Teleŋ Sɔlɔmɔŋ wa Chɛhowa piɛiyo wo, kɔl nyuloo wa o Isɔluɛi niŋ. Kɛ mi Sɔlɔmɔŋ chua laanduaa tau fulaa o lɛŋii cheleŋnde niŋ, nduyɛ piɔmnda laanduaa haa ndaa sooluu ni. O pɔmpɔmbɔ, mi Sɔlɔmɔŋ siŋgaŋ, nduyɛ mi ndu bɛɛ kandu piɔmnda sooluuwo. Mi Chɛhowa tuulu kɔl. Mbo dimul Sɔlɔmɔŋ aa: ‘I cho masaleŋ poonda yuŋgu numndo o ba, mi piɔu leŋ sala tiɔɔŋ. Tanda waŋnda cho tau wo ya cho buɛiyaa numnda opilɛ ke ni. Nduyɛ mi ke yuŋgu numndo tanda waŋnda cho a bɔɔ le wo.’

Mi Chɛhowa chɔm vɛlɛ kɛɛsiaa ndɔɔ kpendekele o nɛi cheleŋ choo. Buɛi Sɔlɔmɔŋ ndo Chɛlobowam wa kɔlaŋ inɛ, mbo komal wana suaa le Mɛlɛka wo Ahicha o nɛi tɛɛŋ. Mi Ahicha soliŋ doma ndɔɔ lekɔɔ, mbo kili kili ndu pɛŋgɔŋ 12. Mbo dimul Chɛlobowam aa: ‘Chɛhowa cho masaleŋ poonda yuŋgu Sɔlɔmɔŋ ndo o ba, mbo piɔu leŋ sala tiɔɔŋ. Chua pɛŋgɛŋ tɔ domaa hoo, kanifuule num cho wa masaa kaala tɔ laŋ choo Isɔluɛi ni.’ Mɛɛ Masaa Sɔlɔmɔŋ tuei a hei okɔɔ, mbo yeema Chɛlobowam diyɔɔ! Le hei, mi Chɛlobowam nyaanuŋ Ichipi. Mɛɛ teleŋ tiŋ hiou, mi Sɔlɔmɔŋ wu. Okoŋ, mi po ndɔɔ Luehobowam simnuŋ masaa. Mi Chɛlobowam yiyaŋ niko maa teleŋndo cho hoo ni le mi ndu bɛɛ miiŋgu Isɔluɛi.

Mi bɛnduaa o Isɔluɛi niŋ dimul Luehobowam aa: ‘Te a bii pɛ waŋnda nyɛkɛndɛi, a cho num faŋaŋ kɔɔli le.’ Kɛ mi chaaŋaa  nduaa feleŋguaa dimul ndu aa: ‘A nɔ ma bii waŋnda ŋuasu ŋuasu! Dimul nda ma tosa wallo mbo hiou maa paandu!’ Mi Luehobowam tual sila chaaŋaa nduaa yɔŋgu ndu wo kɔɔli. O wa waŋnda biyɔɔ ŋuasu ŋuasu, nduyɛ mi hei tosa ma simul ndu. Mi waŋnda siiŋguu Chɛlobowam masaa le kaala tɔ laŋ. Kaala tɔ laŋ ndaŋ ndaa veelu ni aa masaleŋ Isɔluɛi. Kaala tiɔɔŋ nda laa lo laŋ ndaa veelu ni aa masaleŋ Chuda. Nduyɛ ma hiau lachi a Luehobowam diomndo tueiyɔɔ. Mi kaala 12 o Isɔluɛi niŋ la piɔunuŋ tɛɛŋ.

Chɛlobowam ndoo yeema mi wanaa o wa masaleŋ tosaa choo wa ndaa kuɛ Mɛlɛka piɛiyo Chulusalɛm te, kanifuule loŋ Luehobowam wa o masaleŋ choo ni. A sina le sabu koŋ? Kanifuule, Chɛlobowam wa siooŋnde maa wanaa nduaa cho ndu kɛɛ ma muliŋ Luehobowam kɔɔli. Le hei, mbo toosiaa nauwaa ŋkooliiya a ŋiɔɔŋ mbo dimul wanaa nduaa aa: ‘Chulusalɛm cho bɔɔ levil a naa. Ŋ piɛinuŋ Mɛlɛka nanuŋ.’ Mi waŋnda kandu nauwaa ŋkooliiya haa sooluuwo, ma puɛɛnuŋ vɛlɛ a Chɛhowa okɔɔ.