BUŊGƐI 1
Chɔŋ a Kandɔŋ Chieeŋndo Mbo Huŋ Bii a Mɛŋma Koŋgiaŋ
Vɛɛ choo choo a chieeŋndo looku yɛ hunɔɔ? Vɛɛ paaleŋ, paŋgei, looŋ, vɛlɛa nyɛm cheleŋndoŋ kpou o chieeŋndo choo ŋ looku yɛ hunɔɔ? Baabuiyo yɔŋgu muli tonyaa maa Mɛlɛka toosiaa muŋ kpede ni. Lelaŋ, yau naa bundɔŋ Baabuiyo hoo kandu suɛi a nyɛm Mɛlɛka toosiaa woŋ okɔɔ.
A mɛɛ naŋ pɛɛku yɛ, maalikɛiya fɛŋ Mɛlɛka toosiaa o choo choo niŋ. Ŋ chi nda le. O inyinaya nda cho ni. Kɛ chieeŋndo ndu, le waŋnda chieeya Mɛlɛka toosiaa ndu ni. Lelaŋ mi Mɛlɛka toosiaa wana pɔnɔ tasoo diolaŋ Adama, a wana lanɔ tasoo diolaŋ Ifi okoŋ mbo duau nda o kpele kɛndɔɔ niŋ. Kɛ a tuii Mɛlɛka diom te. Le hei, mi yoomu fafɛɛŋndo hialuŋ nda.
Mɛɛ o dimi niŋ, chɔŋ a toosiaŋ Adamaa tei mbo huŋ bii a mɛŋma koŋgima bɛnduaŋ, wɔsilaŋ 1,656 la hiou ni. O boondii keŋ niŋ, wanaa dɛnɛwɔɔŋnda wa achal tau. O choo choo niŋ, ŋwaŋ wa loŋ o inyinaya a wana ndoo nɔla ma che lea. Nda cho Setana a nyinaa nduaa wɔɔŋnda ni. Keŋ a wanaa wɔɔŋaa cheleŋ wa o lɛŋndeŋ choo. Waŋ piaanduaa ndaa nɔ yoomuma labɛɛlaŋnda apum wa vɛlɛ a boondii keŋ. O koŋ niŋ kpou, wanaa kɛndiaa wa vɛlɛ o chieeŋndo choo. Nda cho Ebɛl, Inɔki a Nuuwa ni. O Buŋgɛi TASEI hei niŋ, ŋ cho hunɔɔ sina a waŋnda haa kpou okɔɔ, nduyɛ, a nyɛ o nyɛ yɔŋnuŋ o boondii keŋ niŋ.
O BUŊGƐI HEI NIŊ
BUNDƐI 1
Mɛlɛka Kandu Nyɔŋ Toosiaa
Bundɛi a teleŋ nyɔɔŋ kandu toosiaŋndo wo okɔɔ cho tɛtɛlɛ le biyɔɔ bila—a chuaambuaa bɛɛ.
BUNDƐI 2
Kpele Kɛndɔɔ
A mɛɛ yau Gɛnɛsi wo dimi yɛ, fonda teŋgeŋ Mɛlɛka toosiaa wo kpeloo Idɛŋ wa ni. Mɛlɛka yeema mi chieeŋndo kpou wa maa kpele kɛndɛ koŋ.
BUNDƐI 3
Wana Pɔnɔɔ a Wana Lanɔ Tasoo
Mɛɛ Mɛlɛka toosiaa Adam nda Ifi mbo mal nda o kpeloo Idɛŋ niŋ. Ma simnuŋ pɔnɔɔ a lanɔ tasoo.
BUNDƐI 4
Le Yɛɛ Chiee Ndaa Hɛluŋ yɛ Nda
Yau Gɛnɛsi wo o Baabuiyo niŋ dimul naa mɛɛ kpele hɛnɛkɛ tasoo looku hiɔlɔŋ yɛ.
BUNDƐI 5
Mɛɛ Nyɛpalaa Kanduŋ Yɛ
Mi bahawɛila bɔɔbɔɔ komal Adama nda Ifi fula ndaa o kpeloo Idɛŋ niŋ. Te ndaa diikuŋ dɔɔ Mɛlɛka pɛ, a wa yoomoo tueiyɔɔ yeela nda chuauwaa ndaa.
BUNDƐI 6
Po Kɛndɔɔ, a O Wɔɔŋndo
Bundɛi Keŋ nda Ebɛ le o yau Gɛnɛsi wo niŋ chɔm naa mɛɛ naŋ nɛŋi Mɛlɛka kɔllɛ, vɛlɛ a kaa naŋ nɔ miŋ siŋga wo yɔŋi i hiou lɔɔ.
BUNDƐI 7
Wana Pɔnɔ Kɔl Sikpaa
Taamaselii Inɔki wo chɔm maa a nɔla ma tosa o kɛndɔɔ o yɔŋ bɛɛ mi wanaa cho num a balaa wa wa sɔɔŋ wɔɔŋndoŋ tosaa.
BUNDƐI 8
Kuubaa Dialuŋ Kalaa
Gɛnɛsi bolle 6 dimul naa a kuubaa dialuŋ kalaa wa waŋnda nyɛpalaa tuisioo choo wa okɔɔ. Kuubaa dialuŋ kalaa kaŋ, mi ndaa veelu nda aa Nɛfilimnda, chuauwaa maalikiɛyaa chɛŋ choo choo ma huŋ wa maa ŋwaŋnda chiee wa nda wa ni.
BUNDƐI 9
Nuuwa Taŋgul Dɛndɔɔ
Nuuwa nda yuŋgu ndɔɔ sɔla pioŋɔɔ o Mɛŋma Koŋgi Bɛnduaŋ le mɛɛ nda diikuŋ Mɛlɛka yɛ mi che bɛɛ acheleŋnda yeŋ lani le.
BUNDƐI 10
Mɛŋma Bɛnduaŋ
Waŋnda wa Nuuwa mamɔɔ le yooŋgu o wa dimioo wo. Kɛ mɛɛ piɔɔ buli o halaa niŋ bu, ma pɛŋgi mamɔɔ! Pɛɛku ma sina mɛɛ dɛndɛ Nuuwa wo piŋi Nuuwa, yuŋgu ndɔɔ, a visiaa bɔɔbɔɔ yɛ.
