Ma baŋ Isɔluɛiya le wali kala kalaa tosaa teleŋ nda wa o chɛleŋ niŋndo. Mi Chɛhowa viam Muuse nda Elɔŋ naa Felo chua a yooŋgoo hoo aa: ‘Mal wanaa niaa ma kuɛ o yondo pollo niŋ le ma kɔ piɛi ya loŋ.’ Mbo muli a yoŋga aa: ‘I buulaŋ a nyɛ o nyɛ Chɛhowa dimi wo le. Nduyɛ, I mel Isɔluɛiya ma kuɛ le.’ Okoŋ, mi Felo baŋ nda niko le wallo tosaa o kala kala mbo hiau maa paandu. Chɛhowa wa Felo nyɛ tosal fɛɛŋ bɛɛ ndoo puɛɛnuŋ te. A sina mɛɛ o wa ndi tosa yɛ? Mbo tusi waŋnda Ichipi Kpundɛla Tɔlaŋ choo. Mi Chɛhowa dimul Muuse aa: ‘Felo yeŋ ya lani le. Siɔdii dii, o cho wa isisi o Pioo Nail ikɛi. Kɔ loŋ ma kɔ dimul ndu maa le mɛɛ o kɛɛ wanaa niaa malɔɔ ma kuɛ yɛ, I cho tosa mi mɛŋndaŋ o Pioo Nail kpou ma simnuŋ koowaŋ.’ Mi Muuse tosa nyɛ Chɛhowa dimul ndu wo. Mbo kua naa Felo chua. Felo wa tofaa, mbo cha mi Elɔŋ luaa mɛŋndaŋ o Pioo Nail a tindaa, mi ma simnuŋ koowaŋ. Mi suuwa kpou o peelo wu. Mi mɛŋndaŋ ma kandu chuŋndo. Nduyɛ maa niŋ lɛ le kolɔɔ kposoŋ te. Kɛ a koŋ kpou, mi Felo kɛɛ kpooŋ le Isɔluɛiya malɔɔ ma kuɛ.

 Palɛi ŋɔmmɛu hiouwɔɔ okoŋ kɔɔli, mi Chɛhowa viam vɛlɛ Muuse naa Felo chua a yooŋgoo hoo aa: ‘Te a mel wanaa niaa ma kuɛ le, I cho tosa mi sɔlla pɛ Ichipi cha.’ Mɛɛ Elɔŋ heelu tinda ndɔɔ, mi sɔlla kumbu lɛŋndeŋ kpou. Mi waŋnda saaluŋ sɔlla o chiɛila ndalaŋ niŋ, o kpelela ndalaŋ choo, a o hɛŋgɛila ndalaŋ niŋ. Mi sɔlla tiu ba o ba fee o Ichipi niŋ. Mi Felo dimul Muuse maa o nyɔɔlu Chɛhowa le mbo faŋa nda kpundɔɔ hoo choo. Nduyɛ mbo dimi maa o cho Isɔluɛiya malɔɔ ma kuɛ. Le hei, mi Chɛhowa faŋa nda kpundɛ koŋ choo. Nduyɛ, mi waŋnda Ichipi diu diu sɔlaa vi kaŋ nda a bembelaŋ. Mi lɛŋnde Ichipileŋ kpou le fula chuŋ siouwɛiyo. Kɛ, mi Felo kɛɛ vɛlɛ le Isɔluɛiya malɔɔ ma kuɛ.

Okoŋ, mi Chɛhowa dimul Muuse aa: ‘Dimul Elɔŋ mbo lɔɔ lɛŋndeŋ a tinda ndɔɔ. Te o lɔɔ pɛ, chundoo cho simnɔŋ peŋgiaa.’ O lepilɛ niŋ kpe, mi peŋgiaa tiu ba o ba fee. Mi wanaa Felo wa apum dimul ndu aa: ‘Mɛlɛka pila kpundɔɔ hoo fula o ba ni.’ Kɛ a koŋ kpou, mi Felo kɛɛ vɛlɛ le Isɔluɛiya malɔɔ ma kuɛ.