TOFAWƆ chieeŋndo naŋ! Nyɛ o nyɛ fee cho o kɛndɛ! Nuawɔ billo a yɔmnde, filawɛilaŋ vɛlɛa visiaa kpou. A nɔla pa ma chɔm kamaa a kpɔkuŋnda naŋ?

Vɛɛnɛ kpele kɛndɔɔ hoo looku yɛ hunɔɔ? Ŋ tofaŋndɔ mɛɛ Mɛlɛka toosiaa chieeŋndo le naa yɛ.

Nyɛ tasoo peŋ, mi Mɛlɛka toosiaa bil kiyɛiyo le mbo kumbu lɛŋndeŋ. Mbo toosiaa tɔlɔɔla pɔmpɔbɔlaŋ, yondoo vɛlɛa yɔmnde. Nyɔŋ muŋ kpou tosa ni mi chieeŋndo naŋ. O fula okoŋ kɔɔli, nyɛm o toosiaa muŋndoŋ ŋpum ke naa nyɛdiaa yeelɛiyo tau.

Okoŋ kɔɔli mi Mɛlɛka toosiaa suuwa o mɛŋdaŋ niŋ, a youva le balɔɔ choo choo. Mbo toosiaa tuŋnda, nyayiaa, sofɛliaa, visiaa bɛnduaa vɛlɛa visiaa pɔmbuaa. Ŋ ve a kɔl kɛndɛ le nyɛm Mɛlɛka toosiaa muŋ kpou le naa woŋ te? A sina pa visiaa chieeniŋaa cheleŋ o haa kɔɔli?

O mɛɛlulaŋ, mi Mɛlɛka toosiaa fondaŋ pɔmbɔ o chieeŋndo choo teŋgeŋ bɛndu. Mbo veelu fondaŋndoo aa kpeeloo Idɛŋ. O wa fondaŋ walaŋ bɛndu. Nyɛ o nyɛ wa leniŋ ndoo naŋ bɔɔ. Nduyɛ Mɛlɛka ndoo yeema mi chieeŋndo kpou ndoo wa maa kpele kɛndɛ o toosiaa hoo wo.

Kɛ chɔɔlu wɔ fotuei kpeloo hoo mɛɛndaŋ. A sina pa nyɛ Mɛlɛka che maa o cho leniŋ too? Ŋ nuaŋnuŋndɔ.