TOFAWƆ wanaa cho haa wallo wa. Baŋɔɔ puaa haa cho nda ndu ni. Nuawɔ se mɛɛ poo hoo cho wana wallo lɔɔ a kpatooleŋ yɛ. Yuŋgu Chekɔpoo wanaa walla haa cho ni. Nyɛ koŋ nda veelu nda ni aa Isɔluɛitiiya. Ichiptiaŋnda cho nda haa wallo baŋɔɔ ni. Isɔluɛitiiya simnuŋ niŋ chiaa le Ichiptiaŋnda. Vɛɛnɛ hei looku yɛ yɔŋnɔŋ?

Le wɔsila bɔɔbɔɔ, yuŋgu Chekɔpoo wa o kɔl nyuloo niŋ Ichipi. Choosɛ wa nda mandaa nyɛ kɛndɛi. Wana sɔwɛɔ pila o wa le Ichipi ni. Kɛ mi Choosɛ kalaa wu. O piɔm ndɔɔ kɔɔli, mi Felo cheleŋ sul masaa le Ichipi o ndoo yeema bɛɛ pɛŋ a Isɔluɛitiiya loo.

Le hei, mi masa wɔɔŋndo hoo siiŋguu Isɔluɛitiiya chiaa. Kɔl vesɛiyo pila puaa ndoo kɛsi nda lachi wa ndaa nɔ ni. Mi ndaa kindila Isɔluɛitiiya kindilaa pila le chieeŋ bɛnduŋ Felo woŋ taŋgullo. Kɛ a koŋ kpou, Isɔluɛitiiya wa tuŋ hiouwɔɔ lachi a kuiyo o lepula. Mɛɛ nyɔɔ viou kpɛɛ, mi Ichiptiaŋnda luɛi sioonde maa Isɔluɛitiiya cho bɔɔ kuiyo, nduyɛ maa a chal le nda hiouwɔɔ.

A sina nyɛ Felo ndoo tosa wo? Mbo dimul waŋlaanduaa bii violɔɔ le waŋlaanduaa Isɔluɛitiiya wa aa: ‘Te o yɔŋ pɛ mi waŋlaanduaa Isɔluɛitiiya velu wana pɔnɔɔ, la dii ndu pɛ.’ Kɛ nyɛiye pila waŋlaanduaa haa ndaa nɔ ni. Lelaŋ pesiŋ bɛɛ a diu nda le.

Mɛɛ mi Felo duau vɛlɛ sawaa. Mbo dimul wanaa nduaa kpou aa: ‘Chɛlɛkpiaa piaanduaa Isɔluɛitiiya kpou la dii. Kɛ a laanduaa nda, la dii le.’ O cho suɛi wɔɔŋii bɛnduei pila le ndoo dimi keŋ te? Ŋ nuaŋnuŋndɔ niko mɛɛ chɛlɛkpɛ piaandu pum looku kinda yɛ.