FOTUEI kpele hɛnɛkiɔɔ cho hoo ni. O cho ko maa o Mɛlɛka ndoo chɔm wana ndɔ suaa Aisaiya o yilɛŋnde niŋnde. Mɛɛ Chona vi dɔɔ, o viu le mi Aisaiya vialuŋ.

“Kpele hɛnɛkiɔɔ cho machuaa fondaŋ kɛndɛ bɛndu.” Kpeloo hoo yiyalaŋ num a o naŋ che niŋ paandu o yauwo hoo niŋndo. O naŋ bɔɔ nua. A che ndu pɛ aa kpele kɛndɛ bɛndu Mɛlɛka ndoo toosiaa koŋ le Adama nda Ifi wo ni. Vɛ, lende le? Kɛ chieeŋndo kpou simnuŋ niŋ pa kpele hɛnɛkɛ nɛ?

Mi Jɛhowa dimul wana ndɔ suaa Aisaiya le mbo poonyiaa a kpele hɛnɛkɛ sɛnɛi cho hunɔɔ le wanaa Mɛlɛkaa wa okɔɔ. Mbo dimi aa: ‘Visi biyaa nda saa a cho wa naapilɛ o kɔl nyuloo niŋ. Nau chuaa nda kpɔkuŋ chuaa wa niŋ diolaŋ naapilɛ, nduyɛ chuaambuaa pɔmbuaa wa niŋ pisultaŋ a nda. Chɛlɛkpɔɔ pisul niŋ kɛuwo ikɛi, o yɔŋ ndu niŋ nyɛ le.’

Mi wanaa bɔɔ bɔɔ dimi dɔɔ aa: ‘Hei yɔŋnuŋ niŋ fɛɛŋfɛɛŋ te, kani bɛɛ kpundɛlaŋ tuŋ lacho wɔ o chieeŋndo hoo choo ni, nduyɛ la chuu niŋ te.’ Kɛ nyunaŋndɔ numpila: Naa chalaa suu kuɛɛ Mɛlɛka ndoo ke yɛ Adama nda Ifi?

O kpele hɛnɛkiɔɔ niŋ Mɛlɛka ndoo wou Adama nda Ifi ni. Le mɛɛ nda kɛɛ Mɛlɛka diom tueiyɔɔ yɛ tosa ni mi chiee nda kɛndɛ bɛndu koŋ hialuŋnda. Nduyɛ ma yuwa, okoŋ ma wu. Mɛlɛka mɛi lediom maa o cho hunɔɔ wanaa kaala ndu wa ke nyɛ hɛluŋ koŋ Adama nda Ifi wo.

O Kpele hɛnɛkɛ sɛnɛi cho hunɔɔ wo niŋ, nyɛ nɛiyaa ve niŋ te, kɛlɛŋgaa mi nyɛ num tambu. Kɔl nyulu kpeekpeiyo wa niŋ. Waŋchieeya kpou nɔ niŋ kɛndiaa kɛndɔɔ vɛlɛa nyaaloo. O cho wa mɛɛ mɛɛ Mɛlɛka ndoo yeema ndu le waa o kandɔŋndo yɛ. Kɛ ŋ cho hunɔɔ chɔɔlu pɛɛku a hei okɔɔ mɛɛ Mɛlɛka looku niŋ ndi tosa yɛ.