Mi Chɛhowa dimul Saamiɛɛ aa: ‘Kɔ o chiɛi Chɛɛse wo. Puaa nduaa opilɛ cho wa masa diiŋ ndɔɔ le Isɔluɛi ni.’ Okoŋ, mi Saamiɛɛ kua o chiɛi Chɛɛse wo. Mɛɛ o che po tase Chɛɛse wo, mbo yiyaŋ aa: ‘Wana che pɛ maa po koŋ cho hoo ni.’ Kɛ mi Chɛhowa dimul Saamiɛɛ maa o cho ndu le cho koŋ te. Mi Chɛhowa dimi aa: ‘O cho ko mɛɛ waŋndo cho o kɔɔ yɛ le ya cha le, kɛ nyɛ cho ndu o kɔllo niŋndo bɛɛ mi che.’

Mi Chɛɛse huŋ vɛlɛ a puaa nduaa a ŋɔmpum o Saamiɛɛ lo. Kɛ mi Saamiɛɛ dimi aa: ‘Haa kpou, Chɛhowa hɛli wana o wana le. Baa a nɔ puaa cheleŋ?’ Mi Chɛɛse muli aa: ‘Ei! Pɔmbɔ nda cho diolaŋ aa Deeve. O cho saa niaa ikɛi yondoo niŋ.’ Mɛɛ Deeve hiŋ mi Chɛhowa dimul Saamiɛɛ aa: ‘Ndu kpeekpei cho hoo ni!’ Mi Saamiɛɛ tala Deeve chuɛiyaŋ o lebol le ndu pɔyaa maa ndu cho wa masa diiŋ ndɔɔ le Isɔluɛi ni.

Mɛɛ teleŋ tiŋ hiou, Isɔluɛiya wa sɔŋgaa nda Filitiaŋnda. Nduyɛ Filitiaŋnda ndaa nɔ kuubanɔ chɔuwo diolaŋ aa Koolaya. Lepaa o lepaa, Koolaya wa Isɔluɛiya mamɔɔ. O wa deŋioo choo choo aa: ‘La viom wana pɔnɔ nya tiindaŋndo miŋ sɔŋga naa ndu. Te o tiu ya ba pɛ, ŋ simnuŋ chiaa le nya. Kɛ te ya tiu ndu ba pɛ, la simnuŋ chiaa le naa.’

Deeve ndoo nɔ bɛnduaa, nduyɛ puaa chɔuwa nda wa ni. Mbo yoo nda nyɛdiaa o dɔɔŋgɔ puaa chɔuwaa Isɔluɛiya. Mɛɛ o tuei nyɛ Koolaya dimi wo, mbo dimi aa: ‘I cho sɔŋga a ndu!’ Kɛ mi Masaa Sɔɔ dimul ndu aa: ‘A dɔɔnaŋ bɔɔ le hei.’ Mi Deeve muli aa: ‘Chɛhowa cho ya mala.’

 Mɛɛ Sɔɔ wa kindiŋndo le Deeve wolɔɔla ndɔla chɔulaŋ wouwo, mi Deeve dimi aa: ‘I nɔla mi sɔŋga a wolɔɔlaŋ ndaŋ te.’ Mi Deeve chua faanda ndɔɔ mbo kua o peelo. Mbo kɔ hɛli pouta kpɔlɔkɛilaŋ la ŋuɛɛnu, mbo wou laŋ o bɔlɔ ndɔɔ niŋ. Okoŋ, mbo kuel Koolaya a kiltaŋ. Mi Koolaya deŋi choo choo aa: ‘Num poombɔ pɔmbɔ koŋ, huŋ ma komal la. I cho tosa mi youwa a visiaa de dialuŋ num vilɛiyoŋ.’ Kɛ siooŋii ve Deeve le. Mi Deeve bɛɛ deŋi aa: ‘Num cho hunɔɔ naa ya chua a muɛi faŋnde vɛlɛ a ballo, kɛ ya I cho kɔlaŋ naa num chua o diola Chɛhowa laŋ niŋ. O cho a naa le ŋ cho sɔŋgaa le, kɛ a Mɛlɛka ŋ cho sɔŋgaa ni. Wanaa cho naŋ nda kpou cho chɔ maa Chɛhowa nɔ kpaayaa mbo hiau muɛi faŋnde a ballo. Mɛlɛka cho tosa miŋ diu diu nya kpou.’

Mi Deeve soli pouwo o bɔlɔɔ niŋ, mbo wou o faanda ndɔɔ niŋ. Mbo hiŋ ndu a kpaaya ndɔɔ kpou, mbo mal ndu waŋ. A mala Chɛhowaa, mi pouwo kɔ viɔ Koolaya tendei, okoŋ mbo del lɛŋ mbo wu. Mi Filitiaŋnda nyaanuŋ le ma piŋi yoomula ndalaŋ. Baa a nɔ pa tiindaŋndo o Chɛhowa niŋ maa Deeve?