NUAWƆ poo hoo o mɛŋndaŋ niŋ. O kpundɔɔ pila niŋ o cho naa ni. Vɛ, lende le? Suu koŋ cho ndu hunɔɔ miolɔɔ. A sina pa poo hoo? Diola ndɔlaŋ aa Chona. Ŋ nuaŋnuŋndɔ mɛɛ o looku luɛiyɔɔ o kpundɛ waa naa niŋ yɛ.

Wana suaa le Jɛhowa wo Chona wa ni. Mɛɛ nyɔɔ viou kpɛɛ o piɔm Ilaisiaa kɔɔli, mi Jɛhowa dimul Chona aa: ‘Kɔ o chiee bɛndoo Ninivɛ. Yɔŋ wɔɔŋ wanaa kaŋ ndoŋ o cho bɔɔ. I yeema num ma kɔ sila nda a yɔŋ wɔɔŋ koŋ okɔɔ.’

Kɛ Chona ndoo yeema lakɔ le. Lelaŋ, o dɛndɛ ve bɛɛ lakɔ Ninivɛ loo niŋ o luɛinuŋ ni. Jɛhowa niŋ kɔl a nyaanɔŋ Chona cho hoo wo le. Le hei, mbo tosa mi hueiyii wɔɔŋii bɛnduɛi kandu hɔŋndo. Okoŋ mi dɛndɔɔ huŋ le mɛɛyaa. Mi sioonde bii wanaa wa kɔlaŋ a dɛndɔɔ wa tau. Mɛɛ ma kandu chaŋndo o mɛlɛkaa ndaa lo le malaa.

O mɛɛlulaŋ niŋ kpɔŋ, mi Chona sɔlɔlaŋ aa: ‘Jɛhowa ya piɛi ni, Mɛlɛka toosiaa choo choo a lɛŋndeŋndo. Nduyɛ, viomɔɔ ndɔɔ ya cho nyaanɔŋndo ni.’ Mi wanaa wa kɔlaŋ a dɛndɔɔ wa nyuna ndu aa: ‘Yɛɛ kpeekpei naŋ tosal lɛ num le mi hueiye hei pɛŋgi hɔŋndo?’

Mɛɛ mi Chona mulul nda aa: ‘La malla o peelo, okoŋ mɛŋndaŋ ma cho pɛŋgi hiilɔŋndo.’ Wanaa wa kɔlaŋ a dɛndɔɔ wa ndaa yeema ndu malɔɔ o peelo le. Kɛ mɛɛ hueiye suŋgu niŋ suŋgɔɔ wɔɔŋ wɔɔŋndo, ma soli niko Chona o dɛndɔɔ niŋ ma mal ndu o peelo. Okoŋ mi mɛŋndaŋ ma pɛŋgi hiilɔŋndo.

Mɛɛ Chona wa tolɔɔ o mɛŋndaŋ bɛŋgu, mi suu bɛndoo mial ndu. Kɛ o vi le. Le palɛi iyaa a nyumndaŋ o wa suuwo hoo o dembe. Mi Chona kial suei le mɛɛ o kɛɛ viomɔɔ Jɛhowaa le kɔlaŋ Ninivɛ yɛ. A sina pa nyɛ Chona tosa wo?

Mbo nyuna Jɛhowa o piɛileŋ niŋ le malaa. Mɛɛ mi Jɛhowa tosa mi suu koŋ kɔ kuisi Chona o kɔŋgɔ. Okoŋ Chona kuɛ niko Ninivɛ ni. Hei cho naa pɛɛkoo maa o cho suɛi sɔwɛ le miŋ tosa lɔɔ lɔɔ nyɛ Jɛhowa dimul naa wo.