MƐƐ Jɛhowa tou Adama nda Ifi o kpeloo niŋ Idɛŋ, mi nyɛpalaa komal nda tau. Mɛɛ mi ndaa tosa fɛŋ wallo o kala kala malaŋ ndaa sɔla nyɛdiaa. Ndaa chi lɛ yɔmii kuamɛi maa hei o kpeloo niŋ Idɛŋ te, kɛ yɔɔŋ a kayeŋndoŋ kposoŋ wa nda ŋ balaa ni. Le mɛɛ Adama nda Ifi kɛɛ Mɛlɛka diom tueiyɔɔ yɛ nyɛpalaa hoo kpou komal nda ni.

Kɛ nyɛ hiou wɔuleŋ kpou wo cho ni, mi piɔm Adama nda Ifi wo kanduŋ. Loonuŋ ndɔ, mi Mɛlɛka ndoo dimul nda maa acho wu te a de pɛ komɔɔ yɔm o kɛɛlu nda koŋ le dio wo. Lende i yɔŋnuŋ ni, paale nda de ndu leŋ kpeekpei piɔm ndaa kanduŋ ni. O wa diɔmii bɛndu le mɛɛ nda kɛɛ Mɛlɛka nilaŋ yaŋɔɔ yɛ!

Jɛhowa tou fɛŋ Adama nda Ifi o kpeloo Idɛŋ niŋ malaŋ nda kandu violɔɔ. Hei chɔm ni maa chuauwaa ndaa bɛɛ a nɔ ma hindu, ma yuwa nduyɛ ma vi.

Te Adama nda Ifi aa tuei Jɛhowa diom pɛ, a wa yoomoo tueiyɔɔ yeela tɛfulu nda chuauwaa ndaa. Nda kpou wa lo achal lefafɛɛŋ a nyaale o chieeŋndo choo. Wana o wana ndoo yuwa niŋ te, naa ve wa le, kɛlɛŋgaa piɔmndo.

Mɛlɛka yeema mi waŋchieeya wa achal lefafɛɛŋ a nyaale, nduyɛ Mbo mɛi lediom maa i yɔŋnuŋ niŋ paale pum. Chieeŋndo kpou wa niŋ o kɛndɛ. Waŋchieeya kpou bɛɛ nɔ niŋ kɛndiaa kɛndɔɔ. Nduyɛ waŋchieeya nɔ niŋ chaŋyɛi kɛndɛi a Mɛlɛka vɛlɛa chaaŋaa ndaa.

Mɛɛ Ifi kɛɛ Mɛlɛka diom tueiyɔɔ, mi chaŋyɛi ndɛi mɛɛlu. Le hei, teleŋ Ifi ndoo kandu chuauwa violɔɔ wo, i ve suɛi bɛɛŋ bɛɛŋ a ndu le. Mɛɛ mi pulei dii nɛi ndu fɛŋ kalaŋ malaŋ ndoo vialu. Diom Jɛhowaa kiɔɔ tueiyɔɔ chuu ndu mɔnɔŋ muŋ kpou ni. Vɛ, lende le icho le?

Mi Adama nda Ifi vialu chuauwa tau; puaa a waŋlaanduaa. Mɛɛ nda velu po tasoo, ma ke ndu diolaŋ aa Keŋ. Ma ke po diiŋndɔɔ diolaŋ aa Ebɛl. A sina pa nyɛ ndoo yɔŋnuŋ nda wo?