o suukaŋ nda wa wo. Okoŋ, mbo dimi aa: ‘Nya kpou nyɛ nya dimi wo cho tonya le. Chɛhowa cho o bɛndu mbo hiau naa. Nduyɛ ŋ sina sɔɔŋ kpou a ndu okɔɔ le. Fɛɛŋ bɛɛ o tosa dɛnɛ wɔɔŋndo le. O cho nyɛ o nyɛ fee chɔɔ, nduyɛ mbo mala waŋnda a bahawɛila ndalaŋ.’

Mi Chɛhowa suaa naa Choobu chua. Mbo nyuna ndu aa: ‘Kuɛɛnɛ ŋ wa yɛ teleŋ ya toosiaa choo choo a lɛŋndeŋ ndo? Le yɛɛ ŋ dimi yɛ maa I cho wana kɛndɛ le? Suɛi ŋ cho ni, kɛ a sina le sabu sɔɔŋ cho yɔŋnɔŋndo wo le.’ Mi Choobu chɛl biondɔŋ ndɔɔ, mbo dimi aa: ‘Nyɛ ya dimi wo cho tonya le. Tueiyɔɔ ko yaa tuei a num okɔɔ ni, kɛ suŋ suŋ niŋ, I sina wana ŋ cho wo kɛsɛ. Nyɛ o nyɛ cho ma bumba ndu tosa le. Yandii mal la haki le nyɛ ya dimi wo.’

Mɛɛ sɔɔŋ palaŋ muŋ kpou hiou Choobu choo, mi Chɛhowa tosa mbo miiŋgu kɛndiaa, nduyɛ mbo ke ndu nyɔɔŋ tau mbo hiau maa paandu. Mi Choobu viau achal, nduyɛ o wa a kɔl kɛndɛ. Mi Chɛhowa duau Choobu sala le mɛɛ o yaŋ ndu nilaŋ yɛ, mi che bɛɛ i wa i kala. A cho pa wa maa Choobu le hiouwɔɔ lachi a Chɛhowa piɛiyo mɛɛ mɛɛ sɔɔŋ palaŋ komal num?