SƆƆL wa vɛlɛ kindiŋndo le Deeve biyɔɔ. Mbo chua sowɛiyaa nduaa chaa chɔuwo wa 3,000 mbo kua Deeve nuuviaa. Mɛɛ Deeve tuei a hei okɔɔ, mbo viam suaŋsuaŋnda le ma kɔ tofa naa Sɔɔl nda puaa nduaa cho malɔ ichɔl koŋnda. Okoŋ, mi Deeve nyuna puaa nduaa a ŋiɔɔŋ aa: ‘Nɛɛnɛ cho yɛ ya liila o kampii Sɔɔl cho niŋndo?’

Mɛɛ mi Abisha muli aa: ‘I cho num liila.’ Sɛluya velu Abisha ni, yemaa Deeve. Mi Deeve nda Abisha kua sɔɔ sɔɔ o kampiiyo niŋ. A boondii keŋ, Sɔɔl nda puaa nduaa wa o luaŋ. Mɛɛ ma chua nyɛ Sɔɔl ndoo kol mɛŋndaŋ leniŋndo vɛlɛa bal ndɔɔ. La wa la kɛsiaa ndu o bolleŋ ikɛi kpɛɛluŋ. Wana o wana chi nda le kɛlɛŋgaa bɛɛ ma tuei nda, kanifuule nda kpou wanuŋ o luaŋ fikpi.

Tofawɔ niko Deeve nda Abisha. A hɛli hɛliŋnda yɛlɛkɛlɛɛ ma kɔ helnuŋ o pembei tullo pɔ. Mi Deeve deŋi choo choo o masa sowɛiya Isɔluɛi lo aa: ‘Abina seei, le yɛɛnɛ a cho masanɔ numndo manda le? Tofawɔ! Ɔɔ nyɛ ndɔ kolaa mamɛŋndo vɛlɛa bal ndɔɔ?’

Mɛɛ mi Sɔɔl tiandu. Mbo sina maa diomnde Deeveleŋ ni, okoŋ mbo nyuna aa: ‘Num cho koŋ ni Deeve?’ Abina nda Sɔɔl ŋ cho kaŋ chɔɔ a matoo naa ni.

Mɛɛ mi Deeve mulul Sɔɔl aa: ‘Yani yoo masanɔ nuu.’ Mi Deeve nyuna ndu aa: ‘Le yɛɛ ŋ cho yɛ kindiŋndo le ya biyɔɔ? Baa iwɔɔŋnde ya tosal num ni? Ache bal numndo masa nuu, viom puaa numnda o pilɛ mbo huŋ bii.’

Mi Sɔɔl sɔlɔlaŋ aa: ‘I tosa iwɔɔŋnde. Diɔmii fonduei fuu ya tosa hei ni.’ Okoŋ mi Deeve hiau loŋ choo, nduyɛ mi Sɔɔl bɛɛ miiŋguŋ chiee. Kɛ mi Deeve dimuluŋ ndupila aa: ‘Te I lo naŋ pɛ, o waniŋ o lepaa niŋ, Sɔɔl cho ya diyɔɔ.’ Lelaŋ, I cho nyaanɔŋ o lɛŋnde Filiitiŋndeŋ niŋ.’ Nduyɛ lekɛndɛi mbo tosa lende. Mi Deeve tiuba mbo hui Filiitiaŋnda. Mbo tosa ma laalaŋ maa o cho wa o kpeŋgii ndɛi choo.

Mɛɛ boondii biŋgi ihiou, mi Filiitiaŋnda kua chɔulabaa a Isɔluɛitiiya. O chɔulaba koŋ niŋ nda dii Sɔɔl a Chɔnataŋ ni. Mi hei tɛɛmbuu Deeve kɔllo tau, nduyɛ mbo poonyiaa chondii kɛndɛi. Mbo soli ndi aa: ‘I tambu kɔl le num, bɛnuu Chɔnataŋ. A wa bɔɔ wana sɔwɛ o yalo!’

O hei kɔɔli, mi Deeve miiŋgu Isɔluɛi, o chioo Hibulɔŋ niŋ. Kɛ o komal sɔŋgaa puaa ndaa hɛli Isibosɛɛ, po Sɔɔllo le mbo wa masaa wo, a puaa ndaa yeema mi Deeve wa masa wo tɛɛŋ. O mɛɛlulaŋ kpɔŋ, mi puaa wa Deeve kɔɔli wa sɔla di. Deeve wa wɔsilaŋ 30 mbo sul masa. O wa o masaleŋ choo Hibulɔŋ le wɔsilaŋ la ŋɔmmɛu a tɛndaa tɛɛŋ. Chuauwaa o velu loŋnda cho haa ni; Amɔŋ, Abisalɔm a Adonaicha.

Boondei fuuluu niko le mi Deeve nda puaa nduaa kɔ bii chiee kɛndɛ bɛndu nda veelu aa Chulusalɛmndo. Sɛluya, yemaa Deeve ndoo nɔ po cheleŋ diolaŋ aa Chowabi. Ndu ndoo sim chɔu kalaa lachi ni. Le hei, mi Deeve siiŋguu Chowabi masaa le puaa nduaa chɔuwa. Mɛɛ mi Deeve kandu niko masale ndɔleŋ o chioo Chulusalɛm niŋ.