LE SABU yɛɛ Muuse cho yɛ fulaa Ichipi a kiltaŋ? A cho pa chɔɔ puaa cho ndu kaŋ kiltaŋ kɔɔli wa? Le ndu diyɔɔ nda cho ndu kiltaŋ kɔɔli ni. Ŋ tofaŋndɔ le sabu koŋ.

O chiɛi Felo wo niŋ, masaa Ichipi Muuse sul kaasoŋnɔ ni. Mbo fula tɔɔ, nduyɛ mbo sɔla taasioo tau. Mi Muuse huŋ sina maa o cho Ichipinɔ le, kɛ maa wanaa velu ndu kpeekpei ya cho chiaa Isɔluɛitiiya ni.

Mɛɛ Muuse wa wɔsilaŋ 40, mbo kɛɛsiaa paale pilɛ le mbo kɔ tofa wanaa nduaa te a cho pɛ kɛndɛ. O wa bɔɔ suɛi imɔnɔ a mɛɛ nda wa nda biyɔɔ wɔɔŋndo yɛ. Mɛɛ o fuuluu mbo cha po Ichipinɔɔ chɛ Isɔluɛinɔɔ lɔɔ. Mbo mɛɛndiaŋ kɔɔli kɔɔli. Mɛɛ o che maa wana cho nda tofa le, mi Muuse muliŋ mbo luaa po Ichipinɔɔ kpuee mbo wu. Mi Muuse tuau sioonde mbo kumbu ndu leniŋ.

Diimandɔɔ pilɔɔ, mi Muuse kua lahau wanaa nduaa tofaa. Yiyaŋ ndɔɔ wa ni le mi ndoo mala nda le ma fula o chɛleŋ niŋ. Kɛ mɛɛ o fuuluu, mbo cha puaa Isɔluɛitiiya a ŋiɔɔŋ chɔulabaa, okoŋ mi Muuse dimul wana nɔ di loo aa: ‘Le yɛɛnɛ ŋ cho yɛ chaŋ num lɔɔ?’

Mi poo dimi aa: ‘O nɛɛnɛ siiŋguu yɛ num masa kɔɔsaa ŋwaŋ naa choo nɛ? A hɛnaŋ ma dii ya mɛɛ ŋ dii po Ichipinɔ chiɛi yɛ?’

Mi sioonde bii Muuse. Mbo sina dɔɔ maa waŋnda tuei a nyɛ o tosa a po Ichipinɔɔ wo. Mɛɛ Felo bɛɛ tuei a ndi okɔɔ, mbo viam puaa le ma kɔ dii Muuse. Le saboo hoo Muuse cho fulaa a kiltaŋ Ichipi ni.

Mɛɛ Muuse fula Ichipi, mbo kuaŋnuŋ poloŋ o lɛŋnde Miidiaŋndeŋ niŋ. Loŋ o komal yungu Chɛtolo wo ni, nduyɛ mbo chua chuaa nduaa laanduaa o pilɛ o nɔɔ niŋ diolaŋ aa Sipola. Mi Muuse simnuŋ wana mandaa lasaa le Chɛtolo. O wa o lɛŋnde Miidiaŋndeŋ niŋ le wɔsilaŋ 40. Paale pilɛ mɛɛ Muuse wa saa Chɛtolo wa mandaa, mi suɛi kaamɛi pum yɔŋnuŋ. Mi suɛi hei siŋga Muuse. Wɔsilaŋ 80 o wa a boondii keŋ ni. Yandii muli wɔ peeleŋ miŋ che suɛi kaamɛi ndii yɔŋnuŋ hei ve.