A SINA pa taŋgul cho hoo wo? Maaŋndo o teŋgeŋndo le Jɛhowa piɛyo o cho ni. A veelu ndu vɛlɛ aa toŋgo biyaa bɔŋaŋndo. Wɔsio pilɛ waŋnda haa chii ni le ndu taŋgullo fula ndaa Ichipi. A sina pa wana dimul nda le taŋgullo hoo wo?

Jɛhowa dimul nda ni. Teleŋ Muuse wa o pembii Sainai ve choo wo, mi Jɛhowa dimul ndu mɛɛ o nɔ mbo taŋguluŋ yɛ. Mbo dimul ndu le ma taŋgul ndu mɛɛ nda tiu ba ma bɛɛŋuu ndu yɛ. Okoŋ, te o yɔŋ pɛ ma wa kɔlaŋ naa cheleŋ, a tiu ba ma chua o nda bɛɛŋuu koŋndo ma miŋgi ndu taŋgul vɛlɛ. Lelaŋ te Isɔluɛitiiya ndaa wa pɛ hiouwɔɔ naa cheleŋ o pollo niŋ, a bɛɛŋuu maaŋndo hoo a kuɛŋnuŋ a ndu.

O yɔŋ pɛ ma tofa o lumuii pɔmbɔɔ niŋ o maaŋndo hoo mɛɛlulaŋ kpɔŋ, a cho kɔfoo chɔ. O veeluŋ aa kɔfu kpemaa. O nɔ maalikɛiyaa nda toosiaa a kooliiyoŋnda a ŋiɔɔŋ lechoo. Hoo cho kpeŋgei hei, mi o pilɔɔ wa kpeŋgei pilɛi. Mi Mɛlɛka poonyiaa vɛlɛ Sawala ndɔla Tɔlaŋ o pouta yɛndɛlaŋ la tiɔɔŋ choo, kanifuule Muuse pesi la tase laŋ. Nduyɛ poutaŋ ndaŋ bɛɛ la wa la kɛsiaa o kɔfu kpemaa hoo niŋ. Kpɛɛnɛi manɛiyo wa vɛlɛ ikɛsiɛi leniŋ. A loonuŋ pa nyɛ manɛiyo cho wo?

Eelɔŋ bɛndoo Muuse, Jɛhowa ndoo yulu iso ni le mbo wa masa wanaa soliaa salaa. Ndu ndoo sim waŋnda lachi ni le Jɛhowa piɛyo. Puaa nduaa bɛɛ wanaa soliaa salaa le Mɛlɛka nda wa ni.

Tofawɔ niko luimui bɛndu maaŋndo hoo. O chua luimui pɔmbɔɔ hoo lediiŋ. A cho pa kɔfoo chɔɔ mi kumnde wa fulaa o bolleŋ? Lechoo wana soli salaa le Mɛlɛka wo ndoo luam nyɛm chuŋ kɛndɔŋ ni. Nyɛ kɛsiaa la lambuiyo cho isisi loŋ a lambuilaŋ lechoo la ŋɔmmɛu. Nduyɛ nyɛ yaandɔɔ o lumuiyoo niŋ cho tibiiyo ni. Beediiyo kpuŋgbaŋ 12 ndaa kɛsi lechoo ni.

Kpɛɛnɛi bɛnduei wa ikɛsiaa o maaŋndo hoo ikɛi a mɛŋndaŋ leniŋ ma piaa cha. Maŋ wana soli salaa le Mɛlɛka wo ndoo soliŋ kpeku ni. Bandu bɛndoo wa vɛlɛ loŋ. Lechoo ndaa luam visiaa ndaa dii le salaa solio o Jɛhowa lo wa ni. O kampii ndaa tɛɛŋ deŋ maaŋndo hoo wa o taŋgulaŋ ni, nduyɛ Isɔluɛitiiya cho a balaa ndu silɔ o tɛndiila ndalaŋ niŋ.