Mɛɛ Deeve dii Koolaya, mi Masaa Sɔɔ handu ndu puaa nduaa chɔuwa kpou bolleŋ. Mi Deeve yam chɔula bɔɔbɔɔ, nduyɛ mi tɔɔ ndɔɔ tiu silɔ. Teleŋ o teleŋ Deeve ndoo fula pɛ o chɔuwo, waŋ laanduaa fula a yolaŋ, nduyɛ a wa chondoŋ solioo. Okoŋ a dimi aa: ‘Sɔɔ dii yaamɔɔwa o waalaŋ niŋ. Kɛ Deeve ndu dii nda waalaŋ o tɔ tɔlaŋ niŋ!’ Le hei, mi Sɔɔ kandu Deeve paŋalaa, nduyɛ mbo yeema le ndu diyɔɔ.

Deeve ndoo chaa bɔɔ towaa lɔɔ. Paale pilɛ, mɛɛ Deeve wa towaa lɔɔ le Sɔɔ, mi Sɔɔ wuu ballo le mbo kɔ chuku Deeve. Mi Deeve biamnuŋ, okoŋ mi ballo kɔ baŋnuŋ o chiɛiyo. Okoŋ kɔɔli, mi Sɔɔ kindiŋ teleŋnda bɔɔbɔɔ le Deeve diyɔɔ. O mɛɛlulaŋ kpɔŋ, mi Deeve nyaanuŋ mbo kɔ vioŋnuŋ o yondo pollo niŋ.

Mi Sɔɔ chua puaa chɔuwa 3,000 ma kua Deeve nuuviaa. Mɛɛ nda kuɛ, ma kɔ luɛi o buulu Deeve nda puaa nduaa wa a viaŋnaŋndo niŋ. Mi puaa Deeve wa dimul  ndu toolo toolo aa: ‘Fondaa ŋ sɔla hoo ni le Sɔɔ diyɔɔ.’ Mi Deeve kua sɔɔ sɔɔ naa Sɔɔ chua, mbo kɔ kiolu bɔɔle doma ndɔ lemasaa, kɛ Sɔɔ ve o sina choo le. Okoŋ kɔɔli, mi Deeve tambu kɔl le nyɛ o tosa koŋ ndo. Mbo yiyaŋ maa o chɔm lebɛɛ le masa Chɛhowa pɔya wo le. O chɛl mi puaa nduaa yɔŋ Sɔɔ nyɛ o nyɛ le. Nduyɛ pɛŋ, mi Deeve veelu Sɔɔ mbo dimul ndu maa teleŋ ndoo sɔla fondaa le ndu diyɔɔ wo, ndoo nɔla mbo dii ndu. Kɛ baa mi Sɔɔ siŋga pa yiyaŋ ndɔɔ a Deeve okɔɔ?

Pɛ pɛ bɛɛ. Sɔɔ wa tuŋ hiouwɔɔ lachi a Deeve nuuviaa le ndu diyɔɔ. Ichɔl pilɛ, mi Deeve nda tooŋgoo ndɔ Abisiaa, kua sɔɔ sɔɔ o dɔɔŋgɔ Sɔɔ wa nda puaa nduaa wo. Abina, wana wa Sɔɔ mandaa wo bɛɛ waŋnuŋ o luaŋ. Mi Abisiaa dimul Deeve aa: ‘Fondaa naŋ sɔla hoo ni. Chɛl mi dii ndu.’ Mi Deeve dimul ndu aa: ‘Chɛhowa pila cho Sɔɔ biyɔɔ mɛɛ o bɛnda yɛ. Ŋ chua bal ndɔɔ kinɛi a nyɛ ndɔ kolaa miŋ kuɛŋnuŋ.’

Mi Deeve kɔ hel o pembei choo, o dɔɔŋgɔ Sɔɔ nda puaa nduaa wa wo ikɛi. Mbo deŋi choo choo aa: ‘Abina, le yɛɛnɛ a manda masanɔ numndo le? Kuɛɛnɛ nyɛ ndɔ kolaa a bal ndɔɔ cho yɛ?’ Mi Sɔɔ sina maa Deeve wa suɛi ni, okoŋ mbo dimi aa: ‘Num oo nɔla ma dii ya, kɛ a tosa lende le. I sina niŋ kɛsɛ maa num cho wa masa diiŋ ndɔɔ le Isɔluɛi ni.’ Mi Sɔɔ miiŋguŋ o ndu lo. Kɛ o cho waŋnda o yuŋgu Sɔɔ wo niŋ kpou le ndaa tul Deeve leyɛ le.