Wanaa ŋɔmaa kinɛi sɔla pioŋɔɔ teleŋ mɛŋma koŋgiaŋ ni. Mɛɛ nyɔɔ viou kpɛɛ, ma hiau lachi a kuiyo o waalaŋ niŋ. Chɔŋ a teleŋ mɛŋma koŋgiaŋ ma hiou wo, wɔsilaŋ 352 la hiou ni ma vialu Ebilaham. Okoŋ, mi Mɛlɛka dimul Ebilaham maa o cho hunɔɔ poo violɔɔ mbo ke ndu diolaŋ aa Aisaki. Ŋ cho hunɔɔ pɛɛku a mɛɛ Jɛhowa lo o lediom yɛ. Mi Aisaki bɛɛ vialu puaa nda ŋiɔɔŋ. O puaa ŋiɔɔŋaa kaŋ tɛɛŋ, mi Mɛlɛka hɛli vɛlɛ Chekɔpu.

Yungu bɛndoo pila Chekɔpu ndoo nɔ ni. Ndoo nɔ Puaa tɔ a ŋiɔɔŋ vɛlɛa waŋlaanduaa atiŋ. Mi Puaa tɔa Chekɔpuaa piliaa a tul Choosɛ pɔmbɔ nda leyɛ, ma pisi ndu o chɛleŋ niŋ Ichipi. Okoŋ kɔɔli, mi Choosɛ simnuŋ masa sɔwɛɔ pila Ichipi. Mɛɛ yima wɔɔŋ wɔɔŋndaŋ ma del kpulɛŋ, mi Choosɛ tofa bɛndaa nduaa kɔltaŋ te a siŋgaŋ pɛ. O mɛɛlulaŋ kpɔŋ, mi yungu Chekɔpoo kpou, ndu cho yɛ Isɔluɛitiiya ni, kuanduŋ tɛ tɛ ma huŋ Ichipi. Hei yɔŋnɔŋ wɔlsilaŋ 290 o violɔŋ Ebilahamndo kɔɔli.

Wɔlsilaŋ 215 Isɔluɛitiiya chii Ichipi ni. Mɛɛ Choosɛ vi okoŋ kɔɔli, ma siiŋguu Isɔluɛitiiya chiaa Ichipi. O boondii keŋ bɛŋgu nda velu Muuse ni. Nduyɛ ndu Mɛlɛka soliŋ kpeku ni le yungoo Isɔluɛi solio o chɛleŋ niŋ Ichipi. Sɔɔŋ yɔŋnuŋ o Buŋgɛi DIIŊNDUƐI hei niŋnde, chua wɔlsilaŋ kpou kpou 857.