Isɔluɛinɔ pilɛ wa diolaŋ aa Ɛlikana. Ndoo nɔ laanduaa a ŋiɔɔŋ. Hoo diolaŋ aa Hana, opilɔɔ aa Pɛninaa. Kɛ Hana ndoo hiou kaala. Le mɛɛ Pɛninaa ndoo nɔ chuauwa tau yɛ, teleŋ o teleŋ o wa Hana mamɔɔ, kanifuule Hana ndoo vilu chua le. Iwɔsi o iwɔsi, mi Ɛlikana ndoo kuɛ nda yuŋgu ndɔɔ o tɛndii Mɛlɛkaa Silɔɔ le ndu piɛiyo. Mɛɛ nda kuɛ loŋ teleŋ pilɛ, mi Ɛlikana cha maa laa ndɔ kaalaa cho a kɔl tambɛiyo. Mbo dimi aa: ‘Yandii, chaŋ te Hana. A nɔ ya. Nduyɛ I kaala num.’

Okoŋ kɔɔli, mi Hana kua mbo kɔ kandu piɛileŋ. O wa Chɛhowa nyɔɔloo le mbo mala ndu, mbo wa chaŋndo. Mbo dimi aa: ‘Chɛhowa, te a tosa pɛ mi velu poo, I cho num ndu ke. Nduyɛ, o cho wa wallo tosaa le num haaa a yoomu ndɔɔ mɛɛlulaŋ.’

Mɛɛ Ila Masa Wanaa Soliaa Lasalaa che Hana chaŋndo, mbo yiyaŋ maa muɛiyaŋ o kol ni. Mi Hana dimul ndu aa: ‘O cho mamuɛi le ya kol te fallo. Bahawɛi kala kalaa cho ya choo, nduyɛ a ndu okɔɔ ya cho suɛi o Chɛhowa lo ni.’ Mɛɛ Ila sina maa o benduŋ a Hana, mbo dimul ndu aa: ‘Maa Chɛhowa ke num nyɛ ŋ yeema wo fɔ!’ Mi Hana sinaŋ nyɛkɛndɛi. Okoŋ mbo kuaŋnuŋ. O fuuluu bɛɛ wɔsi le, mbo vialu poo, mbo ke ndu diolaŋ aa Saamiɛɛ. Yiyaŋndɔ mɛɛ kpɛ Hana wa a kɔl kɛndɛ yɛ!

 Hana puɛɛnuŋ a buŋgɛi o chuel Chɛhowa ve le. Dimioo nuaa o soli Saamiɛɛ mɛɛleŋ o sondo, mbo kua a ndu o tɛndii Mɛlɛkaa le mbo wa wallo loŋ. Mi Hana dimul Ila aa: ‘Po ya wa piɛileŋ le ndu wo cho hoo ni. Chɛhowa nɔ ndu ni. O cho wa wallo naŋ haaa a yoomu ndɔɔ mɛɛlulaŋ.’ Iwɔsi o iwɔsi, mi Ɛlikana nda Hana ndaa kuɛ Saamiɛɛ yilɔɔ. Nduyɛ mi ndaa yoo ndu doma sɛnɛiyo le wounɔŋndo. Mi Chɛhowa tosa mi Hana vialu puaa cheleŋ, a yaa a waŋ laanduaa a ŋiɔɔŋ.