NUAWƆ niko Keŋ nda Ebɛl. A simnuŋ niŋ laŋgbaa. Wana wali ichiɔɔ Keŋ wa ni. Mi ndoo tɔl tɔlɔɔla pɔmpɔmbɔ laŋ vɛlɛa kulloŋ.

Kɛ Ebɛl ndu wana mandaa saa o wa ni. Ndoo kaala bɔɔ saa fɔŋnduaa mandaa. O lo nda mandaa tei ma simnuŋ saa bɛndu. Okoŋ niŋ, mi Ebɛl sɔla saa kunda bɛndoo le nda waa hɔlteŋ choo.

Paale pilɛ, mi Keŋ nda Ebɛl huŋ salaa solio naa Mɛlɛka cha. Mi Keŋ huŋ a nyɛmdiaŋ o tɔl o chiɛi nduɛi niŋndoŋ. Mi Ebɛl bɛɛ huŋ a saa sɔwɛɔ pila o saa nduaa tɛɛŋ. Mi Jɛhowa hini kɔl a sala Ebɛllo, kɛ o hini kɔl a o Keŋndo le. A sina pa le sabu koŋ?

O cho naa maa sala Ebɛllo le ndoo hiou o Keŋndo naŋɔɔ le. Kɛ le sabu Ebɛl wa wana kɛndɛ wo. Ndoo kaala Jɛhowa vɛlɛa bɛndɔ. Kɛ Keŋ ndu wana wɔɔŋndo pila o wa ni. Ndoo hɛnaŋ a pɔmbɔndɔ le.

Le hei, mi Jɛhowa dimul Keŋ maa o siŋga kaala ndɔlaŋ. Kɛ Keŋ tui ndu diom te. Mbo pia cha a kɔl tuuwo kanifuule, Mɛlɛka kaala Ebɛl mbo hiau ndu. Okoŋ, mi Keŋ dimul Ebɛl aa: ‘Poo, yandii liila ya o chiɛi niŋ.’ Mɛɛ nda wa loŋ nda ŋiɔɔŋ kpeele, mi Keŋ kuufa pɔmbɔndɔ ku, mbo dii ndu. O cho suɛi wɔɔŋnde pila le Keŋ tosa hei le?

Mi che bɛɛ naa mi Keŋ dii Ebɛl, Mɛlɛka cho wɔ loonɔŋndo a ndu kɛ. Wana kɛndɔɔ pila Ebɛl wa ni, nduyɛ Jɛhowa puɛɛnuŋ a wanaa waa lende le. Jɛhowa cho hunɔɔ Ebɛl miŋgi yoomu pila. O teleŋ koŋ niŋ, Ebɛl vi lɛ niŋ te. O cho wa achal o chieeŋndo choo lefafɛɛŋ. Vɛ, o niŋ miŋ sina ŋwaŋ maa Ebɛl te?

Kɛ wana wa pɛ maa Keŋ, Mɛlɛka hini kɔl a ndu le. Le sabu koŋ, mɛɛ Keŋ dii pɔmbɔndɔ, mi Mɛlɛka tuisi ndu nyɛ palaa choo. Mi Mɛlɛka tuau ndu yungu ndɔɔ ikɛi mbo yaa ndu landaŋ. Mɛɛ Keŋ wa kɔlaŋ challe naa cheleŋ o chieeŋndo choo, mbo chua yemaa nduaa o pilɛ o nɔɔ niŋ.

Mɛɛ nyɔɔ viou kpɛɛ, mi Keŋ nda laandɔ kandu chuauwa violɔɔ. Mi Chuauwaa cheleŋaa Adama nda Ifi wa bɛɛ chua nɔlaŋ, okoŋ ma vialu chuauwa. Hau pa mi waŋnda kui o chieeŋndo choo. La ŋ pɛɛkuŋndɔ a apum okɔɔ.