ASINA pa laŋunɔ kpaaya bɛndu wa o chieeŋndo choo wo diolaŋ? Wana kialaa ŋyamaa o wa ni diolaŋ aa Samsiŋ. Jɛhowa ke Samsiŋ kpaaya koŋ ni. Kɛ tuupa mi Samsiŋ vialuŋ, mi Jɛhowa dimul kala ndɔ aa: ‘A cho hunɔɔ suŋ poo violɔɔ. Ndu cho wa simlachioo ni le Isɔluɛitiiya piŋioo Filitiaŋnda o ba.’

Filitiaŋnda wa bɔɔ wanaa wɔɔŋ. O lɛŋnde Kenaŋndeŋ niŋ nda wa ni. Ndaa nɔ laŋgbaa chɔuva a hɔbɛi, nduyɛ mi ndaa tuisi Isɔluɛitiiya nyɛpalaa choo. Paale pilɛ mɛɛ Samsiŋ wa kɔlaŋ naa Filitiaŋnda cho wa, mi kpɔkuŋ bɛndoo fulal ndu fɛlɛmɛndɛŋ. Mbo huŋ ndu o ibuŋ a yolɛi hɛku hɛku. Kɛ mi Samsiŋ dii ndu pɛ a laba. Mi Samsiŋ dii vɛlɛ Filitiaŋaa wɔɔŋaa kaŋ o kɛmɛlaŋ niŋ.

Okoŋ kɔɔli, mi Samsiŋ kaala chua laandu pilɛ diolaŋ aa Dilaila. Mi simlebolla Filitiŋ kpou dimul Dilaila maa, te o chɔm nda pɛ nyɛ tosa mi Samsiŋ nɔ kpaaya bɛndu koŋndo, wana o wana fee cho ndu ke kaniŋ humboŋ 1,100. Dilaila yeema kanioŋ muŋ kpou. Pesiŋ bɛɛ o cho ndiaamɔɔ kɛndɛ le Samsiŋ te, kɛlɛŋgaa bɛɛ le wanaa Mɛlɛkaa. Le hei mbo lambaŋ Samsiŋ nyuniaa le mbo chɔm ndu nyɛ tosa mbo nɔ kpaaya bɛndu koŋndo.

Dilaila lo Samsiŋ fɛfɛlaa tei mi Samsiŋ chɔɔmuu nyɛ ke ndu kpaayaa wo. Mbo dimul ndu aa: ‘Kani bɛɛ I sendi wɔ yiiŋii nii le. Chɔŋ a violɔŋ nuu, mi Mɛlɛka siiŋguu ya Nasaluɛinɔɔ, koŋ cho ni maa, buɛi teŋgeleŋ Mɛlɛka hɛli wo. Kɛ te o yɔŋ pɛ mi sendi yiiŋii nii, kpaaya nuu chuu fiou.’

Mɛɛ Dilaila tuei hei, mbo tosa mi Samsiŋ lɔl ndu o bɛŋgu kpɔnyɔ. Okoŋ mbo veelu laŋgbanɔɔ o pilɛ mbo huŋ sendi ndu yiiŋnde miau. Mɛɛ Samsiŋ tendu, mbo sinaŋ maa kpaaya ndɔɔ kuɛŋnuŋ. Mɛɛ mi Filitiaŋnda huŋ bii ndu, okoŋ ma pesi ndu hɔltaŋ, nduyɛ ma siiŋguu ndu chɛ ndaa.

Paale pilɛ, Filitiaŋnda ndaa nɔ dunyɛi bɛnduei le sooloo mɛlɛka ndaa diolaŋ aa Dekɔŋ. Ma soli Samsiŋ paale leŋ o chiɛi manyumndo niŋ le ndu mamɔɔ. Kɛ nduyɛ yiiŋii Samsiŋnde ndii vil niŋ vɛlɛ nyɛ kɛndɛ yukɔŋ. Mi Samsiŋ lo loŋ mbo dimul poombɔ wa ndu baa saa wo aa: ‘Yandii malaya mi pilaŋ suŋgbuma chiɛiyo.’ Okoŋ mi Samsiŋ piɛi o Jɛhowa lo le mbo ke ndu kpaayaa. Mbo kinduŋ tuaŋ mbo deŋi choo choo kpeleŋ aa: ‘I wu wɔ naa Filitiaŋnda latulu.’ Filitiaŋnda 3,000 kpulukuu wa o dunyɛi keŋ choo paale leŋ ni. Mɛɛ suŋgbuma chiɛiyo ma yomi yomi, mi chiɛiyo komba Filitiaŋaa 3,000 wa haa choo wɔlɔ wɔlɔ, ma wu paku.