PUAAMBUAA ŋiɔɔŋaa ŋ cho haa chɔɔ naŋnda a velaŋ te. Vɛ, lende le icho le? A sina pa diola nda laŋ? O cho doosuleŋndo diolaŋ aa Iisɔ. O cho saa mandaa wo ndu diolaŋ aa Chekɔpu.

Iisɔ nda Chekɔpu pɛnduaa nda cho ni. Aisaki nda Lubɛka velu nda ni. Doosunɔ kɛndɔɔ pila Iisɔ wa ni, nduyɛ mi ndoo hiŋ a nyɛ diaa chiɛiniŋ le yungoo. Le saboo hoo, mi Aisaki finya nda kaala ndu tau. Kɛ Lubɛka ndu Chekɔpu ndoo kaala ni tau, kani fondole Chekɔpu ndu wana meiyaa o wa ni, nduyɛ o wa poombɔ lebɛɛ.

Ebilaham finya nda mama wa wɔ achal. Nduyɛ a boondii keŋ, Chekɔpu ndoo nɔ yeemɛi tau le ndu nilaŋ yaŋɔɔ te ndoo wa pɛ suɛi a Jɛhowa okɔɔ. Ebilaham wa wɔsilaŋ 175 mbo wu. Wɔsilaŋ 15 pɛnduaa haa wa a boondii keŋ ni.

Mɛɛ Iisɔ wa wɔsilaŋ 40, mbo chua chuaa laanduaa Kenaŋnda a ŋiɔɔŋ o nɔɔ niŋ. Mi hei tɛɛmbuu Aisaki nda Lubɛka kɔllo tau, kanifuule chuaa laanduaa haa piɛi Jɛhowa le.

O wa paale pilɛ mi suɛi pum yɔŋnuŋ, mi i tosa mi Iisɔ mia a yolɛi Chekɔpu pɔmbɔndɔ ve kuu. Boondei ndii fuuluu niŋ le mi Aisaki dɔu kaasoŋnɔɔ sala. Mɛɛ Iisɔ ndoo wa kaasoŋnɔ le Chekɔpu yɛ, Iisɔ wa kɔl maa ndu cho salaa hoo sɔla ni. Kɛ Iisɔ ndoo chii niŋ di ndoo nɔ le salaa sɔlaa wo pisi naa Chekɔpu cha. Nduyɛ, boondii puaambuaa ŋiɔɔŋnda haa veluŋnde, mi Mɛlɛka dimi maa Chekɔpu cho salaa sɔla ni. Nyɛ ndoo yɔŋnuŋndo cho hoo ni. Mi Aisaki duau Chekɔpu sala.

Mɛɛ Iisɔ huŋ sina a suɛi hei okɔɔ, mbo tuulu kɔl a Chekɔpu. Kɔl tuu koŋ hiuwaŋndo ndu puŋ, mbo dimi pɛŋ maa o cho Chekɔpu diyɔɔ. Mɛɛ Lubɛka tuei a ndi okɔɔ, mbo buulaŋ tau. Le hei mbo dimul Aisaki pɔnɔ ndɔ aa: ‘O wa bɔɔ suɛi wɔɔŋ te Chekɔpu bɛɛ chua chuaa laanduaa Kenaŋnda haa o pilɛ bɛɛ o nɔɔ niŋ pɛ.’

O koŋ kɔɔli, mi Aisaki veelu Chekɔpu po ndɔ, mbo dimul ndu aa: ‘Chuaa laanduaa Kenaŋ naŋ kinɛi, o pilɛ bɛɛ chua o nɔɔ niŋ te pa. Kɔ Halaŋ o chiɛi Bɛtɛl finya num mama wo niŋ, ma kɔ chua lanɔɔ loŋ. Chua chuauwaa Lebaŋ po ndɔ wa o pilɛ o nɔɔ niŋ.’

Mi Chekɔpu yaŋ finya ndɔ nilaŋ. Nduyɛ tamala bɛɛ o yɔŋ te, mbo kandu kɔlaŋ o tiŋ vilɛi koŋ niŋ naa wanayaŋ ndɔŋ cha Halaŋ.