Isɔluɛiya wa niŋ o yondo pollo niŋ le wɔsilaŋ 40. Chieeŋ bɛnduŋ muŋ nɔ kpaayaa woŋ, ma yam ŋ bɔɔbɔɔ a chɔuwo. Isɔluɛiya wa niŋ o dɔɔŋgɔɔ o lɛŋnde dɛŋgbɛleŋ Mowaabi, o Pioo Chɔɔdaŋ ba paaleŋ le chaŋ ndo. Teleŋndo wa niŋ hoo ni le mi ndaa luɛi o lɛŋnde Mɛlɛka ndoo dimi le nda kioo leŋ niŋ. Belaki wa masaa le lɛŋnde Mowaabi leŋ ni. Nduyɛ siooŋnde wa ndu maa Isɔluɛiya cho lɛŋnde ndɔleŋ poonda. Le hɛi, mbo veelu laŋunɔ pilɛ diolaŋ aa Belam, le mbo hiŋ Mowaabi mbo huŋ handu Isɔluɛiya sendioo choo.

Kɛ mi Chɛhowa dimul Belam aa: ‘Handu Isɔluɛiya sendioo choo le.’ Le hei mi Belam kɛɛ le kɔlaŋ. Kɛ mi Masaa Belaki veelu ndu vɛlɛ veelu diiŋ ndɔɔ. Nduyɛ mbo dimul ndu maa o cho ndu ke nyɛ o nyɛ o yeema pɛ. Kɛ a koŋ kpou, mi Belam kɛɛ le kɔlaŋ. Okoŋ mi Mɛlɛka dimul ndu aa: ‘A nɔla ma kuɛ. Kɛ nyɛ ya cho num dimul lo kinɛi ŋ dimul ndu ni.’

Mi Belam hel o sofɛlɛ ndɔɔ choo, mbo biyaŋ kɔlaŋ Mowaabi batouwo. Mbo kɛɛsiaa le Isɔluɛiya sendioo handɔɔ choo, mi che bɛɛ mi Chɛhowa dimul ndu maa o tosa keŋ te. Mi maalikɛinɔ Chɛhowaa fula ndu o hɔl o nɛi le yaa kpulukuu. Belam ve maalikɛinɔɔ chɔ le, kɛ sofɛlɛ ndɔɔ wa ndu chɔɔ. O tasela ndɔɔ, mɛɛ sofɛlɔɔ che maalikɛinɔɔ, mbo sei yondoo niŋ. O diiŋ ndɔɔ, mɛɛ sofɛlɔɔ che maalikɛinɔɔ, mbo kɔ holnuŋ pouwo le hiouwɔɔ, okoŋ mi Belam susa pelii nduɛi o pou koŋ. O mɛɛlulaŋ kpɔŋ, mɛɛ sofɛlɔɔ che maalikɛinɔɔ hoo vɛlɛ, mbo bɛwa o nɛi kɔllo. O teleŋnda yɛ yɛlaŋ ndaŋ bɛŋgu, Belam wa sofɛlɔɔ hoo lɔɔ a tinda wa ndu o ba wo.

Okoŋ kɔɔli, mi Chɛhowa tosa mi sofɛlɔɔ suaa. Mi sofɛlɔɔ nyuna Belam aa: ‘Le yɛɛ ŋ cho yɛ ya lɔɔ?’ Mi Belam muli aa: ‘A tosa mi simnuŋ diɔmndo. Te yaa nɔ pɛ muɛi nanuŋ, I wa num diyɔɔ.’ Mi sofɛlɔɔ dimul ndu aa: ‘Le wɔsila bɔɔbɔɔ a cho ya kpekoo soliŋndo. Kani bɛɛ I tosal num niŋ pa suɛi waa nuaa?’

Okoŋ, mi Chɛhowa tosa mi Belam cha maalikɛinɔɔ. Mi maalikɛinɔɔ dimul ndu aa: ‘Chɛhowa sila num maa num handu Isɔluɛiya sendioo choo le.’ Mi Belam dimi aa: ‘I tosa suɛi wɔɔŋnde. I cho miiŋgɔŋ o ya lo.’ Kɛ mi  maalikɛinɔɔ dimul ndu aa: ‘A nɔla ma kuɛ Mowaabi. Kɛ nyɛ Chɛhowa dimul numndo kinɛi ŋ nɔ ni ma dimi.’

Baa Belam ndoo pɛɛku pa isɔɔ o hei niŋ? Pɛ pɛ bɛɛ. Okoŋ kɔɔli, mi Belam kindiŋ vɛlɛ haaa le yaa le Isɔluɛiya sendioo handɔɔ choo. Kɛ teleŋ o teleŋ o kindiŋ pɛ le nda sendioo handɔɔ choo, Chɛhowa tosa ndu o dɔu Isɔluɛiya sɔla. O Mɛɛlulaŋ kpɔŋ, mi Isɔluɛiya kɔ del Mowaabi choo a sɔŋgɔɔ, nduyɛ ma dii Belam. Baa ndoo ve suɛi sɔvɛ le mi Belam ndoo yaŋ Chɛhowa nilaŋ o kandɔŋndo le?