ASINA pa chua kɛndɛ cho hoo hunɔɔ o Deeve lo wo? Diola ndɔlaŋ lacho Abikɛɛ ni. Kɔlkaloo pila o nɔ ni. Mi ndoo kuuna Deeve suɛi wɔɔŋnde pum tosaa. Kɛ tuupa miŋ pɛɛku a keŋ okɔɔ, ŋ tofaŋndɔ nyɛ wa yɔŋnɔŋndo a Deeve wo.

Mɛɛ Deeve nyaanuŋ Sɔɔl, mbo kɔ vioŋnuŋ o buuloo niŋ. Mi bɛndaa nduaa vɛlɛa yuŋgu ndɔɔ kpou kua loŋ. Puaa hiŋ naa ndu chua wa ndaa wa le 400, nduyɛ mi Deeve simnuŋ simlachinɔ ndaa. Okoŋ, mi Deeve kɔ dimul Masaa le lɛŋnde Moabileŋ aa: ‘Yandii, finya nuu a kala nuu wa num o bɛŋgu choo naŋ tei mi che nyɛ cho yɔŋnɔŋ a ya wo.’ Mi Deeve nda puaa nduaa kandu niko vioŋnɔŋndo kpeekpei o pemboŋ tɛɛŋ.

Hei hiouwɔɔ fokpi Deeve nda Abikɛɛ kei bɔŋaŋ ni. Lɛŋndeŋ pila Nebal pɔnɔ ndɔ ndoo nɔ ni. Ndoo nɔ saa 3,000 vɛlɛa chuiŋnda 1,000. Wana kakaa pila Nebal wa ni. Kɛ Abikɛɛ laandɔ ndoo nɔ bɔɔ kɛndɛi. Nduyɛ ndoo naŋ bɔɔ vɛlɛ naŋɔɔ lahɔllo. Mi ndoo tosa vɛlɛ sɔɔŋ kɛndɔŋ. O kiindiaa niŋ pɛŋ yuŋgu ndɔɔ le pilɛ. Ŋ tofaŋndɔ mɛɛ o tosa hei yɛ.

Deeve a puaa nduaa wa wanaa kɛndɛ naa Nebal cha. Mi ndaa mala ndu saa nduaa manda. O wa paale pilɛ mi Deeve viam puaa nduaa atiŋ naa Nebal cha le mbo mala ndu le nyɛ. Mɛɛ mi puaa Deevea huŋ naa Nebal cha. A komal ndu saa yiiŋnde kili kilio nda wanaa nduaa malaa. Dunyɛi wa paaleleŋ ni. Nduyɛ Nebal ndoo nɔ nyɛm kɛndɔŋ tau le dio. Mi puaa Deevea dimul ndu aa: ‘Ŋ tosal num bɔɔ kɛndɛi. Kani bɛɛ ŋ chiimbuu wɔ saa numnda o pilɛ bɛɛ le. Kɛ lɔɔ lɔɔ ŋ cho numnda hɔlteŋ choo. Lelaŋ yandii, ke naa nyɛdiaa nyɛɛmbɔ.’

Mi Nebal mulul nda aa: ‘O cho nya ndoo le ya yɔŋgu nyɛdiaa nuu le.’ O nɛi kaka bɛndoo niŋ o mulul nda ni, nduyɛ mbo dimi sɔɔŋ wɔɔŋndoŋ a Deeve okɔɔ. Mɛɛ puaa Deevea miiŋgu ma dounuŋ ndu kona a ndi okɔɔ, mi suɛi pala Deeve tau. Mbo dimul puaa nduaa aa: ‘La chua mɔɔŋ nyaŋ!’ Ma biyaŋ kɔlaŋ le Nebal a puaa nduaa kpou diyɔɔ.

Mɛɛ puaa Neballa o pilɛ tuei diomnda Nebal soolaŋ, mbo kɔ dimul Abikɛɛ. Tamala bɛɛ Abikɛɛ yɔŋ te, mbo bɛɛndiaa nyɛdiaa mbo dovi ndu sofɛliaa atiŋ o lakɔɔ mbo biyaŋ kɔlaŋ. Mɛɛ o bɔŋaŋ nda Deeve, mbo tual o sofɛlɛ ndɔɔ choo. Mbo del ndu lachi sakpo mbo dimi aa: ‘Yandii fallo, yaŋ nilaŋ o nyɛ pɔnɔ nuu dimi wo le. O cho wana taasi le, nduyɛ sɔɔŋ ŋdiɔmndoŋ o tosa ni. Nua nyɛdiaa ya chuu numndo. Yandii bii hoo ma mal naa haki, nduyɛ ma puɛɛnuŋ a nyɛ yɔŋnuŋndo.’

Mi Deeve mulul ndu aa: ‘Wana lanɔ taasioo ŋcho ni. A mala ya I dii lɛ Nebal le kaka ndɔɔ le. Salaa wa num choo, miiŋgu chiee.’ Mɛɛ Nebal vi okoŋ kɔɔli, mi Deeve chua Abikɛɛ o nɔɔ niŋ.