MƐƐ Muuse miiŋgu Ichipi, mbo dimul Eelɔŋ bɛndɔ a kaamaalaŋ ndaŋ okɔɔ kpou. Nduyɛ mɛɛ Muuse nda Eelɔŋ chɔm Isɔluɛitiiya kaamaalaŋ ndaŋ, mi nda kpede laalaŋ maa Jɛhowa cho a nda latulu.

Okoŋ, mi Muuse nda Eelɔŋ kua naa Felo cha. Ma dimul ndu aa: ‘Jɛhowa, o cho Mɛlɛka Isɔluɛitiiya wo dimi aa: ‘‘Mal wanaa niaa ma kuɛ le palɛi ndii yaa, ma kɔ piɛi ya o pollo niŋ.’’’ Kɛ mi Felo muli aa: ‘I laalaŋ o Jɛhowa niŋ te. Nduyɛ I mel Isɔluɛitiiya ma kuɛ le.’

Mi suɛi hei pala Felo tau, kanifuule waŋnda ndaa yeema wallo malɔɔ le kɔlaŋ Mɛlɛka Jɛhowa piɛiyo. Le sabu koŋ, mbo baŋ nda wallo kalaŋ mbo hiau maa paandu. Mi Isɔluɛitiiya bii Muuse tɔɔyaŋ le mɛɛ Ichiptiaŋnda hiou niŋ ba a nda biyɔɔ wɔɔŋndo yɛ. Le hei, mi Muuse bɛɛ tambu kɔl tau. Kɛ mi Jɛhowa dimul ndu aa: ‘Buulaŋ te, I cho tosa mi Felo mal wanaa niaa ma kuɛ.’

Mi Muuse nda Eelɔŋ kua vɛlɛ naa Felo cha. O kɔlaŋ ndaŋ, ma kɔ tosa kaamaa. Mɛɛ Eelɔŋ mal tinda ndɔɔ lɛŋ, mbo simnuŋ kɛu bɛndoo. Kɛ mi wanaa kɔlkaluaa Felo wa bɛɛ mal tindala ndalaŋ lɛŋ, mi la simnuŋ kɛuwa. Kɛ nuawɔ se mɛɛ kɛu Eelɔŋndo cho kɛuwaa wanaa Felo wa misioo yɛ! A koŋ kpou Felo mel Isɔluɛitiiya ma kuɛ le.

Teleŋndo fuuluu niko le mi Jɛhowa chɔm Felo kpaaya ndɔɔ. A sina pa mɛɛ o looku ndi tosa yɛ? Mbo tuisi Ichiptiaŋnda kpundɛlaŋ tɔ choo.

Mɛɛ kpundɛlaŋ la wa lambaŋndo, mi Felo veelu Muuse, mbo dimi aa: ‘A tosa pɛ a sabu mi kpundɔɔ hoo faŋaŋ, I cho Isɔluɛitiiya malɔɔ ma kuɛ.’ Kɛ mɛɛ Muuse tosa mi kpundɔɔ faŋaŋ, mi Felo siŋga kɔl ndɔɔ. O mel waŋnda haa ma kuɛ le. Kɛ mɛɛ kpundɛ tɔ ndɔɔ yɔŋnuŋ o mɛɛlulaŋ kpɔŋ, ndii nɔ lɛ i dimulaa wana le, mi Felo dimul Isɔluɛitiiya le ma kuɛ.

Kpundɛla tɔlaŋ ndaŋ, a sina laŋ pa la pilɛŋ pilɛŋndaŋ? Muli peeleŋ miŋ pɛɛku a laŋ okɔɔ.