A CHO pa chɔɔ nyɛ Ebilaham cho tosaa naŋndo? O nɔ muɛi o ba, nduyɛ wana che pɛ aa diyɔɔ o yeema po ndɔɔ ni. Le yɛɛ o yeema yɛ i vaa naa tosaa? Le sabu koŋ sinaa, ŋ chɔnuŋndɔ fɛŋ mɛɛ Ebilaham nda Sela looku po ndaa hoo sɔla yɛ.

Loonuŋ maa mi Mɛlɛka ndoo dimul nda maa a cho hunɔɔ poo violɔɔ. Kɛ wanaa che pɛ maa keŋ ndii yɔŋnuŋ te, kanifuule Ebilaham nda Sela ndaa yuwa niŋ bɔɔ. Kɛ Ebilaham ndu ndoo nɔ laalaŋndo maa nyɛ kendu a wanachioo wo, o kindu a Mɛlɛka le. Lelaŋ yɛɛ ndoo yɔŋnuŋ yɛ?

Mɛɛ Mɛlɛka dimul nda lende, wɔsio opilɛ ndoo hiou okoŋ kɔɔli ni. Mɛɛ Ebilaham wa wɔsilaŋ 100, Sela ndu wɔsilaŋ 90, okoŋ nda velu poo hoo ni ma ke ndu diolaŋ aa Aisaki. Mi nyɛ Mɛlɛka dimul nda wo yɔŋnuŋ.

Kɛ mɛɛ Aisaki sul laŋgbanɔ kala, mi Jɛhowa tɔɔndaŋ laalaŋ Ebilahamndo. Mbo veelu ndu aa: ‘Ebilaham!’ Mi Ebilaham chɛl aa: ‘Ee, nua ya naŋ!’ O koŋ mi Mɛlɛka dimul ndu aa: ‘Chua po numndo, po num pilɔɔ hoo kpe, ndu yɔŋnuŋ ni maa Aisaki, ma kuɛ o pembii ya cho num chɔmnde choo. Loŋ ŋ cho po num koŋ diyɔɔ ni ma soli ndu salaa.’

Diomndaŋ ndaŋ laa tɛɛmbuu bɔɔ Ebilaham kɔllo, kanifuule ndoo kaala bɔɔ po ndɔɔ hoo. Nduyɛ, loonuŋ nyɛ Mɛlɛka ndoo dimul Ebilahamndo maa chuauwaa nduaa cho hunɔɔ wa o lɛŋnde Kenaŋndeŋ niŋ. Kɛ vɛɛ hei looku yɛ niŋ yɔŋnɔŋ, te Aisaki vi pɛ? Ebilaham ndoo biiyɔ i vaa naa bila le, kɛ o koŋ niŋ kpou mbo diikuŋ Mɛlɛka.

Mɛɛ o fuuluu o pembii Mɛlɛka dimi keŋ nde, mi Ebilaham yii Aisaki poŋ mbo yambu ndu o bandu o taŋgullo choo. Okoŋ mbo soli muɛi yau le po ndɔɔ diyɔɔ. O foofo koŋ choo mi maalikɛinɔ Mɛlɛkaa veelu aa: ‘Ebilaham! Ebilaham!’ Mi Ebilaham chɛl aa: ‘Ee, nua ya naŋ!’ Mɛlɛka dimi aa: ‘Num yɔŋ poombɔɔ nyɛ o nyɛ le, I sina niŋ kpeekpei maa a nɔ laalaŋndo o ya niŋ, kanifuule a kuunaŋ po num pilɔɔ hoo choo le ya le.’

Nuawɔ se laalaŋ kaaku Ebilaham nɔ o Mɛlɛka niŋndo! Ndoo nɔ laalaŋndo maa nyɛ o nyɛ kindu a Jɛhowa le, maa o yɔŋ bɛɛ mi Aisaki vi Jɛhowa nɔla mbo miŋgi ndu yoomu. Kɛ o ve pɛŋ hɛnaŋ Mɛlɛka le mi Ebilaham ndoo dii Aisaki po ndɔ le. Le hei, mi Mɛlɛka tosa mi Ebilaham cha saa kondoo o yondoo daŋgala, nduyɛ mbo dimul Ebilaham maa o soli ndu sala sɔŋgɔ po ndɔɔ.