WANAA luei o dɛndɔɔ niŋ tea wa wɔ hiowɔɔ lachi kɛ a sɔɔŋ wɔɔŋndoŋ tosaa. Ndaa laalaŋndɔ bɛɛ kposoŋ te mɛŋma koŋgiaŋ ma cho hunɔɔ le. Hiouwɔɔ tuŋ nda wa lachi ni a mamɔɔ. Kɛ o boondii biŋgi niŋ, mi mamɔɔ mɛɛlu.

A ve kɔl te mi mɛŋndaŋ ma kandu nda fulallo. Mi ma buli bu o choo choo niŋ. Num oo che maŋ talaŋndo pɛ aa mɛŋndaŋ waŋndo cho talaa lɛŋ a baawaa ni. Tonyaa kpeekpei Nuuwa wa dimio ni. Kɛ ndoo hiou niŋ lɔɔ le mi wana cheleŋ ndoo luɛi o dɛndɔɔ niŋ. Kanifuule Jɛhowa ndoo chii niŋ dio baŋɔɔ.

Mi mɛŋndaŋ ma kumbu dɛŋgbɛlaŋ chɔ chɔ bɛndoo pila. Ma wa kuŋndo naŋ chaa bal bɛndoo ni. Mi sioonde bii waŋnda. Okoŋ, ma kandu helɔɔ o pemboŋ choo. Kɛ hau pa mi ma kumbu pemboŋ, yɔmnde, vɛlɛa pouta bɛndaŋ kpou. Kpokii ya, te ndaa yaŋ ndɔɔ pɛ Nuuwa nilaŋ mi ndaa luɛi o dɛndɔɔ niŋ teleŋ dio wa wɔ o kumbia le nda wo! Kɛ i wa niŋ ihiawaa lɔɔ.

Mɛŋndaŋ ma wa hiowɔɔ lachi tuŋ a hunɔɔ. Le palɛi 40 a nyumndaŋ 40 piɔɔ wa talaŋndo tuŋ o chieeŋndo choo. Mi ma hel o pembuŋ filioŋndoŋ daŋgaltaŋ, nduyɛ o chɔ chɔ bɛndu niŋ mi ma kumbu pemboŋ muŋ fau. Mi waŋchieeya a visiaa luei o dɛndɔɔ niŋ tia kpou wu, a mɛɛ Mɛlɛka dimi yɛ koni. Kɛ a kɛ kɛ luɛi o dɛndɔɔ niŋ, ma sɔla kindaa.

Wali kɛndɔɔ pila Nuuwa nda puaa nduaa tosa ni le dɛndɔɔ taŋgullo. Mi mɛŋndaŋ ma heelu ndu, nduyɛ o wa o mɛŋma kalaŋ choo tema. Mɛɛ piɔɔ pɛŋgi siaa paale pilɛ, mi paaleŋ le kandu fulaa. Mɛɛ nda tofa o bɛɛ, ma cha mɛŋma bɛnduaŋ ba o ba fee. Mi kɔndɔfillo bii nda. Dɛndɔɔ kinɛi wana ndoo cha o mɛŋndaŋ choo ni.

Kuubaa dialuŋ kalaa kpou chuu wu. Fɛɛŋfɛɛŋ bɛɛ a kei lɛ waŋchieeya kpundɛlaŋ mɛli choo le. Nda ni, kalaa ndaa ni, vɛlɛa wanaa yɔŋwɔɔŋaa cheleŋ kpede chuu wu. Kɛ yɛɛ ndoo yɔŋnuŋ yɛ a finyaa ndaa?

O kpeekpei niŋ, finyaa ndaa haa ve ŋwaŋchiee maa naa le. Maalikɛiya nda wa ni. O choo choo niŋ ndaa chɛŋ ni ma tual o chieeŋndoo choo. Mɛɛ nda tol lɛŋ, ma chua dialuŋ iwana chieeyaŋ le nda pila. Nyɛ koŋ mɛɛ mɛŋma koŋgiaŋ ma hiŋ, a vi latulu nda wanaa tuaa le. Ma mal dialuŋnda ŋwana chieeyaŋ, okoŋ ma miiŋguŋ choo choo. Kɛ Mɛlɛka chɛllɛ nda kposoŋ le ma wa o yungu ndɔɔ niŋ te, ndu cho ni, maalikɛiyaa nduaa tuaa choo choo. O hei niŋ, ma simnuŋ maalikɛiya le Setana. Baabuiyo veelu nda aa nyinaa wɔɔŋnda.

Mi Mɛlɛka tosa mi hueiye huaŋ, okoŋ mi mɛŋndaŋ ma kandu tolɔɔ. Mɛɛ paŋgoŋ hiou ŋuɛɛnu, mi dɛndɔɔ huŋ chal o pembei choo. Mɛɛ palɛi bɔɔ bɔɔ hiou, mi wanaa wa o dɛndɔɔ niŋnda a nua o bɛɛ ma cha pemboŋ bolle. Mɛŋndaŋ ma wa tuŋ hiouwɔɔ lachi a tolɔɔ.

Okoŋ, mi Nuuwa soli you tiŋio pum le mbo kɔ tofa te mɛŋndaŋ ma tol pɛ. Mɛɛ o kɔ balu tei mbo miiŋgu ndu o ibuŋ o dɛndɔɔ niŋ, kanifuule, o sɔla fondaŋ chalaa le. Teleŋ o teleŋ o kuɛ pɛ, o sɔla naa chalaa le, okoŋ o miiŋgu o huŋ chal o dɛndɔɔ choo.

Nuuwa ndoo yeema sinaa te mɛŋndaŋ ma vela o lɛŋndeŋ choo. Le hei, mbo soli vɛlɛ piiŋndo o dɛndɔɔ niŋ. Kɛ mi piiŋndo hoo bɛɛ miiŋgu o dɛndɔɔ, kanifuule, o sɔla naa chalaa le. Mi Nuuwa soli ndu vɛlɛ soli diiŋndɔɔ, okoŋ mbo huŋ a peele ɔlifileŋ ndu o ichɔ chɔ. Mɛɛ mi Nuuwa sina niko maa mɛŋndaŋ ma chuu faŋaŋ o lɛŋndeŋ choo. Mi Nuuwa soli vɛlɛ piiŋndo hoo soli ŋgaandɔɔ. O laŋ niŋ, mi piiŋndo saaluŋ fondaŋ vesɛiyo le challe.

Mi Mɛlɛka dimul niko Nuuwa aa: ‘Chɔŋ ma fula o dɛndɔɔ niŋ. Chua yungu numndo kpede a visi o visi cho o dɛndɔɔ niŋ ma fula a nda.’ Ndoo hiou wɔsio pilɛ a wa o dɛndɔɔ niŋ. Ŋ yiyaŋndɔ niko mɛɛ nda kpou wa a kɔl kɛndɛ le mɛɛ nda fula vɛlɛ yoomu o dɛndɔɔ niŋ yɛ!