KƐU kpeekpeiyo pa cho hoo o pinda pindaa o yɔmndo ni? Sako. A chiliŋii siaŋɛi nda toosiaa kɛuwo hoo ni. Jɛhowa dimul Muuse ni le mbo pinda pinda ndu o yɔmndo hoo maa te waŋnda nua ndu pɛ, a kinda. Kɛ kɛuwaa kpeekpeiya cho haa balɔɔ lɛŋ ni. A lɔuviaa waŋnda mi koŋ tosa nda ma naa. A sina pa le sabu koŋ?

Le mɛɛ Isɔluɛitiiya dimi diomnde wɔɔŋndeŋ a Mɛlɛka vɛlɛa Muuse yɛ. Ma ŋɔɔchiaŋ aa: ‘Le miŋ huŋ wu o pollo hoo niŋ ŋ soli naa Ichipi ni? Nyɛdiaa cho le, hali mɛŋndeŋ le cho le kolɔɔ le. Nduyɛ naŋ saŋga niŋ a manɛiyo hoo dio lɔɔ lɔɔ.’

Kɛ nyɛdiaa kɛndɔɔ pila manɛiyo wa ni. A kaamaa Jɛhowa wa nda ndu kio ni. Nduyɛ a kaamaa koni o ke nda vɛlɛ mɛŋndaŋ ni. Kɛ waŋnda haa chɔm balika melaa le nyɛ o nyɛ Mɛlɛka tosal nda le. Le sabu koŋ Jɛhowa yɔŋ kɛuwaa wɔɔŋnda haa ni le nda nyɛpalaa tuisioo choo. Mi kɛuwa haa lɔuviaa nda, mi a bɔɔ bɔɔ wu.

O mɛɛlulaŋ niŋ, mi waŋnda huŋ dimul Muuse aa: ‘Ŋ tosa hakioo, kanifuule ŋ soo diomnde wɔɔŋndeŋ a Jɛhowa vɛlɛa num. Lelaŋ nyɔɔlu Jɛhowa mbo feŋal naa kɛuwa haa.’

Mi Muuse nyɔɔlu Jɛhowa o piɛileŋ niŋ le waŋnda haa. Okoŋ, mi Jɛhowa dimul Muuse le mbo toosiaa kɛu chiliŋii siaŋaa hoo. Mbo dimul ndu le mbo pinda pinda ndu o yɔmndo maa wana o wana kɛuwo lɔwa, o nua kɛuwo hoo o yɔmndo. Mi Muuse tosa mɛɛ Mɛlɛka dimi yɛ. Wana o wana kɛuwo lɔwa ma nua kɛu chiliŋii siaŋaa hoo, ma pɛŋgi, nduyɛ a vi lɛ le.

Naa bɛɛ ŋ pɛɛku isɔɔ o hei niŋ. Naa kpede ŋ cho ko maa Isɔluɛitiiyaa kɛuwa lɔuviaa kaŋnda. Naa kpede ŋ cho tendu piɔm. Mɛɛndaŋndɔ mɛɛ waŋnda cho yuwaa, naalaŋ, vɛlɛa piɔmndo yɛ. Le yɛɛ hei cho yɛ naa? Kanifuule wana pɔnɔ a wana lanɔ tasoo, Adama nda Ifi, tuii Jɛhowa diom te. Nduyɛ naa kpou chuauwaa ndaa naŋ cho ni. Lelaŋ muŋ ndoo yɔŋnuŋ naa ni. Kɛ Jɛhowa pel naa pemaleŋ le miŋ wa achal lefafɛɛŋ.

Mi Jɛhowa yɔŋ Chiisu Kiliti po ndɔ o lɛŋndeŋ choo. Mi a bɔɔ bɔɔ yiyaŋ maa wana wɔɔŋndo o cho ni. Le hei nda baŋ ndu o yɔmndo choo ni. Kɛ le naa piŋio Jɛhowa yɔŋ Chiisu ni. Te o yɔŋ pɛ miŋ tiindaŋ o ndu niŋ, nduyɛ miŋ tol ndu kɔɔli, ŋ sɔla yoomu fafɛɛŋndo. Kɛ ŋ cho hunɔɔ chɔɔlu pɛɛku a hei okɔɔ lachi.