NUAWƆ isɔɔ se! Isɔluɛitiiya cho Pioo Chɔɔdaŋ taŋɔɔ! Kɛ ɔɔ mɛŋma kalaŋ? Kanifuule sialteŋ le wa niŋ, boondii piɔɔ sia sia bɛndoo ve, nduyɛ mɛŋndaŋ ma laŋga wa ma piaa suŋ o peelo tuupa ma chaŋ hunɔɔ. Kɛ tofawɔ, mɛŋndaŋ ma velaŋ kpou. Isɔluɛitiiya cho taŋɔɔ o lɛŋnde vesɛileŋ choo. O cho ko mɛɛ nda taŋ Pee Mɛŋma Siaŋaa yɛ. Kuɛɛnɛ mɛŋma kaakuu waŋ kpou ma hiou yɛ? Ŋ yaasiaŋndɔ.

Teleŋndo fuuluu niko le mi Isɔluɛitiiya taŋ Pioo Chɔɔdaŋ. Mɛɛ mi Jɛhowa dimul Chɔɔsuaa le mbo dimul waŋnda kpou aa: ‘Wanaa soliaa salaa chua kɔfu kpemaa ma hiou lachi. Te a tuisi dɔɔ peluŋ ndaŋ o Peelo pɛ, mɛŋndaŋ ma cho pɛŋgi hiouwɔɔ.’

Mɛɛ mi wanaa soliaa salaa le Mɛlɛka chua kɔfu kpemaa ma hiau a ndu waŋnda lachi. Mɛɛ nda fuuluu o Pioo Chɔɔdaŋ, ma cha mɛŋndaŋ hiouwɔɔ wolu wolu bɛndoo pila, nduyɛ yiŋgilaa pila maa yiŋgila ni. Kɛ mɛɛ wanaa soliaa salaa le Mɛlɛka tuisi dɔɔ peloŋ o peelo, mi mɛŋndaŋ ma pɛŋgi bɛɛ hiouwɔɔ. Nuawɔ kaamaa bɛndu se! Kandaa Jɛhowa ndoo kanda maŋ a maluaŋ ni. Le hei, mi mɛŋndaŋ ma vela o peelo sɛɛŋ.

Mi wanaa soliaa salaa wa kɔlaŋ a kɔfu kpemaa wa kɔ sim o pee mɛŋma velɛi kalaa tɛɛŋ kpeekpei. A cho pa nda chɔɔ o fotueiyo hoo niŋ? A lo isisi loŋ tei mi Isɔluɛitiiya kpou taŋ Pioo Chɔɔdaŋ o lɛŋnde vesɛileŋ choo.

Mɛɛ waŋnda kpou chuu taŋɔɔ, mi Jɛhowa dimul Chɔɔsuaa aa: ‘Dimul laŋgbaa kɛsuŋ kalaa 12 ma tol o peelo ma kuɛ naa wanaa soliaa salaa cho isisi a kɔfu kpemaa wa. A chɔuviaa poutaŋ 12, ma kɔ heelu laŋ bemboo naa nya cho malɔ chuɛllɛŋnda. Te o yɔŋ pɛ mi chuauwaa nyaa nyuna nya o chilaŋ niŋ le nyɛ poutaŋ daŋ la simndo, la dimul nda maa boondii naŋ wa taŋɔɔ a kɔfu kpemaa ve, mi Jɛhowa tosa mi mɛŋma Chɔɔdaŋ ndaŋ ma pɛŋgi hiouwɔɔ. Poutaŋ ndaŋ lacho nya loonɔŋ a kaamaa hoo ni.’ Mi Chɔɔsuaa deŋgela vɛlɛ poutaŋ 12 naa wanaa soliaa salaa wa isisi o pee velɛiyo tɛɛŋnda.

O mɛɛlulaŋ kpɔŋ, mi Chɔɔsuaa dimul niko wanaa wa kɔlaŋ a kɔfu kpemaa wa aa: ‘La hel niko Chɔɔdaŋ o kɔŋgɔ.’ Mɛɛ nda hel dɔɔ o kɔŋgɔ, mi mɛŋndaŋ ma kandu vɛlɛ hiouwɔɔ.