TOFAWƆ Chɔɔsuaa. Dimio o cho ni aa: ‘Paaleŋ, chuu wɔ le fɔ!’ Nduyɛ lekɛndɛi mi le niilu isisi kpɛŋ. Kɛ Jɛhowa tosa ni mi le sim. Ŋ tofaŋndɔ le nyɛ Chɔɔsuaa ndoo dimi maa paaleŋ le chuu wɔ loo.

Boondii masaa ŋuɛɛnuaa wɔɔŋnda o lɛŋnde Kenaŋndeŋ niŋ kandu sɔŋgaa a Kiibiɔnaitiiya ve, mi Kiibiɔnaitiiya viam wana veelaa o Chɔɔsuaa lo le mbo huŋ mala nda. Mi wana veelaa kɔ dimul Chɔɔsuaa aa: ‘Yandii, keleŋa hunɔɔ chɔ chɔ! Kiindiaa naa! Masaa cho o lɛŋnde ipembuleŋnda hiŋ le buɛiyaa numnda chɔulabaa.’

Tamala bɛɛ Chɔɔsuaa a puaa nduaa chɔuva yɔŋ te, ma biyaŋ kɔlaŋ. Ma lɔl kɔlaŋ pii nɛi tɛɛŋ. Mɛɛ nda fuuluu Kiibiɔŋ, mi sioonde bii puaa chɔuwaa masaa ŋuɛɛnuaa haa. Okoŋ ma kandu kiltaŋ. Mɛɛ mi Jɛhowa tosa mi looŋ kpuŋgbaŋ fula choo choo mi ŋ deli puaa chɔuwa haa choo. Mi ŋ diu puaa chɔuwa tau mbo hiau bɛɛ a Chɔɔsuaa nda puaa nduaa chɔuwa diu wa.

Chɔɔsuaa che niko maa paaleŋ le hiŋ chuunɔŋndo. Nduyɛ te nyumndaŋ ma tol pɛ, puaa chɔuwaa masaa ŋuɛɛnuaa haa cho nyaanɔŋ. Le saboo hoo Chɔɔsuaa ndoo piɛi o Jɛhowa lo ni mbo dimi maa: ‘Paaleŋ, chuu wɔ le fɔ!’ Mɛɛ paaleŋ le miiŋgu fulaa, mi Isɔluɛitiiya tiu ba ma yam chɔuwo.

Masaa wɔɔŋaa ndaa tul wanaa Mɛlɛkaa leyɛa wa wɔ a hɔbɛi Kenaŋ. Masaa 31 Chɔɔsuaa nda puaa nduaa chɔuva tiu ba o lɛŋnde leŋ niŋ ni. Le ma tiu masaa haa ba, mbo chua nda le suɛi wɔsila ŋɔmpum. Mɛɛ hei hiou fokpi, mi Chɔɔsuaa cha maa kaala nɔ wɔ fondaŋ te laŋ, a nɔ ma piɔu nda lɛŋnde Kenaŋndeŋ tɛɛŋ.

Mɛɛ wɔsila bɔɔ bɔɔ la hiou, mi Chɔɔsuaa wu. O wa wɔsilaŋ 110 mbo wu. Boondii Chɔɔsuaa a waŋ banaa Isɔluɛi wa wɔ achalle, mi Isɔluɛitiiya ndaa diikuŋ Jɛhowa. Kɛ mɛɛ wanaa kɛndiaa haa chuu wu kpou, mi waŋnda kandu bɛɛ sɔɔŋ wɔɔŋndoŋ tosaa. Nduyɛ, mi hei chuu nda kpundɔɔ. Teleŋndo hoo kpeekpei nda yeema mala Mɛlɛkaa ni.