O TELEŊ pum niŋ, kuubaa dialuŋ kalaa bɛnduaa wa o chieeŋndo hoo choo. Nduyɛ bandei pila ndaa bandu ni. Baabuiyo dimi maa, finyaa ndaa wa maalikɛiyaa chɛŋ choo choo wa ni. Kɛ vɛɛ hei lookuyɛ yɔŋnɔŋ?

Loonuŋ maa, Setana wa tuŋ kpundɛlaŋ keiyo mɛlio. O wa vɛlɛ tuŋ kindiŋndo le mbo tiu maalikɛiyaa Mɛlɛkaa ba le mi nda bɛɛ simnuŋ awɔɔŋ. O boondii pum niŋ, mi maalikɛiya haa kandu Setana nilaŋ yaŋɔɔ. Okoŋ, ma kɛɛ wali Mɛlɛka ke nda le tosaa o choo choo niŋndo. Mɛɛ ma tual o chieeŋndo choo naŋ. Okoŋ, ma chua dialuŋ iwana chieeyaŋ. A sina pa le sabu nda tosa heiyo?

Baabuiyo dimi maa le mɛɛ maalikɛiyaa Mɛlɛkaa haa che waŋlaanduaa kɛndiaa o chieeŋndo hoo choo yɛ. Nduyɛ, ma yeema le waa a nda. Lelaŋ nda tol o chieeŋndo hoo choo ni. Okoŋ, ma chua waŋlaanduaa haa o nɔlaŋ niŋ. Baabuiyo dimi maa hei niŋte, kanifuule, le waa o choo choo niŋ Mɛlɛka toosiaa maalikɛiya ni.

Mɛɛ mi laanduaa maalikɛiya haa vialu chuauwa. Chuauwaa nda velu kaŋ nda wanuŋ teŋgeŋ bɛndoo pila. Mɛɛ nda velu chɛlɛkpiaa haa sɛnɛi, teŋgeŋ ve nda tɛɛŋ nda chɛlɛkpiaa tuaa le. Kɛ mɛɛ nda hindu fau, lende koni nda kiandu poŋ. Okoŋ niŋ, ma simnuŋ kuubaa dialuŋ kalaa.

Kuubaa dialuŋ kalaa haa yɛ, ŋwɔɔŋndoŋ pila ndaa tosa ni. A wanuŋ a bɛndu heu, nduyɛ, yoomuaŋ pila ndaa nɔ ni. Lelaŋ ndaa kei kpundɛlaŋ chaanda mɛlio choo ni. A wa vɛlɛ waŋnda kindilaa le mi nda bɛɛ simnuŋ awɔɔŋ.

Mɛɛ Inɔki vi, wana kɛndɛ cheleŋ wa vɛlɛ o chieeŋndoo choo. Diola wana koŋ la wa yɛ Nuuwa ni. Nyɛ o nyɛ Mɛlɛka ndoo yeema, ndu ndoo tosa lɔɔlɔɔ ni.

Paale pilɛ, mi Mɛlɛka dimul Nuuwa maa boondei fuuluu le mbo tɛɛmbuu wanaa wɔɔŋnda kpou. Kɛ Mɛlɛka cho Nuuwa, yungu ndɔɔ vɛlɛa visiaa bɔɔ bɔɔ kiindiaa. Ŋ tofaŋndɔ mɛɛ Mɛlɛka tosa hei yɛ.