NUAWƆ yungu bɛndoo hoo. Puaa 12 Chekɔpuaa cho haa ni. O nɔ vɛlɛ chuaa laanduaa. A sina pa apum diolaŋ o chuauwaa tɛɛŋ? Ŋ pɛɛkuŋndɔ a apum okɔɔ.

Liya velu Lubɛŋ, Simiɔŋ, Livai, vɛlɛa Chuda ni. Mɛɛ Luechɛl che maa ndu vilu wɔ chua le, mbo tambu kɔl tau. Le hei mbo chua buɛi ndɔ laandoo Biliha mbo ke Chekɔpu le mbo hiviŋ ndu kɔɔli, okoŋ mi Biliha vialu chuauwa nda ŋiɔɔŋ. O pilɛ diolaŋ Daŋ, o pilɔɔ Nafitalii. Mɛɛ mi Liya bɛɛ chua buɛi ndɔ laandoo Silipa mbo ke Chekɔpu le mbo hiviŋ ndu kɔɔli, okoŋ mi Silipa bɛɛ vialu Kaadi a Asia. Mi Liya mɛɛlu puaa violɔɔ a ŋiɔɔŋ, Isaka a Sɛbulɔŋ.

Mɛɛ mi Luechɛl vialu niko poo yɔɔfɛɛ. Mbo ke ndu diolaŋ aa Choosɛ. Ŋ cho hunɔɔ chɔɔlu pɛɛku tau a Choosɛ okɔɔ, kanifuule mi ndoo simnuŋ wana sɔwɛ bɛndu. Teleŋ Chekɔpu wa latulu nda Lebaŋ bomndɔ wo, o velu Chuauwaa 11 haa ni.

Chekɔpu ndoo nɔ vɛlɛ chuaa laanduaa atiŋ. O nda tɛɛŋ kinɛi, o pilɛ kpe Baabuiyo chɔm diolaŋ ni. Diola ndɔlaŋ la cho Daina ni.

Mi Chekɔpu kɛɛsiaa le mbo faŋaŋ Lebaŋ o ba bɛŋgu mbo miiŋguŋ Kenaŋ. Mɛɛ boondei fuuluu niko, mbo chuuŋgiaa yungu ndɔɔ, saa nduaa kunda bɛnduaa, a nauwa nduaa kundaa, ma biyaŋ kɔlaŋ o tiŋ vilɛi koŋ niŋ.

Mɛɛ Chekɔpu a yungu ndɔɔ kuɛ sii, malɔɔ ndaa le kɔlaŋ Kenaŋ, mi Luechɛl vialu vɛlɛ po cheleŋ o nɛi tɛɛŋ. Mi Luechɛl saŋga tau le poo hoo violɔɔ, nduyɛ o mɛɛlulaŋ kpɔŋ mbo wu. Kɛ mi chɛlɛkpɔɔ ndu kinda. Mi Chekɔpu lo okoŋ mbo ke ndu diolaŋ aa Bɛŋnjamɛŋ.

O bɛnda miŋ loonuŋ diola puaa 12 Chekɔpuaa, kanifuule o nda niŋ kaaleŋ Isɔluɛi le fula ni. O puaa tɔa Chekɔpuaa, a puaa ŋiɔɔŋaa Choosɛ velu wa kɔɔli kaala 12 ndaŋ Isɔluɛi sɔla diolaŋ ni. Aisaki ndoo viou niŋ achal le wɔsila bɔɔ bɔɔ o violuŋ chuauwa haa kɔɔli, nduyɛ mi i nɛŋi ndu kɔl tau le chuaa mamaa kaakuuwa haa sɔlaa. Kɛ ŋ tofaŋndɔ nyɛ ndoo yɔŋnuŋ a Daina chua ndɔ mama wo.