KOOMBIAA yɛɛnɛ kpakio Chɛliko cho yɛ hoo? Naŋ chaa tukpaa del ndu choo ni. Kɛ o cho tukpaa le. Kaamaa cheleŋ Jɛhowa ndoo tosa vɛlɛ hoo ni! Laŋ pɛɛkuŋndɔ mɛɛ i looku yɔŋnɔŋ yɛ.

Yaŋndɔ nilaŋ. Mi Jɛhowa dimul Chɔɔsuaa aa: ‘La nɔ mila balu chioo nya puaa numaa chɔuwa. La balu ndu le pilɛ o paaleŋ niŋ, tei le palɛi ŋɔmpum. Lakɔ a kɔfu kpemaa latulu. Wanaa soliaa salaa nda ŋɔmmɛu sim nya lachi a kɔfu kpemaa, nduyɛ ma wa bulula ndalaŋ hɔŋndo.’

‘O paale ŋɔmmɛuleŋ choo, la nɔ mila balu chioo bɛmbɔɔ le ŋɔmmɛu. Okoŋ mila hɔŋ bululaŋ choo choo, nduyɛ mi wana o wana fee deŋi choo choo kpeleŋ a yeelaŋ. La tosa pɛ lende, kpakio cho koombiaa!’

Mi Chɔɔsuaa nda waŋnda tosa mɛɛ Jɛhowa dimi yɛ koni. Mɛɛ nda wa chioo balɔɔ, mi wana o wana fee mei kpili. Waŋndo o pilɛ bɛɛ ve isɔɔ le. Peloŋ kinɛi wanaa tuɛi ni vɛlɛa bulula nda wa hɔŋndo laŋ. Mi sioonde bii yaamɔwaa wanaa Mɛlɛkaa Chɛliko. O wundɛi nɛɛnɛ ŋ cho yɛ kɛi siaŋaa hoo chɔɔ o baa? Wundɛi Luehaboo ni. Nyɛ suaŋsuaŋaa ŋiɔɔŋnda dimul Luehab wo o tosa hoo ni. Yuŋgu ndɔɔ kpou a cho chiɛiniŋ a ndu latulu ma wa nuaa.

Mɛɛ nda chii chioo balɔɔ bɛmbɔɔ le ŋɔmmɛu o paale ŋɔmmɛuleŋ choo, ma huaŋ bululaŋ, mi puaa chɔuwa deŋi choo choo kpeleŋ, okoŋ mi kpakio koombiaa. Mɛɛ mi Chɔɔsuaa dimi aa: ‘La diu wana o wana cho chiee loŋ, nduyɛ mila lom chioo a nyɛ o nyɛ fee cho leniŋ. Kɛ la mɛi kaniŋ humboŋ, a kooliiyoŋ, vɛlɛa chiliŋuŋ suu o suu mi la kuɛ a muŋ o maaŋ lepiɛi Jɛhowaa niŋ.’

Mi Chɔɔsuaa dimul suaŋsuaŋaa ŋiɔɔŋnda aa: ‘Lakɔ niko o chiɛi Luehaboo, mila kɔ soli ndu a yuŋgu ndɔɔ kpou o bɛɛ.’ Mi Luehab nda yuŋgu ndɔɔ sɔla kindaa, a mɛɛ suaŋsuaŋaa ŋiɔɔŋnda dimul ndu yɛ koni.