Mɛɛ teleŋ tiŋ hiou, mi Isɔluɛiya mal vɛlɛ Chɛhowa piɛiyo ma muliŋ mɛlɛkaa lachoowaa sooluuwo. Le wɔsilaŋ la ŋɔmmɛu Midianatiiya wa chɔluaa Isɔluɛiya chiimbuuwo, nduyɛ ma tɛɛmbuu tɔlɔɔla ndalaŋ. O buululaŋ niŋ a o pemboŋ tɛɛŋ Isɔluɛiya ndaa viaŋnuŋ Midianatiiya ni. Le hei, ma nyɔɔlu Chɛhowa le mbo piŋi nda. Okoŋ mi Chɛhowa yɔŋ maalikɛinɔɔ o po feleŋgɔnɔ pilɛ lo diolaŋ aa Kidiɔŋ. Mi maalikɛinɔɔ dimul ndu aa: ‘Chɛhowa hɛli num le ma simnuŋ wana chɔu kpaaya bɛndoo.’ Mi Kidiɔŋ nyuna ndu aa: ‘Vɛɛ ya nɔla yɛ mi piŋi Isɔluɛi? I cho nyɛ o nyɛ le.’

Vɛɛ Kidiɔŋ looku yɛ sina maa ndu Chɛhowa hɛli ni? Mbo kɛsi fuŋndeŋ lɛŋ, okoŋ mbo dimul Chɛhowa aa: ‘Siɔdii dii, te I che pɛ fuŋndeŋ le livɛi a mɔmndo, kɛ mi lɛŋndeŋ le wa le vesɛi, mɛɛ I sina dɔɔ maa a yeema ya mi piŋi Isɔluɛi.’ Diimandɔɔ, fuŋndeŋ le wa le livɛi a mɔmndo, kɛ lɛŋndeŋ le wa le vesɛi sɛɛŋ. Kɛ mi Kidiɔŋ dimul vɛlɛ Mɛlɛka le mbo tosa mi fuŋndeŋ le wa le vesɛi diimandɔɔ pilɔɔ, mi lɛŋndeŋ le wa le livɛi. Mɛɛ keŋ i yɔŋnuŋ, mi Kidiɔŋ sina kɛsɛ maa ndu Chɛhowa hɛli ni. Okoŋ, mbo chuuŋgiaa puaa nduaa chɔuwa le ma kɔ sɔŋga Midianatiiya.

 Mi Chɛhowa dimul Kidiɔŋ aa: ‘I cho tosa mi Isɔluɛiya tiu Midianatiiya ba. Kɛ le mɛɛ ŋ nɔ puaa chɔuwa tau yɛ, mi la yiyaŋ dɔɔ maa nyapila tiu nda ba ni. Lelaŋ, wana o wana sina pɛ maa siooŋnde cho ndu, dimul ndu o miiŋgu o ndu lo.’ Okoŋ, mi puaa chɔuwa 22,000 miiŋgu o nda lo, mbo lo puaa chɔuwa 10,000. Mi Chɛhowa dimul ndu vɛlɛ aa: ‘Puaa chɔuwa haa cho wɔ bɔɔ. Kɔ a nda o peelo, ma dimul nda le ma kol mɛŋndaŋ. Wanaa cho wa kolɔɔ ma wa mɛɛndaŋndo le yaamɔɔwaa ndaa wa, nda kinɛi ŋ kɔ ni.’ Puaa chɔuwa 300 kinɛi wa mɛɛndaŋndo ni mɛɛ nda wa kolɔɔ. Mi Chɛhowa dimul Kidiɔŋ maa puaa chɔuwa haa kinɛi cho Midianatiiya yomɔɔ ni. Nduyɛ puaa chɔuwaa Midianatiiya wa 135,000.

Ichɔl koŋ, mi Chɛhowa dimul Kidiɔŋ aa: ‘Teleŋndo cho hoo ni le ma chiŋalaŋ Midianatiiya a sɔŋgɔɔ!’ Mi Kidiɔŋ ke puaa nduaa chɔuwa bululaŋ a kpɛɛnɛŋ puuloŋ, nduyɛ a tɛŋgɛla leyiŋndaŋ la viaŋaa leniŋ. Mbo dimul nda aa: ‘La tofa ya, mi la tosa mɛɛ ya cho tosaa yɛ.’ Mi Kidiɔŋ hɔŋ bulu ndɔɔ, mbo viɔl kpɛɛnɛi puuluei, mbo hiŋ tɛŋgɛ leyiŋndo, okoŋ mbo deŋi choo choo aa: ‘Muɛi faŋii Chɛhowa ve nda Kidiɔŋ!’ Mi puaa nduaa chɔuwa 300 tosa mɛɛ o tosa yɛ. Mi siooŋnde bii Midianatiiya ma nyaanuŋ ba o ba fee. A lo kiltaŋ, mi ndapila mululaŋ a sɔŋgɔɔ. Mi Chɛhowa mala vɛlɛ Isɔluɛiya, ma tiu yaamɔɔwaa ndaa ba.