A NƆLA pa ma chɔm nyɛ waŋnda haa cho hoo chɔuviaa lɛŋndo? O humbu o cho ni. Naa ndu musu musu maa ŋbeŋgu. Kɛ o cho ŋbeŋgu le. Nyɛdiaa suu cheleŋ o cho ni.

Chɔŋ a faŋaŋ Isɔluɛitiiya Ichipi naapum paŋgei ipilɛ ndaa chua wɔ o pollo niŋ ni. Nyɛ o nyɛ ndoo niŋ loŋ lapi le. Le hei, mi waŋnda kandu ŋɔɔchiaŋndo aa: ‘Ndoo bɛnda bɔɔ pɛŋ mi Jɛhowa ndoo dii naa Ichipi. Kanifuule loŋ ndu nyɛdiaa kɛ kɛ fee naŋ yeema pɛ miŋ sɔla.’

Le hei mi Jɛhowa dimi aa: ‘I cho tosa mi nyɛdiaa wa fulaa choo choo mbo deli lɛŋ.’ Nduyɛ mi Jɛhowa tosa mi nyɛdiaa hoo deli. Diimandɔɔ pilɔɔ mɛɛ Isɔluɛitiiya che nyɛ humbu deli hoo lɛŋndo, ma wa nyuuniaŋndo aa: ‘Yɛɛnɛ cho yɛ hoo?’

Mi Muuse dimul nda aa: ‘Nyɛdiaa Jɛhowa ke nya le dio wo cho hoo ni.’ Mi waŋnda veelu ndu aa MANA. Yeela ndɔɔ naŋ chaa kekii nda toosiaa a liaŋndo ni.

Mi Muuse dimul waŋnda aa: ‘Wana o wana fee chua mɛɛ ŋ nɔla le dio yɛ.’ Nyɛdiaa hoo idii o idii ndaa chua ndu ni. Kanifuule te paaleŋ le kendu pɛ ŋama ŋama, manɛi lo lɛŋndo teŋgaŋ.

Mi Muuse dimi vɛlɛ aa: ‘Wana o wana lɔli nyɛdiaa hoo kuya le.’ Kɛ waŋnda apum yeŋ Muuse nilaŋ te. A sina pa nyɛ ndoo yɔŋnuŋndo? Mɛɛ paaleŋ le sɛ diimandɔɔ, manɛi nda kɛsi wo mi chaa pia leniŋ cha nduyɛ mbo kandu chuŋ siouwo!

Mi Jɛhowa ndoo dimul nda le ma chua manɛiyo le palɛi ndii ŋiiŋ o paale ŋɔmpumndeŋ choo o lɔɔ bɛŋgu. Nduyɛ, mi Jɛhowa dimi le ma kɛsi otiŋ le paaleŋ le pilɛleŋ, kanifuule o tosa niŋ mi o kɛ kɛ deli o paale ŋɔmmɛuleŋ choo le. O koŋ te a kɛsi manɛiyo le paale ŋɔmmɛu leŋ pɛ, chaa bɛɛ luei leniŋ te nduyɛ o fula vɛlɛ chuŋ siou le! Kaamaa cheleŋndo wa vɛlɛ koŋ ni!

Wɔsila Isɔluɛitiiya chii o pollo niŋ kpou laŋ manɛiyo Jɛhowa wa nda kio ni.