YAU pilɛ cho o Baabuiyo niŋ diolaŋ aa Lutu. Bundɛi o cho ni a yuŋgoo pum okɔɔ. Boondii wanaa kialaa ŋyamaa wa masaa Isɔluɛitiiya choo ve yuŋgoo hoo wa ni. Chua laandu fula o lɛŋnde Moabileŋ niŋndo Lutu wa ni. O ve Isɔluɛinɔ le. Kɛ mɛɛ Lutu tuei a Jɛhowa Mɛlɛka tonyaa okɔɔ, mbo duau laalaŋndo o ndu niŋ tau. Kɛ Nawomi ndu wana yuwɛiyo o wa ni. Ndu mala Lutu ni le pɛɛkoo a Jɛhowa okɔɔ.

Isɔluɛinɔɔ Nawomi wa ni. A boondii nyɛdiaa dɔɔnaŋ Isɔluɛi ve, Nawomi nda pɔnɔ ndɔ, a puaa nduaa ŋiɔɔŋnda kuɛ o lɛŋnde Moabileŋ niŋ ni. Loŋ nda wa ni mi pɔnɔ ndɔ wu. Okoŋ kɔɔli, mi puaa Nawomiaa chua Lutu nda Ɔpa o nɔlaŋ niŋ. Moabaiya chuaa laanduaa ŋiɔɔŋnda haa wa ni. Kɛ mɛɛ wɔsilaŋ tɔ la hiou, mi puaa ŋiɔɔŋaa Nawomiaa haa bɛɛ wu. Mi hei tɛɛmbuu Nawomi kɔllo tau vɛlɛa chuaa laanduaa ŋiɔɔŋnda haa. Yɛɛ Nawomi cho yɛ niko tosa?

Mɛɛ paale pilɛ mi Nawomi kɛɛsiaa le mbo miiŋguŋ o ndulo chiee pila naa wanaa nduaa cha. Kɛ Lutu nda Ɔpa yeema le kɔlaŋ nda ndaa. Le hei, ma tual ndu kɔɔli. Mɛɛ nda kuɛ tiŋ sii, mi Nawomi muliŋ o chuaa laanduaa haa lo mbo dimul nda aa: ‘La miiŋgu chiee mila kuɛ o kalaa nyaa lo.’

Mɛɛ mi Nawomi sɔsa nda kuulaŋ mbo choŋguŋ nda aa la diiyoo. Le mɛɛ ndaa kaala Nawomi tau yɛ, ma kandu dimio o chaŋndo niŋ aa: ‘Ŋ kɛɛ! Ŋ cho lakɔ naa nyaa o wanaa numnda lo.’ Kɛ mi Nawomi dimul nda aa: ‘La miiŋgu chuauwaa niaa. O naŋ bɔɔ mila wa o lanyalo.’ Mɛɛ mi Ɔpa ndu bii miiŋgɔŋndo. Kɛ Lutu ndu miiŋgu le.

Mi Nawomi muliŋ mbo dimul ndu aa: ‘Ɔpa miiŋguŋ. Num bɛɛ tol ndu kɔɔli mila miiŋgu.’ Kɛ mi Lutu mulul ndu aa: ‘Tosa mi faŋaŋ num kɔɔli le! Ŋ kɔ naa num latutu. Naa ŋ kuɛ pɛ, loŋ ya bɛɛ cho lakɔ ni, nduyɛ naa ŋ wa pɛ, loŋ ya bɛɛ cho wa ni. Wanaa numnda cho simnɔŋ wanaa niaa, nduyɛ Mɛlɛka numndo cho simnɔŋ Mɛlɛka nuu. Naa ŋ cho wu wa ya bɛɛ cho wu ni, nduyɛ loŋ koni nda cho ya chɔ ni.’ Mɛɛ Lutu chii sɔɔŋ muŋ dimi kpou, Nawomi kindiŋ lɛ pɛŋ le ndu miŋgi le.

O mɛɛlulaŋ kpɔŋ ma fuuluu Isɔluɛi. Loŋ nda wa niŋ o chaltaŋ ni. Mi Lutu kandu bɛɛ wallo o chiɛiniŋ. Nduyɛ a boondii keŋ kinɛi waŋnda kandu tɔlɔɔ pum kowɔɔ o chiɔŋndaŋ niŋ ni. Tɔlɔɔ hoo velaŋndo pila a maaloŋ. A veelu ndu aa baliiyoŋ. Po pum wa loŋ diolaŋ aa Bowaa. Mbo chɛl le mi Lutu kɔ wa baliiyoŋ kowɔɔ o chiɛi nduɛi niŋ. A sina pa kalaa Bowaa? Kala ndɔ wa Luehab wa koŋ Chɛliko chiee wo ni.

Mi Bowaa dimul Lutu paale pilɛ aa: ‘I tuei nyɛ o nyɛ a num okɔɔ, nduyɛ mɛɛ kpɛ ŋ cho Nawomi malaa yɛ. I sina maa a mɛi finya num, a kala num, a lɛŋnde numndeŋ, ma huŋ chal wanaa ŋ sina paale pilɛ bɛɛ lia tɛɛŋ. Maa Jɛhowa dɔu num sala fɔ!’

Mi Lutu muli aa: ‘A tosalla bɔɔ kɛndɛi fallo. A nɛŋi ya kɔllo a mɛɛ ŋ chaa suɛi o yalo yɛ.’ Mi Bowaa hɛnaŋ a Lutu tau, nduyɛ o viu bɛɛ le ma chal o nɔɔ niŋ. Mi hei nɛŋi Nawomi kɔllo tau! Kɛ Nawomi bii kɔl naŋɔɔ fau mɛɛ Lutu nda Bowaa velu po nda tasoo diolaŋ aa Obɛɛ. Okoŋ kɔɔli, mi Obɛɛ simnuŋ finya mamaa le Deeve, o naŋ nɔ le hunɔɔ pɛɛkoo tau a ndu wo.