ACHO pa chɔɔ nyɛ cho hoo yɔŋnɔŋndo naŋndo? Kolɔɔ puaa tunduŋ haa wa cho ni. Puaa chɔuwa Isɔluɛi nda kpou cho ni. Masaa Kiidiɔŋ sim koŋ nda choo ni. O cho mɛɛndaŋndo mɛɛ kpɛ nda cho mɛŋndaŋ kolɔɔ yɛ.

Tofawɔ puaa haa naŋ nyɛkɛndɛi. A cho mɛŋndaŋ kolɔɔ o nɛila yɛ yɛlaŋ niŋ. Apum naŋgu bolle kpu o peelo ma chiŋaŋ maŋ. Kɛ o pilɔɔ ndu kɔndu maŋ a ba. O cho kolɔɔ mbo mɛɛndaŋ kɔɔli kɔɔli le mbo che nyɛ cho wa ndu yɔŋnɔŋndo ikɛiyo. Hei cho suɛi sɔwɛ, kanifuule, lende Jɛhowa dimul Masaa Kiidiɔŋ ni, le mbo hɛli wanaa cho wa kolɔɔ ma mɛɛndaŋ kɔɔli kɔɔli wa kinɛi. A tuaa, mi Mɛlɛka dimi maa o miŋgi nda chiee. Ŋ tofaŋndɔ le sabu koŋ.

Kpundɔɔ komal vɛlɛ Isɔluɛitiiya tau. Le yɛɛ? Le mɛɛ nda tuii Jɛhowa diom te yɛ. Waŋnda o lɛŋnde Miidiaŋndeŋ niŋ huŋ del nda choo ni, okoŋ ma tuisi nda nyɛpalaa choo. Le hei, mi Isɔluɛitiiya mɛli yeelaŋ o Jɛhowa lo le mbo mala nda. Nduyɛ mi Jɛhowa yaŋ nilaŋ o yeela ndalaŋ.

Yaamɔɔwaa simul Isɔluɛitiiya wa 135,000. Le hei, mi Jɛhowa dimul Masaa Kiidiɔŋ le mbo chua puaa chɔuwa. Okoŋ mi Masaa Kiidiɔŋ chuuŋgiaa nda 32,000. Kɛ a koŋ tu, mi Jɛhowa dimul Masaa Kiidiɔŋ aa: ‘A chua bɔɔ puaa chɔuwa.’ Le yɛɛ Jɛhowa dimi yɛ lende?

Kanifuule te Isɔluɛitiiya kɔ yom pɛ chɔuwo, a cho yiyaŋ maa nda pila yem ndu ni. Naapum ma yiyaŋ pɛŋ maa mi Jɛhowa mala nda bɛɛ le, a yam chɔuwo. Lelaŋ mi Jɛhowa dimul masaa Kiidiɔŋ aa: ‘Dimul puaa numaa chɔuwa maa wana o wana nɔ sioonde o miiŋgu chiee.’ Mɛɛ Masaa Kiidiɔŋ dimul nda, puaa nduaa chɔuwa 22,000 miiŋgu chiee ni. Mi puaa nduaa chɔuwa lo 10,000 kinɛi le kɔlaŋ sɔŋgaa a puaa chɔuwaa 135,000 haa.

Kɛ mi Jɛhowa dimul ndu aa: ‘Yaŋndɔ nilaŋ! Puaa cho wɔ bɔɔ num o ba.’ Le sabu koŋ, mbo dimul Masaa Kiidiɔŋ le mbo dimul puaa haa ma huŋ kol o pee pɔmbɔɔ hoo, nduyɛ maa wana o wana baŋ pɛ bolleŋ o pioo niŋ le kolɔɔ, o miŋgi ndu chiee. Mi Jɛhowa dimul ndu aa: ‘I cho num kpaayaa ke ma yem chɔuwo a puaa chɔuwaa 300 wa haa kolɔɔ ma mɛɛndaŋ kɔɔli kɔɔli wa.’

Boondei fuuluu niko le sɔŋgɔɔ. Mi Kiidiɔŋ piɔu puaa 300 wa tɛɛŋ kundalaŋ sala yaa. Mbo ke wana o wana fee bulu hɔŋaa, vɛlɛa sani lambuiyo. O wa niŋ maa teleŋ ditɛɛŋndo kinɛi, mi nda kpou diinuŋ o kampii yaamɔɔwaa ndaa ikɛi. Okoŋ, mi nda kpou huaŋ bulula ndalaŋ diom pilɛ, nduyɛ ma pesi pesi sanila lambuila ndalaŋ, ma deŋi choo choo aa: ‘Muɛi Jɛhowɛi a Kiidiɔŋ!’ Mɛɛ yaamɔɔwaa ndaa tendu o luaŋ, ma lakasiaŋ kpou, nduyɛ mi sioonde bii nda. Nda kpou ma kandu nyaanuŋndo. Okoŋ, mi Isɔluɛitiiya yam chɔuwo.