Mɛɛ Isɔluɛiya mal Ichipi, paŋgoŋ ŋmuuŋ okoŋ kɔɔli, ma fuuluu o Pembii Sainaive, nduyɛ ma kila dɔɔŋgɔɔ loŋ. Mi Chɛhowa veelu Muuse o pembei choo, okoŋ mbo dimul ndu aa: ‘Ya piŋi Isɔluɛiya ni. Te Isɔluɛiya tuei ya diom pɛ, nduyɛ ma bii sawala nilaŋ, a cho simnɔŋ wanaa teŋgeŋnda le ya.’ Mi Muuse tual pembei, mbo miiŋgu naa Isɔluɛiya chua. Mbo kɔ dimul nda nyɛ Chɛhowa dimul ndu wo. Vɛɛ nda muli yɛ? Ma muli aa: ‘Nyɛ o nyɛ Chɛhowa dimul naa le tosaa, ŋ cho tosa.’

Mi Muuse hel vɛlɛ o pembei choo. Loŋ Chɛhowa dimul ndu ni aa: ‘O palɛi yaa bɛŋgu, I cho isɔɔ naa num chua. Lelaŋ, dimul waŋnda maa a huŋ o Pembii Sainaive choo le.’ Mi Muuse tual pembei mbo kɔ dimul Isɔluɛiya le ma bɛɛndiaŋ le Chɛhowa nilaŋ yaŋɔɔ.

O paale yaa ndɔleŋ choo, mi Isɔluɛiya cha nyɛ ŋualalɛiyo o pembei choo. Nduyɛ mi mɔmndo kumbu pembei kpu. Ma tuɛi taŋndaŋ deŋioo, nduyɛ mi buloo suaa. Okoŋ, mi Chɛhowa tual o pembei choo o leyiŋ. Mi siooŋii bɛnduei bii Isɔluɛiya kpou. Ma nyiiya kpa kpa. Mi pembei kpou nyiiya diki diki, nduyɛ mi kumnde kumbu ndi kpu. Mi bulu bɛndoo chɔɔlu vɛlɛ diomndo fula, okoŋ mi Mɛlɛka dimi aa: ‘Ya cho Chɛhowa ni. La piɛi mɛlɛka o mɛlɛka cheleŋ te.’

Mi Muuse miiŋgu vɛlɛ o pembei choo pila. Mi Chɛhowa ke ndu sawalaŋ le mi waŋnda sina mɛɛ nda nɔ ma piɛi ndu yɛ, vɛlɛ a mɛɛ nda nɔ ma tosa sɔɔŋ yɛ. Mi Muuse poonyiaa sawalaŋ ndaŋ, nduyɛ mbo kɔ veelul Isɔluɛiya diomndaŋ leniŋ. Okoŋ ma dimi aa: ‘Nyɛ o nyɛ Chɛhowa dimul naa le tosaa, ŋ cho tosa.’ A tonya, ma chuel Mɛlɛka buŋgɛi maa a cho ndu nyɛ tosal, kɛ baa mi ndaa lo pa o lediom?