NYƐM kɛndɛŋ naŋ nɔ woŋ kpou Mɛlɛka toosiaa muŋ ni. Mbo toosiaa paaleŋ le naa nyɛ wawoŋndo kio ipala, vɛlɛa paŋgei a looŋ le naa nyɛ wawoŋndo kio ichɔl. Mi Mɛlɛka toosiaa vɛlɛ lɛŋndeŋ le miŋ wa achal lechoo.

Kɛ paaleŋ ni, paŋgei ni, looŋ, vɛlɛa lɛŋndeŋ, o cho muŋ te cho nyɛm tase Mɛlɛka toosiaa le. A sina pa nyɛ tase O toosiaa wo? Mi Mɛlɛka toosiaa fɛŋ ŋwaŋ maa ndu pila. Ŋ chi waŋnda haa le, o cho ko mɛɛ naŋ chi ndupila le yɛ. Baabuiyo veelu waŋnda haa aa maalikɛiya. Mi Mɛlɛka toosiaa maalikɛiya le ma wa a ndu latulu o choo choo niŋ.

Maalikɛinɔ tase Mɛlɛka toosiaa wo wa teŋgeŋ bɛndu. Po tase Mɛlɛkaa o wa ni, vɛlɛ mbo tosa wallo latulu a finya ndɔ. Ndu mala Mɛlɛka nyɛm cheleŋndoŋ kpou toosiaa ni. Mbo mala Mɛlɛka paaleŋ toosiaa, paŋgei, looŋ vɛlɛa chieeŋ naa hoo.

Vɛɛ chieeŋndo wa yɛ teleŋ koŋ nɛ? O kandɔŋndo, wana o wana ve o chieeŋndo choo le. Nyɛ o nyɛ ve lechoo le. Mɛŋma bɛnduaŋ kinɛi ma wa o chieeŋndo choo kpou ni. Kɛ Mɛlɛka ndoo yeema mi waŋnda chieeya wa achal o lɛŋndeŋ choo. Le hei, mbo kandu nyɔŋ toosiaa le naa. Yɛɛ ndoo tosa yɛ?

Nyɛ tasoo cho ni, chieeŋndo ndoo yeema nyɛ wawoŋndo. Lelaŋ, mi Mɛlɛka soli nyɛ wawoŋndo o paaleŋ le mi nyɛ teŋgaa wa o chieeŋndo choo. Mbo tosa mi nyɛ wawoŋndo wa vɛlɛa nyumndaŋ. Okoŋ kɔɔli, mi Mɛlɛka tosa mi lɛŋnde vesɛileŋ le hel o mɛŋndaŋ choo.

O kandɔŋndo, nyɛ o nyɛ ve o chieeŋndo choo le. O wa mɛɛ ŋ cho naa chɔɔ o fotueiyo niŋ yɛ. Filawɛila ve lechoo le, yɔmii bɛɛ, kɛlɛŋgaa visiaa. Suwaa ve pɛŋ o mɛŋma kalaŋ niŋ te. Mɛlɛka ndoo nɔ wɔ bɔɔ le wallo tosaa le mi chieeŋndo ndoo naŋ tau le mi waŋnda chieeya a visiaa wa achal lechoo.