A SINA pa chua cho hoo o fotueiyo hoo niŋndo? Diola ndɔlaŋ lacho Lubɛka ni. Nduyɛ wana pɔnɔ o cho hoo kɔlaŋ demullo wo cho Aisaki ni. Laandɔ o cho hunɔɔ simnɔŋ ni. Vɛɛ hei looku yɛ yɔŋnɔŋ?

Ebilaham yeema lanɔ kɛndɔɔ yilɔɔ le Aisaki po ndɔ. O yeema mi Aisaki yil lanɔ o lɛŋnde Kenaŋndeŋ niŋ te, kanifuule waŋnda haa mɛlɛkaa lachoowaa ndaa sooluu ni. Le hei, mi Ebilaham veelu buɛi ndɔɔ mbo dimul ndu aa: ‘I hɛnaŋ ma kuɛ naa wanayaŋ nuŋ cho ichali Halaŋnda. Nduyɛ ma kɔ yil lanɔɔ loŋ le Aisaki po ni.’

Tamala bɛɛ buɛi Ebilahamndo yɔŋ te, mbo chua nyɔɔmiaa tɔ mbo biyaŋ kɔlaŋ o tiŋ vilɛi koŋ niŋ. Mɛɛ o fuuluu chiee lekɔɔ naa wanayaŋ Ebilahamndoŋ cho wa, mbo sim o sooŋ kuandaa mamɛŋndo. Paaleŋ le wa niŋ le delaa doŋ, a boondii waŋ laanduaa chiee koŋ niŋ kua o peelo mɛŋndaŋ kɔndɔɔ ve kinɛi. Mi buɛi Ebilahamndo lo okoŋ mbo piɛi o Jɛhowalo aa: ‘Maa chua laandu cho ya mɛŋndaŋ ke a nyɔɔmiaa niaa wo wa o num hɛli le waa lanɔ Aisakio fɔ.’

Hau pa mi Lubɛka huŋ bɛɛ le mɛŋndaŋ kɔndɔɔ. Mɛɛ finya buɛiyo piɛi dɔɔ ndu mɛŋndaŋ le kolɔɔ, o le pilɛ niŋ kpe mbo yɔŋgu ndu. Mɛɛ mbo muliŋ vɛlɛ mbo kɔ kɔndu mɛŋndaŋ tau le nyɔɔmiaa nduaa, kanifuule, nda bɛɛ kolɔɔ ndoo bii nda. O ve wali bɛɛŋ bɛɛŋ te, kanifuule, mɛŋndaŋ pila nyɔɔmiaa kol ni.

Mɛɛ Lubɛka chii hei tosa, mi buɛi Ebilahamndo nyuna ndu le diola finya ndɔlaŋ. Mbo nyuna ndu vɛlɛ te o sɔla niŋ pɛ naa lɔlaa o finya ndɔlo chiɛiniŋ. Mi Lubɛka muli aa: ‘Bɛtɛl cho finya nuu ni. Nduyɛ, ŋ nɔ naa lɔlaa le num le ma wa latulu a naa.’ Mi buɛi Ebilahamndo sina dɔɔ maa pɔmbɔɔ Ebilaham Nahɔɔ, ndu velu Bɛtɛl ni. Okoŋ mbo baŋ wulaŋ, mbo mel Jɛhowa balikaa le mɛɛ o yɛɛ ndu sanaa o wanaa Ebilahanda lo yɛ.

Ichɔl koŋ, mi buɛi Ebilahamndo duaŋ kona o Bɛtɛl lo a Lebaŋ pɔmbɔ ndɔ, le sabu o kuɛ loŋndo. Mi nda kpou chɛl maa Lubɛka kɔ chal Aisaki o ba o nɔɔ niŋ. Yɛɛ Lubɛka ndoo dimi yɛ mɛɛ nda nyuna ndu? Mbo chɛl aa: ‘Ei,’ o yeema kɔlaŋ. Mɛɛ paaleŋ le sɛ idiiyo, ma hel o nyɔɔmiaa choo ma kandu kɔlaŋ o tiŋ vilɛi koŋ niŋ le miiŋgoo Kenaŋ.

A paale yɔŋgaŋndeŋ fɛɛ nda fuuluu ni. Mi Lubɛka lo loŋ mbo cha poo kelaa o pollo niŋ. Aisaki wa yɛ po kalaa ni. O wa a nyaale le Lubɛka chɔɔ. Piɔm Sela kalandɔ wo ndoo hiou niŋ wɔsilaŋ la yaa, kɛ o wa wɔ tuŋ a kɔl tambɛi koŋ. Kɛ mɛɛ Aisaki sɔla Lubɛka o nɔɔ niŋ, mbo kaala ndu tau. Hei tosa ni mbo sɔla vɛlɛ nyaaloo.