NYƐIYE bii num pa le po cho hoo a naa wo? Diola ndɔlaŋ la cho Choobu ni. Laandɔ sim hoo ndu choo ni. A sina pa nyɛ o cho Choobu dimullo wo? ‘Yei Mɛlɛka ma vi.’ Le sabu yɛɛ o soliŋ yɛ diom waa lende ndoo o sondo? Nduyɛ, le sabu yɛɛ Choobu sɔla yɛ nyɛpalaa waa naa? Ŋ tofaŋndɔ.

Wana laalaŋndo Choobu wa ni. Mi ndoo diikuŋ Jɛhowa. O lɛŋnde Uusileŋ niŋ o wa ni, le ve levil a Kenaŋ te. Mi Jɛhowa ndoo kaala Choobu tau, kɛ mi waŋndo opum tul ndu leyɛ. A sina pa wana koŋ?

Wana koŋ cho Setana nyina wɔɔŋndo ni. Loonuŋ maa, Setana maalikɛinɔ wɔɔŋ tul Jɛhowa leyɛ wo o cho ni. Ndu tiu Adama nda Ifi ba ni ma kɛɛ Jɛhowa diikɔŋndo. Mbo dimi vɛlɛ maa o tiu ba mbo tosa mi wana o wana fee kɛɛ Jɛhowa diikɔŋndo. Kɛ mi ndoo tiu pa ba? Sako. Yiyaŋndɔ a wanaa laalaŋaa bɔɔ bɔɔ naŋ pɛɛku niŋ paandu a nda okɔɔ wa. A nɔla pa ma veelu apum diolaŋ?

Mɛɛ Chekɔpu nda Choosɛ vi Ichipi, o chieeŋndo choo kpou, Choobu ndoo hiou wa wana laalaŋ o Jɛhowa niŋ. Jɛhowa yeema le mi Setana sina maa o nɔla mbo siiŋguu wana o wana fee wana wɔɔŋ te. Le hei, mbo dimul ndu aa: ‘Tofa Choobu. Nuawɔ kpɛ laalaŋ o nɔ o ya niŋndo.’

Mi Setana lo okoŋ mbo dimi aa: ‘O cho fuule o laalaŋ num te,’ kanifuule a dɔu ndu sala, nduyɛ ma ke ndu nyɛm kɛndɔŋ tau. Kɛ te o yɔŋ pɛ ma puu ndu muŋ o ba, o cho num yei.’

Mi Jɛhowa dimul ndu aa: ‘Chua nyɛ o nyɛ o nɔ. I mal ndu num o ba. Nyɛ o nyɛ wɔɔŋ ŋ yeema pɛ tosal ndu. Kɛ yoomu ndɔɔ kinɛi num pilaŋ te ni. Ŋ cho chɔ te o yei ya niŋ pɛ.’

Nyɛ tasoo peŋ, mi Setana tosa mi waŋnda kɔ chiimbuu nauwa a nyɔɔmiaa nduaa latulu. Kɛ saa nduaa nda, ma wu paku. Okoŋ kɔɔli, mbo tosa mi hoiyii bɛnduei hɔŋ, mii diu chuauwaa nduaa tɔa, puaa a waŋ laanduaa. Okoŋ kɔɔli, mi Setana mal Choobu naa wɔɔŋ wɔɔŋndo hoo choo. Mi Choobu sɔla nyɛpalaa tau. Le saboo hoo laandɔ dimul ndu ni aa: ‘Yei Mɛlɛka ma vi.’ Kɛ Choobu tosa keŋ te. Mi chaaŋaa nduaa huŋ nda yaa okoŋ kɔɔli, ma dimul ndu maa yɔŋ wɔɔŋ o tosa wo chuu ndu nyɛpalaa ni. Kɛ a keŋ kpou, mi Choobu lo o laalaŋ ndɔɔ choo.

Mi Jɛhowa naŋ kɔl tau a hei. Mbo faŋa naa wɔɔŋ wa koŋ Choobu choo wo. Mbo muliŋ mbo duau Choobu sala. Mi Choobu sɔla vɛlɛ chuauwa tɔ. Naŋɔɔ pila ndaa naŋ ni. Nduyɛ mbo chɔɔlu nauwa sɔla, a saa, a nyɔɔmiaa mbo hiau mɛɛ ndoo nɔ paandu yɛ, a mɛɛ ŋ cho naa chɔɔ o fotueiyo niŋ yɛ koni.

Num yɛ, a lo niŋ pa lɔɔlɔɔ o laalaŋndo choo naa Jɛhowa cha maa Choobu? Te o yɔŋ pɛ ma lo lechoo, mɛɛ num bɛɛ Mɛlɛka cho num sala dɔuwɔɔ. Boondii chieeŋndo kpou miiŋgu niŋ o kɛndɛ maa kpeloo Idɛŋndo, num bɛɛ wa niŋ achal lechoo lefafɛɛŋ.